جۇمىس جوسپاردى بەكىتۋدەن باستالادى
ىشكى ىستەر مينيسترلىگى جىل سايىن «پوگوندى جۋرناليست» جوباسىن ۇيىمداستىرىپ تۇرادى. ونىڭ ءمانى – قولىنا قالام ۇستاعان تىلشىلەر ءبىر كۇن ماماندىعىن اۋىستىرىپ, ءتارتىپ ساقشىسى بولىپ قىزمەت ەتەدى. ءوزىنىڭ قالاۋى بويىنشا پاترۋلدىك نە يۋۆەنالدى پوليتسيا قىزمەتكەرى, تەرگەۋشى, كريميناليست, ت.ب. سالالاردىڭ ءبىرىن تاڭداپ, وقالى كيىم كيىپ, ىشكى ىستەر ورگاندارىنداعى جۇمىس بارىسىن كوزبەن كورىپ, قولمەن ۇستاپ سەزىنەدى. بيىل دا پوليتسيا مەن باق اراسىنداعى بايلانىستى نىعايتۋعا باعىتتالعان جوبا جالعاسىن تاۋىپ, ءتارتىپ ساقشىسى رەتىندە قىزمەت اتقارىپ كورۋگە ۇسىنىس تۇسكەندە ءبىز ويلانباستان تەرگەۋشىلىك سالانى تاڭدادىق. مۇنداعى ماقساتىمىز, بىرىنشىدەن, قىزىعى مەن شىجىعى كوپ قىزمەتتى اتقارىپ كورۋ بولسا, ەكىنشىدەن, كوبىنە جۇرت كوزىنەن تاسادا قىزمەت جاسايتىن, الەمگە جار سالماي-اق قيىن ءىستىڭ قيۋىن كەلتىرىپ جۇرگەن تەرگەۋشىلەر تۋرالى جازۋ.
سونىمەن, استانا قالاسى پوليتسيا دەپارتامەنتىنىڭ نۇسقاۋىمەن ىشكى ىستەر ورگاندارىنداعى ءبىر كۇندىك قىزمەتتى وتكەرۋ ءۇشىن ءبىزدى الماتى اۋداندىق پوليتسيا باسقارماسى جانىنداعى الماتى پوليتسيا بولىمىنە جىبەردى. كوبىنە ادامدار قورقا-سوقتاپ تابالدىرىعىن اتتايتىن مەكەمەگە تاڭ بوزىمەن كەلگەن ءبىزدى ءبولىمنىڭ اعا تەرگەۋشىسى, پوليتسيا كاپيتانى ازامات ارىسبەك قارسى الدى. ءتارتىپ ساقشىسى ءرولىن ءبىرىنشى رەت سومدايىن دەپ تۇرعان بىزگە جۇمىس بارىسىن از-كەم ءتۇسىندىرىپ, باعىت-باعدار بەرگەننەن كەيىن قىزمەتكە كىرىسىپ كەتتىك.
تەرگەۋشىلەردىڭ كۇن ءتارتىبى تاڭعى ساعات 8:30-دا باسشىلىق قۇراممەن ءبىر كۇندىك جۇمىس جوسپارىن تالقىلاۋدان باستالادى ەكەن. ءبىز بارعان كەزدە دە كۇندەلىكتى تارتىپپەن تەرگەۋ بولىمشەسىنىڭ باستىعى, پوليتسيا مايورى مەرۋەرت ورازباەۆا قىزمەتكەرلەرىن جيناپ, ارقايسىنان شۇعىلدانىپ جاتقان ءىستىڭ قاي ساتىسىنا كەلگەنىن, سونىمەن قاتار وسى كۇنى اتقاراتىن جۇمىس بارىسىن سۇراپ, جوسپاردى بەكىتىپ بەردى. وسىدان جۇمىس كۇنى كەشكى 19:00-گە دەيىن جالعاسادى. بىراق پوليتسيا كاپيتانى ازامات ارىسبەكتىڭ ايتۋىنشا, پوليتسيا بولىنىستەرى ارنايى ورگان بولىپ ەسەپتەلەتىندىكتەن جانە قىلمىسكەرلەر ۋاقىت تالعامايتىندىقتان, ءتارتىپ ساقشىلارىنىڭ دا جۇمىس ۋاقىتى ساعات ءتىلىنىڭ كورسەتكىشىمەن سايكەس كەلە بەرمەيدى. «شۇعىل جانە توسىن جاعدايلاردىڭ ورىن الۋىنا بايلانىستى كەز كەلگەن ۋاقىتتا جۇمىسقا شاقىرۋى مۇمكىن. ونداي كەزدە دەرەۋ قىزمەت ورنىنان تابىلىپ, وزىمىزگە جۇكتەلگەن تاپسىرمانى ورىنداۋعا مىندەتتىمىز», دەيدى ول.
