سۋرەتتى تۇسىرگەن جانگەلدى ابدىعالىم
مەملەكەت باسشىسىنىڭ قۇتتىقتاۋ حاتىندا «تورقالى توقسان جاسقا تولعان مەرەيتويىڭىز قۇتتى بولسىن! حالقىمىز ءوزىڭىزدى كورنەكتى عالىم, ۇلاعاتتى ۇستاز, ۇلتجاندى ازامات رەتىندە جاقسى بىلەدى جانە قۇرمەتتەيدى. ەلىمىزدىڭ وقۋ-اعارتۋ سالاسىن دامىتۋعا قوسقان ۇلەسىڭىز وتە مول. ۇزاق جىلعى عىلىمي-پەداگوگيكالىق قىزمەتىڭىز جانە بويىڭىزداعى اسىل قاسيەتتەرىڭىز ءسىزدى ابىروي بيىگىنە كوتەردى», دەلىنگەن.
– زەينوللا مولداحمەتوۆ قاراعاندىلىقتارعا عانا ەمەس, بۇكىل رەسپۋبليكاعا تانىمال جانە ەلىمىزدە زور بەدەلگە يە. ول – ءبىلىم, عىلىم جانە جالپى رۋحاني دامۋ سالاسىندا بىرەگەي تۇلعا. عىلىم مەن قوعامنىڭ دامۋىنا بۇلايشا ۇلەس قوسۋ ەكىنىڭ ءبىرىنىڭ قولىنان كەلمەيدى, – دەدى قوعام قايراتكەرى بىرعانىم ءايتىموۆا.
1980 جىلى زەينوللا مولداحمەتوۆ قاراعاندى مەملەكەتتىك ۋنيۆەرسيتەتىنىڭ تىزگىنىن ءوزىنىڭ اعا-ۇستازى ەۆنەي بوكەتوۆتەن كەيىن العان. ۋنيۆەرسيتەت تاريحىنداعى ەكىنشى رەكتور. اتاقتى ەۆنەي ارىستان ۇلىنان باتا الىپ باستاعان جاۋاپتى قىزمەتىن سەگىز جىل اتقارادى. باسشىلىق ەتكەن جىلدارى فيزيكا-ماتەماتيكا فاكۋلتەتىنىڭ وقۋ-لابوراتوريالىق كورپۋسى مەن ستۋدەنتتەر مادەنيەت سارايى, وقىتۋشىلارعا ارنالعان سەكسەن پاتەرلىك تۇرعىن ءۇي بوي كوتەردى. سونداي-اق قالانىڭ وڭتۇستىك-شىعىسىنداعى ۋنيۆەرسيتەت قالاشىعى مەن بيولوگيا فاكۋلتەتi عيماراتىنىڭ قۇرىلىسى باستالعان. عالىمنىڭ تۇسىندا وسىنداي يگىلىكتى شارالار قولعا الىنىپ, جۇزەگە اسقان.
ز.مولداحمەتوۆ 350-دەن استام عىلىمي ەڭبەك, 6 مونوگرافيا جازدى. فيزيكالىق حيميا سالاسىندا ماڭىزدى زەرتتەۋلەر جۇرگىزگەن. عىلىم سالاسىنداعى جەمىستى جانە كوپجىلدىق ەڭبەگى ءۇشىن ەڭبەك قىزىل تۋ, «قۇرمەت بەلگىسى» وردەندەرىنىڭ لاۋرەاتى اتاندى. «ەرەن ەڭبەگى ءۇشىن» جانە «قازاقستان عىلىمىنىڭ ەڭبەك سىڭىرگەن قايراتكەرى» مەدالدارىمەن ماراپاتتالعان.
ول 1933 جىلدىڭ 3 تامىزىندا سولتۇستىك قازاقستان وبلىسىنىڭ وكتيابر اۋىلىندا دۇنيەگە كەلگەن. 1965 جىلدان باستاپ قاراعاندى قالاسىندا تۇرادى. قالانىڭ عىلىمي جانە ءبىلىم بەرۋ الەۋەتىن قالىپتاستىرۋعا, دامىتۋعا, جوعارى بىلىكتى كادرلار دايارلاۋعا, وسكەلەڭ ۇرپاقتى تاربيەلەۋگە قوسقان زور ۇلەسى مەن قالا ومىرىنە بەلسەندى قاتىسقانى ءۇشىن 2001 جىلى «قاراعاندى قالاسىنىڭ قۇرمەتتى ازاماتى» اتاعىنا يە بولدى.
كونفەرەنتسياعا وتاندىق جانە شەتەلدىك عالىمدار مەن ۇستازدار, زيالى قاۋىم وكىلدەرى كەلىپ, زەينوللا مولداحمەتوۆتىڭ عىلىمعا سىڭىرگەن ەڭبەكتەرىنە شولۋ جاسادى. سونىمەن قاتار «جاساندى ينتەللەكت» تاقىرىبى كونفەرەنتسياعا ارقاۋ بولدى.
قاسىمحان عالىم,
«Egemen Qazaqstan»
قاراعاندى وبلىسى
