فوتو: ۇكىمەتتىڭ ءباسپاسوز قىزمەتى
قازاقستاننىڭ ستۋدەنتتەر قۇراماسىندا 11 سپورت تۇرىنەن: ساداق اتۋ, سپورتتىق گيمناستيكا, كوركەم گيمناستيكا, جەڭىل اتلەتيكا, سەمسەرلەسۋ, دزيۋدو, ءجۇزۋ, ۇستەل تەننيسى, تاەكۆوندو, وق اتۋ جانە ۋشۋ بويىنشا 90 سپورتشى قاتىستى. ناتيجەسىندە قۇراما كوماندا جالپى مەدالدىق ەسەپتە 119 ەلدىڭ اراسىنان 20-شى ورىندى يەلەندى.
كەزدەسۋ بارىسىندا ءاليحان سمايىلوۆ مەملەكەت باسشىسىنىڭ سپورتشىلارعا جولداعان قۇتتىقتاۋ ءسوزىن وقىپ بەردى.
«سىزدەردى – ءحححى دۇنيەجۇزىلىك جازعى ۋنيۆەرسياداداعى جارقىن جەڭىستەرىڭىزبەن شىن جۇرەكتەن قۇتتىقتايمىن! الەمنىڭ 119 ەلىنىڭ ورەندەرى باق سىناعان بايراقتى باسەكەدە جاستارىمىز 2 التىن, 7 كۇمىس جانە 11 قولا مەدالعا يە بولدى. ستۋدەنتتەرىمىزدىڭ بۇل جەتىستىگى قازاق سپورتىنىڭ تاريحىنا التىن ارىپپەن جازىلادى. ساڭلاق سپورتشىلارىمىز مەملەكەتىمىزدىڭ مەرەيىن ارتتىرىپ, ابىرويىن اسقاقتاتتى. ءبىز ولاردى جاس ۇرپاققا ۇلگى ەتۋىمىز كەرەك.ء دۇبىرلى دوداعا قاتىسقان جاستاردىڭ بارىنە شىنايى ريزاشىلىعىمدى بىلدىرەمىن. بولاشاقتا بۇدان دا بيىك بەلەستەردى باعىندىرىپ, قازاق ەلىن الەمگە تانىتاسىزدار دەپ سەنەمىن. بارشاڭىزعا زور دەنساۋلىق, تولاعاي تابىس تىلەيمىن. كوك بايراعىمىز بيىكتە جەلبىرەپ, ءانۇرانىمىز ءاردايىم جەڭىس تۇعىرىنان شىرقالسىن!», دەلىنگەن پرەزيدەنتتىڭ قۇتتىقتاۋ حاتىندا.
ءوز كەزەگىندە پرەمەر-مينيستر ستۋدەنت جاستاردان قۇرالعان قازاقستاندىق اتلەتتەر وسى حالىقارالىق جارىستاردا ءوزىن لايىقتى كورسەتكەنىن اتاپ ءوتتى.
«قازاقستاندىقتار سىزدەردىڭ جەڭىستەرىڭىزدى ماقتان تۇتادى. سىزدەر قىتايدا ەلىمىزدىڭ ابىرويىن اسقاقتاتتىڭىزدار», دەدى ءاليحان سمايىلوۆ.
سونىمەن قاتار ۇكىمەت باسشىسى ۋنيۆەرسيادا بۇل تەك جاي عانا سپورت ەمەس, ەڭ الدىمەن, الەمنىڭ تۇكپىر-تۇكپىرىنەن كەلگەن ستۋدەنتتەرمەن ءوزارا جاقىنداسا تۇسۋگە مۇمكىندىك بەرەتىن جاستار الاڭى ەكەنىن اتاپ ءوتتى. بۇل رەتتە ءارتۇرلى ەلدەردىڭ ازاماتتارىمەن دوستىق بايلانىس ورناتۋدىڭ ماڭىزى ەرەكشە.