قىلمىستىق ىسپەن تانىسۋ
ءبىزدىڭ «تەرگەۋشى لاۋازىمىنداعى» جۇمىسىمىزدى پوليتسيا كاپيتانى ازامات ارىسبەكتىڭ قاراۋىنداعى قىلمىستىق ىسپەن تانىسۋدان باستادىق. ءتارتىپ ساقشىسىنىڭ ايتۋىنشا, قىلمىستىق ىستەر جەڭىل, ورتاشا جانە اۋىر بولىپ ۇشكە بولىنەدى. تەرگەۋشىلەر ولاردى قىلمىستىق-پروتسەسسۋالدىق كودەكسكە سايكەس زاڭعا ساي شەشىمىن شىعارۋ ءۇشىن جان-جاقتى وبەكتيۆتى زەرتتەۋ جۇمىستارىن جۇرگىزەدى. سوتقا دەيىنگى تەرگەپ-تەكسەرۋدىڭ بىرىڭعاي تىزىلىمىنە ەنگىزىلگەن بۇل ءىس اۋىر ساناتقا جاتادى ەكەن. وقيعا بيىل 26 مامىر كۇنى بولىپتى. قىسقاشا بايانداپ وتسەك, كۇدىكتى س. ەسىمدى ازامات پاتەرىنەن قۇرىلىس جۇمىستارىن جاسايتىن سايمانىنىڭ جوعالعانىن بايقايدى. سول ساتتە جابىرلەنۋشى ج.-نىڭ سىرتقا شىعىپ بارا جاتقانىن كورەدى. جابىرلەنۋشىنىڭ قاسىندا ە. جانە ا. ەسىمدى كۋاگەرلەر دە بولعان. كۇدىكتى ولاردىڭ ارتتارىنان جۇگىرىپ جەتىپ, «سايماندى سەندەر الدىڭدار» دەپ تيىسكەن. ولار ء«بىز المادىق» دەپ اقتالعانىنا قاراماستان, ارادا كيكىلجىڭ تۋىنداپ, كۇدىكتى جابىرلەنۋشىنى جاقتان ۇرىپ قۇلاتىپ, ەسىنەن تاندىرادى. كەيىن پوليتسياعا ارىز جازىلىپ, سوت-مەديتسينالىق ساراپتاما ناتيجەسىندە جابىرلەنۋشىگە «اۋىر» دارەجەدەگى دەنە جاراقاتى كەلتىرىلگەنى بەلگىلى بولعان. جابىرلەنۋشى ءالى اۋرۋحانادا جاتىر.
– بىزگە ءاربىر قىلمىستىق ءىستى جۇرگىزىپ, جان-جاقتى تەرگەپ-تەكسەرىپ, شەشىم قابىلداپ, سوتقا جىبەرۋگە 2 اي ۋاقىت بەرىلەدى. ەگەر ءارتۇرلى جاعدايعا بايلانىستى ءىستى قاراۋ سوزىلسا, تەرگەۋشى 10 كۇن بۇرىن سوتقا ءوتىنىش جازىپ, ءىستى قاراۋ مەرزىمىن تاعى ءبىر ايعا سوزۋعا بولادى, – دەيدى پوليتسيا كاپيتانى. ونىڭ ايتۋىنشا, بۇل ءىستىڭ قارالىپ جاتقانىنا دا ەكى ايدىڭ ءجۇزى بولعان. بۇگىن ە. ەسىمدى كۋاگەردەن جانە كۇدىكتىدەن قوسىمشا جاۋاپ الىنىپ, ءىستى پروكۋرورلارعا جىبەرۋگە قاۋلى شىعارىلماق.
