سوڭعى مالىمەتتەرگە قاراعاندا, سۋعا باتقان 11 ادامنىڭ ىشىنەن توتەنشە جاعدايلار دەپارتامەنتى قىزمەتكەرلەرىنىڭ كۇشىمەن 9 ادامنىڭ, ونىڭ ىشىندە 3 ايەلدىڭ جانە 6 بالانىڭ دەنەسى تابىلىپ, سۋدان شىعارىلدى, 2 كامەلەتكە تولماعان بالانى ىزدەستىرۋ جۇمىستارى جۇرگىزىلۋدە. تۇركىستان وبلىسى اكىمدىگىنىڭ ءباسپاسوز حاتشىسى ميرا ءمۇسىلىمنىڭ حابارلاۋىنشا, ءبىر اۋلەتتىڭ مۇشەلەرى تويدان كەيىن وزەن جاعاسىنا دەمالۋعا توقتاعان. «ەشكىمنىڭ سۋعا ءتۇسۋ تۋرالى ويى بولماعان, ياعني ارنايى سۋعا ءتۇسۋ ءۇشىن توقتاماعان. جاعا تايعاق بولعان سوڭ بىرەۋىنىڭ اياعى تايىپ كەتكەن. ارتىنشا باسقالارى ونى قۇتقارۋعا ۇمتىلعان. ولاردىڭ بارلىعى شومىلاتىن جەر ەمەس ەكەندىگىن بىلگەن. سەبەبى ەشبىرى سۋعا شومىلاتىن كيىممەن تۇسپەگەن. ال امان قالعان وتباسى مۇشەلەرىنە كورشىلەرى مەن اعايىندارى كومەكتەسكەن», دەدى ميرا ءمۇسىلىم. قايعىلى وقيعاعا بايلانىستى وبلىستىق توتەنشە جاعدايلار دەپارتامەنتى جانىنان جەدەل شتاب قۇرىلىپ, وقيعا ورنىنا وتىرار اۋدانى اكىمدىگى, اۋداندىق توتەنشە جاعدايلار ءبولىمى, ورمان شارۋاشىلىعى جانە ەرىكتىلەر جولدانىپ, بىردەن ىزدەستىرۋ شارالارىنا كىرىسكەن. ىزدەستىرۋ شارالارىنا بارلىعى 150 ادام, 18 تەحنيكا, 2 درون جانە 6 ءجۇزۋ قۇرالى جۇمىلدىرىلدى. وبلىس اكىمىنىڭ ورىنباسارلارى وقيعا ورنىندا بولىپ, ءتيىستى نۇسقاۋلىقتار جۇرگىزگەن.
وبلىستىق توتەنشە جاعدايلار دەپارتامەنتى قىزمەتكەرلەرى مەن ەرىكتىلەر اۋدان تۇرعىندارىنا جاز بويى بۇل جەرگە سۋعا تۇسۋگە بولمايتىندىعى جايلى جان-جاقتى ەسكەرتۋلەر جۇرگىزگەن. انىقتالعانداي, مۇنداي ءتۇسىندىرۋ جۇمىستارىنا ءدال وسى اۋلەت تە قاتىسقان. الايدا رۇقسات ەتىلمەگەن ورىندا دەمالۋدىڭ زاردابى مەن ساقتىق شارالارىن ەسكەرمەۋدىڭ سالدارى قايعىعا ۇلاسىپ وتىر. توتەنشە جاعدايلار ءمينيسترى سىرىم ءشارىپحانوۆ سىرداريا وزەنىنە ادامداردىڭ باتىپ كەتۋ وقيعاسى بويىنشا تەرگەۋ امالدارى ءجۇرىپ جاتقانىن ايتتى. «قازىر ىزدەۋ جالعاسىپ جاتىر. سونىمەن قاتار تەرگەۋ ورگاندارى بۇل وقيعانىڭ سەبەبىن انىقتاۋعا كىرىستى. قايعىلى وقيعا بولعان جەردە سۋعا شومىلۋ ءۇشىن ءتيىستى جاعداي جاسالماعان. لاۋازىمدى ادامداردىڭ جاۋاپكەرشىلىگى تەكسەرۋدەن كەيىن انىقتالادى», دەدى جۋرناليستەر سۇراعىنا جاۋاپ بەرگەن مينيستر.
ايتا كەتەلىك, وتىرار اۋدانىندا سوڭعى ءۇش جىلدا ءتىلسىز جاۋ – سۋعا باتۋ وقيعاسى ورىن الماعان. ال قايعىلى جاعدايعا ۇشىراعاندار – 240 تۇرعىنى بار شاعىن اۋىلدىڭ تۇرعىندارى. جالپى, وبلىس اۋماعىنداعى سۋ نىساندارىنىڭ سانى – 4 334. ونىڭ ىشىندە 42 سۋ قويماسى, 149 ءىرى جانە كىشى وزەن, 25 كول, 2 870 كانال جانە 1 248 قاشىرتقى بار.
تۇركىستان وبلىسى
