وبلىس اكىمدىگىنىڭ قولداۋىمەن وبلىستىق مادەنيەت جانە تۋريزم باسقارماسى ۇيىمداستىرعان فەستيۆال اياسىندا 17 اۋدان, قالا ءار اپتادا تۇركىستان قالاسىندا مادەنيەت كۇندەرىن وتكىزدى. جۇما-سەنبى كۇندەرى سۋرەتشىلەر مەن قولونەر شەبەرلەرىنىڭ جانە اۋدان, قالانىڭ جەتىستىكتەرى تۋرالى كورمەلەر ۇيىمداستىرىلىپ, ۇلتتىق سالت-ءداستۇر مەن ادەت-عۇرىپتار ۇلىقتالدى. سونىمەن قاتار ۇلتتىق سپورت تۇرلەرىنەن سايىستار وتكىزىلىپ, ونەر جۇلدىزدارىنىڭ قاتىسۋىمەن مەرەكەلىك گالا-كونتسەرت كوپشىلىك نازارىنا ۇسىنىلدى. جاستار اراسىندا ۇلتتىق سالت-ءداستۇر مەن ادەت-عۇرپىمىزدى دارىپتەۋ, كەلەشەك ۇرپاقتى سالاماتتى ءومىر سالتىنا بەيىمدەۋ جانە تۇركىستاننىڭ تۋريستىك الەۋەتىن دامىتۋ ماقساتىنداعى فەستيۆال جەڭىمپازدارى كونستيتۋتسيا كۇنىنە ارنالعان «اتا زاڭىم – ايبىنىم!» اتتى ءىس-شارادا ماراپاتتالدى. سالتاناتتى راسىمدە وبلىس اكىمى دارحان ساتىبالدى ءوڭىردىڭ رۋحاني-مادەني سالاسىندا جەتىستىكتەر كوپ ەكەنىن اتاپ ءوتتى. «وسى باعىتتاعى جۇمىستاردى جۇرگىزۋ, ءوڭىر مادەنيەتىن دامىتۋ, ونەر مايتالماندارىنان قۇرالعان شىعارماشىلىق ۇجىمداردى قالىپتاستىرۋ, وبلىستىق مادەنيەت جانە تۋريزم باسقارماسىنىڭ «كونگرەسس حولل» كوپسالالى كەشەنىنە ءتۇرلى باعىتتاعى ونەر ۇجىمدارىن اشۋ ءۇشىن 100-دەن استام شتات بەرىپ وتىرمىز», دەدى وبلىس اكىمى.
سونداي-اق وبلىس اكىمى ۇزدىك دەپ تانىلعان اۋدان-قالالاردىڭ كوركەمونەرپازدار ۇجىمىن ماراپاتتادى. قازىلار القاسىنىڭ شەشىمىمەن باس جۇلدە يەگەرى – وتىرار اۋدانىنا «گازەل» اۆتوكولىگى, جۇلدەلى ءى ورىن يەگەرى –شاردارا اۋدانىنا جەڭىل اۆتوكولىك تابىس ەتىلدى. ال ءىى ورىندى يەلەنگەن ماقتاارال اۋدانى مەن كەلەس اۋدانى دىبىس جازۋ ستۋدياسى, جۇلدەلى ءىىى ورىن العان تۇركىستان قالاسى, سايرام اۋدانى مەن سارىاعاش اۋدانىنا مۋزىكالىق اپپاراتۋرا سىيعا بەرىلدى. وبلىستىق ونەر فەستيۆالىنىڭ ء«انىم سەنسىڭ تۋعان جەر» ارنايى جۇلدەسىنە جەتىساي اۋدانى, «ونەرلى ولكە» ارنايى جۇلدەسىنە سوزاق اۋدانى, «مادەنيەتىم – مەرەيىم» ارنايى جۇلدەسىنە تولەبي اۋدانى, «سالت ءداستۇرىم – قازىنام» ارنايى جۇلدەسىنە بايدىبەك اۋدانى لايىق دەپ تانىلدى. ارنايى جۇلدە يەلەرىنە 500 مىڭ تەڭگە سىياقى بەرىلدى.
باس جۇلدە يەگەرى وتىرار اۋدانى فەستيۆال اياسىندا قازاقستان سۋرەتشىلەر وداعىنىڭ مۇشەسى ءادىلحان مالىكتىڭ « ۇلى دالا بارىسى» اتتى سۇلتان بەيبارىستىڭ 800 جىلدىعىنا ارنالعان تاقىرىپتىق كەسكىندەمە سۋرەت كورمەسىن كوپشىلىك نازارىنا ۇسىندى. ول وتىرار حالىق تەاترىنىڭ «بەيبارىس» قويىلىمىنا ۇلاسىپ, راحىمجان وتارباەۆتىڭ تۋىندىسى رەجيسسەر عازيز ارىنوۆ پەن سۋرەتشى ءادىلحان مالىكتىڭ جەتەكشىلىگىمەن ساحنالاندى. سونداي-اق «ومارتاسى رۋحتىڭ – وتىرارىم» اتتى اقىندار ايتىسىن دا كوپشىلىك جوعارى باعالادى. ۇلتتىق سپورت ويىندارىنان سايىس, « ۇلى دالا ءداستۇرى» اتتى سالت-ءداستۇر, ادەت-عۇرىپ كورىنىستەرى, قولونەر, سۋرەت كورمەسى سىندى مادەني ءىس-شارالار وبلىس ورتالىعىنا كەلگەن قوناقتار مەن قالا تۇرعىندارىن ەرەكشە كوڭىل كۇيگە بولەپ, وتىرارلىق ونەرپازدار كوپشىلىكتىڭ قوشەمەتىنە بولەنگەن بولاتىن.
تۇركىستان