– ايىنا, جىلىنا قانشا ءىس قارايسىزدار؟ سىزدەرگە بەلگىلى ءبىر كورسەتكىش مىندەتتەلە مە؟ – دەپ سۇرادىق.
– ناقتى وسىنشا ءىستى تاپسىرىڭدار دەگەن مىندەت جوق. قىلمىستاردىڭ تىركەلۋىنە بايلانىستى وزىمىزگە بەرىلگەن ىستەردى قاراي بەرەمىز. مەن جىلىنا ورتاشا ەسەپپەن 70-80 ءىستى قاراپ, اياقتايمىن. ماسەلەن, وسى جىلدىڭ باسىنان بەرى 58 ءىستى تەرگەپ, شەشىم شىعارىپ, سوتقا جولدادىم, – دەدى تەرگەۋشى.
ونىڭ ايتۋىنشا, بۇرىن ۇرلىق-قارلىق كوپ تىركەلسە, كەيىنگى جىلدارى الاياقتىق, ونىڭ ىشىندە اقپاراتتىق جانە الەۋمەتتىك تەلەكوممۋنيكاتسيا جۇيەلەرىن پايدالانا وتىرىپ جاسالاتىن قۇقىق بۇزۋشىلىقتار, ءبىر سوزبەن ايتقاندا, ينتەرنەت-الاياقتىق ءجيى تىركەلەدى ەكەن. «مۇنىڭ ءبارى ۋاقىتتىڭ تالابىنا ساي قىلمىسكەرلەر دە شىنايى ومىردەن ۆيرتۋالدى الەمگە بەيىمدەلە باستاعانىن كورسەتسە كەرەك. مەنىڭ تاجىريبەمدەگى ىستەردىڭ كوبى – ينتەرنەت-الاياقتىققا قاتىستى», دەدى ول.
تەرگەۋشى ەڭ الدىمەن پسيحولوگ بولۋى قاجەت
پوليتسيا كاپيتانى ازامات ارىسبەك تەرگەۋشىلەر ءۇشىن ەڭ كەرەك قاسيەت – پسيحولوگيالىق قابىلەت ەكەنىن ايتادى. قىلمىس جاسادى دەپ كۇدىككە ىلىنگەن ادامداردىڭ دۇنيەتانىمى, ءبىلىمى, مادەنيەتى, كوزقاراسى ءارتۇرلى بولادى. سوعان بايلانىستى تەرگەۋشى ولاردى وزىنە تارتىپ, سىر سۋىرتپاقتاۋ ءۇشىن ونىڭ دەڭگەيىندە اڭگىمە-دۇكەن قۇرىپ, قىلمىستى اشۋعا سەپتىگىن تيگىزەتىن بار مالىمەتتى الۋعا تىرىسۋى قاجەت. «الدىڭدا وتىرعان ادامنىڭ كوڭىل كۇيىنە, تەرگەۋ بارىسىندا ءوز-ءوزىن ۇستاۋىنا, سالماقتى كۇيدە نەمەسە ساسقالاقتاپ وتىرۋىنا, كوزىن تايدىرا بەرۋىنە, اياق-قولىنىڭ دىرىلىنە, ت.ب. ءىس-قيمىلدارىنا قاراپ-اق ونىڭ شىندىقتى ايتىپ وتىرعانى نەمەسە ءبىر نارسەنى جاسىرىپ تۇرعانى انىق بايقالادى. بىراق ءبىز ينتۋيتسيا دەڭگەيىندە ونىڭ قىلمىسقا قاتىسى بار ەكەنىن سەزگەنىمىزبەن, ناقتى زاتتاي ايعاقتار بولماي, كىنا ارتا المايمىز. سوندىقتان كىناسىن تولىق دالەلدەگەنشە تەرگەپ-تەكسەرۋ جۇمىستارىن جالعاستىرا بەرەمىز», دەيدى ءتارتىپ ساقشىسى.
