مەملەكەت باسشىسىنىڭ بۇگىنگى جولداۋىندا ەلدەگى ساياسي رەفورمالار قورىتىندىلانىپ, الداعى كەزەڭدە ىسكە اسىراتىن كەشەندى ەكونوميكالىق جانە الەۋمەتتىك رەفورمالارعا قاجەتتى ءىس-قيمىل جوسپارى تانىستىرىلدى. ەكونوميكا سالاسىندا جۇرگەن ماماندار, كاسىپكەرلەر, ءوندىرىس ورتاسى وسىنداي مازمۇنداعى جولداۋدى كوپتەن كۇتكەنى راس. سونىڭ ىشىندە ەلىمىزدەگى يندۋستريا سالالارىن قازىرگى زامان تالاپتارىنا ساي ىلگەرى دامىتۋدىڭ قادامدارى, سۋ, جەر قاتىناستارىن رەتتەۋ, ينفراقۇرىلىمدىق قاۋىپسىزدىك ماسەلەسى, جيىلەپ كەتكەن تەحنوگەندى اپاتتار مەن قاۋىپ-قاتەردىڭ الدىن الۋ, ولاردان كەلەتىن شىعىندى ازايتۋ, ەڭ باستىسى, ەل قاۋىپسىزدىگىن جاڭاشا باعالاۋ, سوعان قاجەتتى ناقتى شارالار قابىلداۋ رەتى ايقىندالدى.
تاعى ءبىر ماڭىزدى باعىت – مەملەكەت پەن كاسىپكەرلەر اراسىنداعى جاڭا دەڭگەيدەگى قارىم-قاتىناس. كاسىپكەرلىكتى قولداۋ, قاجەت دەسەڭىزدەر, قورعاۋ دا قاجەت. مەملەكەت پەن قۇقىق قورعاۋ ورىندارىنىڭ رەتسىز, ورىنسىز ارالاسۋىن تەجەۋ, ەكونوميكالىق قىلمىستاردى تەك ەكونوميكالىق سالادا قاراستىرۋ, كاسىپكەرلەرگە ەركىندىك بەرۋ جانە ولاردىڭ بەلسەندىلىگىن ارتتىرۋعا كومەكتەسۋ اسا ماڭىزدى. وسى ماسەلەلەر كوپتەن بەرى العاش رەت ايتىلىپ, مەملەكەتتىك ورگاندارعا ءتيىستى باعىت-باعدار بەرىلدى. مۇنىڭ بارلىعى – ەلدىڭ ءال-اۋقاتىن كوتەرۋگە قاجەتتى ەكونوميكا جانە الەۋمەتتىك سالاداعى ىسكە اسۋى ءتيىس رەفورمالاردىڭ, وزگەرىستەردىڭ وتە جاقسى باستاماسى.
سوندىقتان مەملەكەت باسشىسىنىڭ بۇل جولداۋىن ىقىلاسپەن قابىلدادىق. ايتىلعان مىندەتتەردى ىسكە اسىرۋعا ءوز تاراپىمىزدان ۇلەس قوسۋعا دايىنبىز.
تاعى اتاپ ايتارلىعى, تسيفرلاندىرۋدى ەل پرەزيدەنتى ءوزىنىڭ قاداعالاۋىنداعى ماڭىزدى باعىت ەكەنىن باسا ەسكەرتتى. ەكونوميكا جانە الەۋمەتتىك سالاداعى تسيفرلىق شەشىمدەردىڭ قازاقستان ازاماتتارىنىڭ كۇندەلىكتى ءومىرىن جەڭىلدەتۋگە باعىتتالۋى قاجەتتىگى, وسى باعىتتا ىسكە اسۋى ءتيىس ناقتى ءىس-شارالار كەشەنى بەلگىلەندى.
مۇنىڭ ءبارى كوكەيدەگى ءۇمىتتى ارتتىرادى. بولاشاققا دەگەن سەنىمدى كۇشەيتەدى.
راۋان كەنجەحان ۇلى,
حالىقارالىق «قازاق ءتىلى» قوعامىنىڭ پرەزيدەنتى
