قارجى مينيسترلىگىنىڭ حابارلاۋىنشا, كەيبىر كاسىپكەرلەردىڭ بانكتەردە اشىلعان جەكە شوتتارىنا تولەمدى ءموبيلدى اۋدارىم ارقىلى الۋى سالدارىنان باقىلاۋ-كاسسا ماشينالارى (بكم) مەن POS-تەرمينالدار قولدانىلمايدى, تيىسىنشە چەك تە بەرىلمەيدى. بۇل – ەسكەرتۋ تۇرىندەگى اكىمشىلىك جاۋاپكەرشىلىك كوزدەلگەن زاڭ بۇزۋشىلىق. قايتالاما زاڭ بۇزۋشىلىق كەزىندە سالىق تولەۋشىنىڭ سۋبەكتىلىگىنە بايلانىستى سالىناتىن ايىپپۇل 15-تەن 50 اەك-كە دەيىن بارادى.
«قر كونستيتۋتسياسىنا سايكەس سالىق تولەۋ – اركىمنىڭ مىندەتى. سالىق ورگاندارى زاڭسىز كاسىپكەرلىك قىزمەتتى كولەڭكەدەن شىعارۋ ماقساتىندا ءتيىستى باقىلاۋ جۇرگىزەدى. 2024 جىلدان باستاپ بانك ۇيىمدارى جەكە كاسىپكەرلەردىڭ ءموبيلدى اۋدارىمدارى بويىنشا دەرەكتەردى بەرەدى. كۇنتىزبەلىك ءۇش اي قاتارىنان اي سايىن 100 ءتۇرلى تۇلعادان ءموبيلدى اۋدارىمدار العان ازاماتتار باقىلاۋعا الىنادى», دەپ مالىمدەدى قارجى مينيسترلىگى.
باقىلاۋ-كاسسا ماشينالارىن قولدانۋدى جەڭىلدەتۋ ءۇشىن 2022 جىلدان باستاپ بكم فۋنكتسيالارىن ەكىنشى دەڭگەيدەگى بانكتەردىڭ POS-تەرمينالدارىمەن بىرىكتىرۋ بويىنشا قاناتقاقتى جوبا جۇرگىزىلىپ جاتىر. بۇل بكم مەن POS-تەرمينالدىڭ ءبىر چەگىن بەرۋگە مۇمكىندىك بەرەدى. اتالعان جوباعا قاتىسىپ جاتقان بانكتەر – «كاسپي بانك» اق, «حالىق بانك» اق جانە «بانك تسەنتركرەديت» اق.
سونىمەن قاتار بكم چەكتەرىن بەرمەۋ فاكتىلەرىن انىقتاۋ بويىنشا «ازاماتتىق باقىلاۋ – چەكتى تالاپ ەت» اكتسياسى دا قولعا الىندى. انىقتالعان بۇزۋشىلىقتار تۋرالى «Wipon cashback» تەگىن ءموبيلدى قوسىمشاسى ارقىلى حابارلاۋعا بولادى.
مينيسترلىكتىڭ مالىمدەۋىنشە, جوعارىدا اتالعان وزگەرىستەر ادال سالىق تولەۋشىلەرگە اسەر ەتپەيدى جانە تەك زاڭسىز كاسىپكەرلىك قىزمەتتى كولەڭكەدەن شىعارۋعا باعىتتالعان. ياعني جەكە تۇلعالار, بۇرىنعىداي, وزدەرىنىڭ جەكە ماقساتتارى ءۇشىن تۋىستارىنا, دوستارىنا, اتا-انالارى مەن بالالارىنا جانە باسقا دا ومىرلىك جاعدايلارعا ارنالعان اۋدارىمداردى جاساي الادى جانە قابىلداي الادى.