«پوگوندى جۋرناليست» بولىپ تەرگەۋشى مەن قىلمىستىق ىسكە قاتىسى بار ادام اراسىنداعى جاۋاپ الۋ ساتىنە وسى جولى ءبىرىنشى رەت كۋا بولدىق. تاڭعى ساعات 9-دار شاماسىندا پوليتسيا بولىمىنە وقيعانىڭ كۋاگەرى رەتىندە تىركەلگەن ە. ەسىمدى ازامات كەلدى. جاۋاپ الماستان بۇرىن وعان ء«وزىڭىزدى قالاي سەزىنىپ وتىرسىز؟ جاۋاپ بەرۋگە تولىق مۇمكىندىگىڭىز بار ما؟ اۋىرىپ وتىرعان جوقسىز با؟» دەگەن سۇراقتار قويىلدى. ول تەرگەۋشىگە جاۋاپ بەرۋگە ەشقانداي كەدەرگىنىڭ جوق ەكەندىگىن ايتقاننان كەيىن, وعان قىلمىستىق كودەكستىڭ 419, 420, 421-باپتارى ءتۇسىندىرىلىپ, جالعان, كورىنەۋ مالىمەت بەرگەن جاعدايدا قىلمىستىق جاۋاپكەرشىلىككە تارتىلاتىنى, ياعني 3 جىلدان 7 جىلعا دەيىن باس بوستاندىعىنان ايىرىلاتىندىعى ەسكەرتىلدى. سودان كەيىن تەرگەۋشى ا.ارىسبەك وقيعا بويىنشا كۋاگەردەن تولىققاندى كورگەن-بىلگەنىن سۇراپ, ونىڭ جاۋاپتارىن قىلمىستىق ىسكە تىركەدى. ايتا كەتسەك, سول وقيعانىڭ باسىندا بولىپ, كۇدىكتى مەن جابىرلەنۋشىنىڭ اراسىنداعى كيكىلجىڭدى كورگەن كۋاگەردىڭ بەرگەن مالىمەتى مەن كۇدىكتى س.-نىڭ ايعاقتارى ءبىر-بىرىنە تولىققاندى سايكەس كەلمەيتىن بولىپ شىقتى.
كۋاگەردەن جاۋاپ الىپ بولا بەرە, تەرگەۋشى ا.ارىسبەكتىڭ قاراۋىنا تاعى ءبىر جاڭا ءىس كەلىپ ءتۇستى. تاڭەرتەڭ پوليتسيا بولىمىنە باس سۇققان ەلوردا تۇرعىنى ءوزىنىڭ الاياققا الدانىپ قالعانىن ايتىپ ارىز جازعان. ونىڭ مالىمەتىنە قاراعاندا, مامىر ايىندا وعان بەلگىسىز ءبىر ادام الەۋمەتتىك جەلى ارقىلى حابارلاسىپ, جۇرگىزۋشى كۋالىگىن الىپ بەرەمىن دەپ, 120 مىڭ تەڭگەسىن الىپتى. مىنە, سودان بەرى بىرنەشە ايدىڭ ءجۇزى وتكەنىنە قاراماستان, ءوزىن حالىققا قىزمەت كورسەتۋ ورتالىعىنىڭ قىزمەتكەرىمەن دەپ تانىستىرعان ادام دا جوق, ۋادە ەتىلگەن جۇرگىزۋشى كۋالىگى دە جوق. الاياقتىڭ الداۋىنا تۇسكەنىنە ەندى عانا كوزى جەتكەن تۇرعىننىڭ پوليتسيانىڭ كومەگىنە جۇگىنۋدەن باسقا امالى قالماعان.
– بۇل قىلمىستىق ءىس بويىنشا بىزگە كوپ مالىمەت بەلگىسىز, – دەيدى پوليتسيا كاپيتانى. – جابىرلەنۋشى تەك كۇدىكتىنىڭ ەسىمىن, تەلەفون ءنومىرىن, اقشا اۋدارىلعان بانك كارتاسىنىڭ ءنومىرىن عانا بىلەدى ەكەن. ەندى ءبىز سول ابونەنتتىك ءنومىر بويىنشا بايلانىس وپەراتورىنا سۇراۋ سالىپ, ءنومىر كىمنىڭ اتىنا تىركەلگەنىن انىقتايمىز. سونداي-اق بانك كارتاسى ارقىلى دا ءتيىستى بانككە سۇراۋ سالامىز. بىزگە ەڭ الدىمەن كۇدىكتىنىڭ تولىق اتى-ءجونىن انىقتاپ الۋ قاجەت. ودان ءارى ونىڭ تۇرعىلىقتى جەرىن, جۇمىس ورنىن تابۋعا تىرىسامىز.