ءاليحان سمايىلوۆ اتاپ وتكەندەي, بۇگىنگى تاڭدا قازاقستاندىق سپورت جاڭا ەسىمدەرگە, ياعني داڭقتى سپورتشىلاردىڭ ورنىن باساتىن سپورتشىلارعا مۇقتاج. سوندىقتان دا ۋنيۆەرسياداداعى بۇگىنگى جەڭىستەر – بۇل بولاشاقتاعى وليمپيادالىق جەتىستىكتەرگە اپاراتىن ناقتى قادام.
«ۇكىمەت اتىنان جانە جەكە ءوز اتىمنان لايىقتى ونەر كورسەتكەندەرىڭىز ءۇشىن بارلىق جاتتىقتىرۋشىلار مەن جاس سپورتشىلارعا, سونداي-اق اتا-انالارىڭىزعا العىس ايتامىن. ءبىز سىزدەردىڭ سپورتتاعى جەڭىستەرىڭىز سىيلاعان قۋانىشتى ساتتەرگە ريزاشىلىق بىلدىرەمىز. سىزدەردەن جاڭا جەتىستىكتەر مەن رەكوردتار كۇتەمىز!», دەپ تۇيىندەدى ول ءسوزىن.
پرەمەر-مينيسترمەن كەزدەسۋگە ساداق اتۋدان كۇمىس جۇلدەگەر ديانا تۇرسىنبەك, وق اتۋدان كۇمىس جۇلدەگەر نيكيتا چيريۋكين, وق اتۋدان كۇمىس جانە قولا مەدالدار جەڭىپ العان جۇلدەگەرلەر كومانداسى: يسلام ساتپاەۆ, كونستانتين مالينوۆسكي جانە نيكيتا شاحتورين, دزيۋدودان قولا مەدالدار جەڭىپ العان جۇلدەگەرلەر كومانداسى: سۇڭعات جۇباتقان, اسقار نارقۇلوۆ پەن بەكارىس سادۋاقاس قاتىستى.
سونداي-اق قاتىسۋشىلار اراسىندا تاەكۆوندودان قولا جۇلدەگەرلەر بەكسۇلتان مۇساحان, ابدۋراحمون ماريپوۆ, بەيبارىس قابلان جانە شامسات دۇيسەنوۆ, ۋشۋدان قولا جۇلدەگەرلەر ايكەرىم تورەحانوۆا جانە بەكسۇلتان قوسكەنوۆ, سەمسەرلەسۋدەن قولا جۇلدەگەرلەر جانات نابيەۆ, نازارباي ساتتارحان جانە ارتەم ساركيسيان بولدى.
كەزدەسۋ بارىسىندا بىرنەشە سپورتشى قۇتتىقتاۋ ءسوز سويلەدى. ءوز كەزەگىندە سۇڭعات جۇباتقان قازاقستان قورجىنىن التىن مەدالمەن تولىقتىرعىسى كەلگەنىن, الايدا بۇل جولى قولا جۇلدەگە قول جەتكىزگەنىن اتاپ ءوتتى.
«كەلەسى جولى التىن الامىز دەپ ۇمىتتەنەمىن. قولداۋلارىڭىز ءۇشىن كوپ راحمەت. ەلىمىزدىڭ تۋى ارقاشان جەڭىس تۇعىرىندا جەلبىرەسىن!», دەدى ول.
نازارباي ساتتارحان دا قولداۋ ءۇشىن العىسىن ايتىپ, قازاقستاندىق سپورتشىلاردىڭ جوعارى جەتىستىكتەرگە باسا نازار اۋدارىپ وتىرعانىن اتاپ ءوتتى.
ء«بىز توقتامايمىز جانە الدا بۇدان دا جاقسى ناتيجە كورسەتەمىز», دەدى ول.
كەزدەسۋ بارىسىندا ۇكىمەت باسشىسى ءحححى دۇنيەجۇزىلىك جازعى ۋنيۆەرسيادا جەڭىمپازدارىنا العىس حاتتار مەن ەستەلىك سىيلىقتار تابىس ەتتى.
