وبلىس اكىمى قۇمار اقساقالوۆ اتاپ وتكەندەي, ءبىلىم سالاسىنداعى ماڭىزدى باعىتتاردىڭ ءبىرى – ەرەكشە ءبىلىم بەرۋ قاجەتتىلىكتەرى بار بالالاردى قولداۋ.
– ءبىلىم بەرۋ سالاسىندا عانا ەمەس, سونىمەن بىرگە دەنساۋلىق ساقتاۋ شەڭبەرىندە دە ەرەكشە قاجەتتىلىگى بار بالالارعا قولداۋ كورسەتۋ باعىتىندا ايتارلىقتاي تاجىريبەمىز بار. مىسالى, رۋدنىي قالاسىندا تىرەك-قيمىل اپپاراتى بۇزىلعان بالالاردى قولداۋ ورتىلىعى جۇمىس ىستەيدى. وندا ءبىر مىڭنان استام بالاعا كومەك كورسەتىلەدى. بيىل «قامقورلىق» جوباسى شەڭبەرىندە 125 بالاعا ارنالعان «اۋتيزم» ورتالىعىن اشۋ بويىنشا جۇمىس جۇرگىزىلىپ جاتىر, – دەدى ق.اقساقالوۆ.
وقۋ-اعارتۋ مينيسترلىگى ينكليۋزيۆتى ءبىلىم بەرۋ باسقارماسىنىڭ باسشىسى لاۋرا بوتاباەۆانىڭ ايتۋىنشا, ەلىمىزدە ەرەكشە قاجەتتىلىگى بار بالالارعا ءبىلىم بەرۋ ماسەلەلەرى بويىنشا اۋقىمدى جۇمىستار اتقارىلعان. بۇل, ەڭ الدىمەن, نورماتيۆتىك-قۇقىقتىق بازاداعى وزگەرىستەردى قامتيدى. ەڭ ماڭىزدىسى, 2021 جىلى ەلىمىزدىڭ كەيبىر زاڭنامالىق اكتىلەرىندە ينكليۋزيۆتى ءبىلىم بەرۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى زاڭعا قول قويىلدى. سونىمەن قاتار مۇمكىندىگى شەكتەۋلى بالالاردى ارنايى پسيحولوگيالىق-پەداگوگيكالىق قولداۋعا ارنالعان مەملەكەتتىك تاپسىرىستى ورنالاستىرۋ قاعيدالارى بەكىتىلدى. قازىرگى تاڭدا 24 مىڭنان استام مۇمكىندىگى شەكتەۋلى بالا ارنايى پسيحولوگيالىق-پەداگوگيكالىق قولداۋ الۋعا كەزەكتە تۇر. ال مەملەكەتتىك تاپسىرىستى ەنگىزۋ كەزەكتەگى بالالاردى جاپپاي تۇزەتۋ كومەگىمەن قامتۋعا, ارنايى مەكەمەلەردىڭ تاپشىلىعى ماسەلەسىن شەشۋگە مۇمكىندىك بەرەدى.
– بۇگىندە ەلىمىزدە 188 مىڭنان استام 18 جاسقا دەيىنگى مۇمكىندىگى شەكتەۋلى بالا بار. بۇل كورسەتكىش جىل سايىن ءۇش پايىزعا ۇلعايىپ وتىر. اتالعان دامۋ مۇمكىندىكتەرى شەكتەۋلى بالالاردى ارنا-
يى پسيحولوگيالىق-پەداگوگيكالىق قولداۋ جانە ەرتە تۇزەتۋمەن قامتۋ 2023 جىلى 73 پايىزعا جەتتى. بۇل كورسەتكىشتى 2025 جىلعا دەيىن 100 پايىزعا جەتكىزۋ جوسپارلانىپ وتىر. مەكتەپكە دەيىنگى تاربيە مەكەمەلەرىنىڭ 40 پايىزىندا, ورتا ءبىلىم بەرۋ مەكەمەلەرىنىڭ 80 پايىزىندا جانە تەحنيكالىق-كاسىپتىك ءبىلىم بەرۋ ۇيىمدارىنىڭ 70 پايىزىندا ينكليۋزيۆتى ءبىلىم بەرۋگە جاعداي جاسالعان. بۇل كورسەتكىشتى 2027 جىلعا دەيىن 100 پايىزعا جەتكىزۋ كوزدەلىپ وتىر, – دەدى لاۋرا بوتاباەۆا.
بالالاردىڭ ەرەكشە قاجەتتىلىكتەرىن ەرتە جاستان انىقتاۋ ءۇشىن پسيحولوگيالىق-مەديتسينالىق-پەداگوگيكالىق كونسۋلتاتسيالاردىڭ قىزمەتى ماڭىزدى. بۇگىندە ەلىمىزدە مۇنداي 94 ورتالىق جۇمىس ىستەيدى. مۇنىڭ سىرتىندا 2023 جىلى – 15, 2024 جىلى 14 پسيحولوگيالىق-مەديتسينالىق-پەداگوگيكالىق كونسۋلتاتسيا ورتالىعىن اشۋ جوسپارلانعان. اقمولا, قوستاناي, ۇلىتاۋ وبلىستارى مۇنداي ورتالىقتارمەن تولىق قامتىلعان.
– ەرەكشە بالالارعا ەرتە قولداۋ كورسەتەتىن پسيحولوگيالىق-پەداگوگيكالىق تۇزەۋ كابينەتتەرىنىڭ سانىن ارتتىرۋ ماسەلەسى دە بىرتىندەپ شەشىم تاۋىپ كەلەدى. بۇگىندە ەلىمىزدە 210 تۇزەۋ كابينەتى بار. سونىمەن قاتار ەل كولەمىندە 13 وڭالۋ ورتالىعى جۇمىس ىستەيدى. بۇگىندە ەلىمىزدەگى 5 760 مەكتەپتە مۇمكىندىگى شەكتەۋلى 50 مىڭنان استام بالاعا ينكليۋزيۆتىك ءبىلىم بەرۋگە جاعداي جاسالعان. وقۋ-اعارتۋ مينيسترلىگى مەن «قازاقستان حالقىنا» قورى اراسىندا جاسالعان ارنايى ءبىلىم بەرۋ ۇيىمدارىنىڭ ماتەريالدىق-تەحنيكالىق بازاسىن نىعايتۋ جونىندەگى مەموراندۋم اياسىندا رەسپۋبليكاداعى 31 مەكتەپ-ينتەرنات ارنايى جابدىقتارمەن قامتاماسىز ەتىلگەن, – دەدى مينيسترلىك وكىلى.
قوستاناي وبلىسى