تەرگەۋشىنىڭ ايتۋىنشا, كەز كەلگەن قىلمىس بولعان جاعدايدا ەڭ الدىمەن وقيعانىڭ تولىققاندى ءمان-جايىن انىقتاۋ جانە كۇدىكتى تۋرالى بارلىق مالىمەتكە قول جەتكىزۋ ماقساتىندا ءتيىستى مەكەمەلەرگە سۇراۋ سالۋ, بازا ارقىلى تەكسەرۋ جۇمىستارى جۇرگىزىلەدى, كوشە بەينەكامەرالارى, تۇرعىن ۇيلەرگە تيەسىلى كامەرالار تەكسەرىلەدى, سونداي-اق ۇيالى بايلانىس ءنومىرى بويىنشا بايلانىس وپەراتورلارىنا دا شىعىپ, كۇدىكتىنىڭ كىممەن سويلەسكەنى, سويلەسۋ اۋديوجازباسى, ورنالاسقان جەرى سەكىلدى مالىمەتتەر الىنادى. سونىڭ ىشىندە ادامنىڭ تەلەفون ارقىلى سويلەسكەن اۋديوجازباسى مەن جازعان sمs-حابارلامالارى ونىڭ قول سۇعىلمايتىن جەكە اۋماعى بولعاندىقتان, تەرگەۋشىلەر قىلمىستىق ءىستى نەگىزگە الا وتىرىپ, سوتتىڭ سانكتسياسى ارقىلى عانا قۇپيا مالىمەتتەرگە سۇراۋ سالۋعا قۇقىلى. بۇگىنگى تىركەلگەن قىلمىستىق ءىس بويىنشا قۇقىق بۇزۋ ارەكەتى بايلانىس قۇرالدارى جانە بانك ارقىلى جاسالىپ وتىرعاندىقتان, مۇندا دا تەرگەۋ-تەكسەرۋ امالدارى ەڭ الدىمەن بايلانىس وپەراتورلارىنا جانە iكومەك ورتالىعىنا سۇراۋ جولداۋدان باستالماق.
ادام قۇقىعىنان اتتاۋعا بولمايدى
جۇمىس اراسىندا ءبىز جىلىنا ونداعان قىلمىستىق ىسپەن جۇمىس ىستەيتىن پوليتسيا كاپيتانىنان ەرەكشە ەستە قالعان وقيعالار جايىندا سۇرادىق. كۇن سايىن ءتۇرلى جاعدايمەن بەتپە-بەت كەلەتىن ول وسى جىلدىڭ باسىندا ايرىقشا ءبىر وقيعانىڭ بولعانىن ايتىپ بەردى. «ا. ەسىمدى كەلىنشەك پوليتسياعا قوڭىراۋ شالىپ, ءوزىنىڭ قوناقۇيدە ەكەنىن, بولمەسىنە ءبىر ادامنىڭ كىرىپ, ءوزىن ۇرىپ-سوعىپ, زورلاپ, دەنساۋلىعىنا زالال كەلتىرگەنى تۋرالى حابارلادى. ءبىز دەرەۋ ونىڭ كورسەتكەن مەكەنجايىنا جەتىپ باردىق. ايەلدىڭ وزىمەن سويلەسىپ, بولمەنىڭ ءىشىن تەكسەرۋ بارىسىندا وعان ەشتەڭە بولماعانىن, دەنەسىندە ەشقانداي جاراقات ىزدەرى جوق, ءوزى ءدىن امان ەكەنىن انىقتادىق. كەيىن جاۋاپ الۋ بارىسىندا شىن مانىندە ەشكىم وعان قول كوتەرمەگەنىنە جانە زورلاماعانىنا انىق كوز جەتكىزدىك», دەيدى تەرگەۋشى. سويتسە, الكوگولدى ىشىمدىككە ماس بولعان ەلوردا تۇرعىنى ءوزىنىڭ بۇرىنعى جۇرگەن جىگىتىن ساعىنعاندىقتان, ونى پوليتسيا قىزمەتكەرلەرى