سۋرەتتى تۇسىرگەن اۆتور
ايتا كەتەيىك, مۇنداعى داۋلەتتى قازاقتىڭ ءۇيى ابايدىڭ جيدەبايداعى ءۇيىنىڭ كوشىرمەسى. ىشكى بولمەلەرى, اۋلاسى, اۋلاسىندا تۇرعان ارباسىنا دەيىن ءدال جاسالعان. ماڭىنا بارساڭىز, اباي زامانىنىڭ رۋحىنا دەيىن سەزىلىپ تۇرادى.
اباي كۇنى اياسىندا ەتنواۋىلدا ءتۇرلى قولونەر بۇيىمدارىنىڭ كورمەسى كورەرمەن نازارىنا ۇسىنىلدى. قىلقالام شەبەرلەرى ابايدىڭ پورترەتىن بەينەلەپ, شىعارمالارىنا قاراي يلليۋستراتسيالار جاسادى. بارىنەن دە اعاش شەبەرى باقىت كەڭشىلىك ۇلى جاساعان ابايدىڭ دومبىراسىنا كوپشىلىك قىزىعا قارادى. كەيبىرەۋ شەرتىپ كورىپ, قالاي جاسالعانىن سۇراستى. شەبەردىڭ ايتۋىنشا, ابايدىڭ دومبىراسى شاعىن بولعاندىقتان, انشىلەر تاراپىنان سۇرانىس كوبەيە باستاعان ەكەن.
«قولىڭىزعا ۇستاپ تۇرعان ابايدىڭ دومبىراسى جەتى ءتۇرلى اعاشتان جاسالعان. كەيىنگى جىلدارى انشىلەر الىپ جۇرۋگە ىڭعايلى دەپ, ءجيى تاپسىرىس بەرەتىن بولدى. الايدا كۇيدەن گورى انگە جاقسى», دەيدى قولونەر شەبەرى باقىت كەڭشىلىك ۇلى.
ءان دەمەكشى, سالتاناتتى ءىس-شارانىڭ ءسانى انمەن كىردى. شىعىستىڭ سال سەرىسى دارحان سادىرباەۆ ابايدىڭ «بويى بۇلعاڭ», «سەگىزاياق» اندەرىن ورىنداپ, كورەرمەن قوشەمەتىنە يە بولدى. سونىمەن قاتار اباي ولەڭدەرىنەن ۇزىندىلەر وقىلدى, قاراسوزدەرىن ەسكە تۇسىردىك. جۇرگىزۋشىلەر جينالعان كورەرمەندەرگە ابايدىڭ ءومىر جولى, شىعارماشىلىعى تۋرالى سۇراقتار قويىپ, جاۋاپ بەرگەن تاپقىرلارعا كادەسىيلار ۇلەستىردى.
البەتتە, اباي كۇنى وبلىس ورتالىعىندا عانا ەمەس, شىعىس قازاقستاننىڭ بارلىق اۋدانىندا ءوز دەڭگەيىندە اتالىپ ءوتتى.
وسكەمەن