ارقىلى تابۋ ماقساتىندا «زورلىق جاسادى» دەپ جالعان حابار بەرگەن. ء«بىز قوناقۇيدەگى بەينەكامەرالاردى دا تەكسەردىك. ول جەرگە ءوز اياعىمەن بارعان جانە ونىڭ بولمەسىنە باسقا ەشكىم كىرمەگەن. iكومەك ورتالىعىنا سۇراۋ سالىپ, اۋديوجازباسىن تىڭداعاندا ونىڭ پوليتسياعا ماساڭ كۇيدەگى ادامنىڭ داۋىسىمەن حابارلاسقانىنا جانە تاياق جەگەن ءارى زورلىق كورگەن ادامنىڭ كەيپىندە بولماعانىنا كوز جەتكىزدىك. سوندىقتان پوليتسياعا جالعان حابار بەرگەنى ءۇشىن ونىڭ ءىسى سوتقا جولدانىپ, ءتيىستى جازاسىن الدى», دەيدى ا.ارىسبەك.
– جىلىنا 70-80 ءىستى قاراساڭىز قانشاما قىلمىسكەرمەن تىكەلەي بەتپە-بەت جۇمىس ىستەپ, جاۋاپ الادى ەكەنسىز. بۇل سىزدەردىڭ ومىرلەرىڭىزگە قانشالىقتى قاۋىپتى؟ ولار جازاسىن وتەپ شىققاننان كەيىن ءوشىن الىپ جۇرمەي مە؟ – دەگەن سۇراق قويدىق.
– تەرگەپ-تەكسەرۋ كەزىندە ادامنىڭ قۇقىعى دەگەن نارسەنى ۇمىتپايمىز. وعان نۇقسان كەلمەۋى كەرەك. ادامنىڭ ناقتى قىلمىستى جاساعان-جاساماعانىن انىقتاۋ ءۇشىن, ەڭ الدىمەن, بۇكىل ايعاقتاردى جيناپ, جان-جاقتى تياناقتى جۇمىس جۇرگىزەمىز. ودان كەيىن ماتەريالداردى قاداعالاۋشى ورگان, ياعني پروكۋرورلار تەكسەرىپ بولعان سوڭ عانا ءىس سوتقا جولدانادى. وسىنشاما قۇقىق قورعاۋ ورگاندارىنىڭ تەكسەرۋىنەن ءوتىپ, بارلىق دالەلدەمە جينالعاننان كەيىن, ەگەر شىنىمەن كىنالى بولسا, كۇدىكتىنىڭ مويىنداۋدان باسقا امالى قالمايدى. سوندىقتان قىلمىسكەرلەردىڭ بىزگە وشىگۋىنە ەشقانداي نەگىز جوق. ءوز تاجىريبەمىزدە جازاسىن وتەپ شىققان ادامنىڭ تەرگەۋشىدەن ءوش العان وقيعاسى بولعان ەمەس, – دەپ جاۋاپ بەردى پوليتسيا كاپيتانى.
بۇگىندە كوپشىلىكتى الاڭداتقان تاعى ءبىر ماسەلەنى سۇرادىق: «كوپ ادامنان «تەلەفونىم ۇرلاندى. پوليتسياعا ارىز جازدىم. بىراق ولار تاۋىپ بەرە المادى» دەگەن ءسوزدى ءجيى ەستيمىز. بۇنىڭ سەبەبى نەدە؟». ونىڭ ايتۋىنشا, ەگەر ۇرلانعان تەلەفون قوسۋلى بولسا جانە ىشىندە سيم-كارتا بار بولسا, ونىڭ مەكەنجايىن انىقتاۋعا مۇمكىندىك بار. «ال ەگەر تەلەفون قوسالقى بولشەككە بۇزىلعان بولسا, ياعني تەلەفون قوسىلماسا, تابۋ مۇمكىن ەمەس. كوپ ۇرلىقتىڭ اشىلماۋ سەبەبى وسىندا», دەيدى تەرگەۋشى.
سوڭعى جاۋاپ الۋ
سونىمەن, تۇستەن كەيىن پوليتسيا كاپيتانى ا.ارىسبەك قاراپ جاتقان دەنساۋلىققا اۋىر دارەجەدەگى زالال كەلتىرۋ قىلمىستىق ءىسى بويىنشا كۇدىكتىدەن قوسىمشا جاۋاپ الۋ كەزدەسۋى ءوتتى. پوليتسيا بولىمىنە كۇدىكتى ازامات س. مەن ونىڭ قورعاۋشىسى ەكەۋى كەلىپ, كۇدىكتىنىڭ ءىس-ارەكەتىن تولىققاندى سارالاپ ايقىنداۋ ماقساتىندا وعان قوسىمشا سۇراقتار قويىلدى.
«سىزگە قاساقانا دەنساۋلىققا زيان كەلتىرۋ بويىنشا ايىپ تاعىلىپ وتىر, ونىمەن كەلىسەسىز بە؟» دەگەن سۇراققا كۇدىكتى: «جوق, كەلىسپەيمىن. قاساقانا زيان كەلتىرەيىن دەگەن وي مەندە بولعان ەمەس. بۇل – ابايسىزدا بولعان ارەكەت. سونداي-اق مەن وعان وسىنشا اۋىر زارداپ كەلتىرەتىندەي سوققى جاساعان جوقپىن. ونىڭ جاراقاتى بۇرىننان دا بولعان شىعار. سوندىقتان ونىڭ دەنساۋلىعىنا كەلگەن زيان ءۇشىن ءوزىمدى كىنالى دەپ ەسەپتەمەيمىن», دەپ جاۋاپ بەردى. ونىڭ جاۋابى قىلمىستىق ىسكە تىركەلدى. تەرگەۋشىنىڭ ايتۋىنشا, بۇل ءىس وسىمەن اياقتالىپ تۇر. «ەرتەڭ تاڭەرتەڭ جابىرلەنۋشى تاراپ پەن كۇدىكتى تاراپقا قانداي شەشىم شىعارىلعانى تولىقتاي تانىستىرىلادى. سودان كەيىن ءىس سوتقا جولدانباق. جابىرلەنۋشى ازامات دەنساۋلىعىنا بايلانىستى اۋرۋحانادا جاتقاندىقتان, وعان قىلمىستىق ءىستىڭ اياقتالعانى جانە مازمۇنى تۋرالى حابارلاما جولدانادى», دەدى ول.
«پوگوندى جۋرناليست» جوباسى اياسىندا ءبىر كۇن وفيتسەرلىك قىزمەت ەتە ءجۇرىپ, تەرگەۋشىلەردىڭ شىنىمەن دە ينەمەن قۇدىق قازعانداي تىرلىگىنە كۋا بولدىق. ادام ءولتىرۋ, زورلىق-زومبىلىق, ءىرى كولەمدەگى جەمقورلىق سەكىلدى اۋىر قىلمىستاردى بىلاي قويعاندا, كىشىگىرىم ۇرلىق-قارلىق, توبەلەس سىندى ءاربىر ءىستىڭ اق-قاراسى اشىلىپ, ادىلدىكتىڭ سالتانات قۇرۋى ءۇشىن ولار كۇن سايىن ومىرلەرىن قاتەرگە تىگەدى. تەرگەپ-تەكسەرۋ شارالارى ارقىلى تىرنەكتەپ دالەل جينايدى. ول ءۇشىن ماڭداي تەر توگىلىپ, جۇيكە جۇقارادى. سىرت كوزگە بايقالا بەرمەسە دە, وسىنداي كىشىگىرىم ەرلىككە پارا-پار جۇمىستى اتقارىپ وتىرعان تەرگەۋشىلەر قاۋىمىنا قىزمەتتە ساتتىلىك تىلەۋمەن جوبا اياسىنداعى جۇمىس كۇنىمىز مارەسىنە جەتتى.
