شارۋا قوجالىق باسشىسىنىڭ ايتۋىنشا, ءوزى اشقان تسەحتا مال مەن قۇسقا ارنالعان ازىقتىڭ 12 ءتۇرى ءوندىرىلىپ جاتىر. قۇراماجەمدى ءوندىرۋ ءۇشىن ج.سارتاەۆ بيداي, ماقسارى, ارپا جانە وزگە ءداندى داقىلداردى پايدالانادى ەكەن.
«مەن 18 جىلىمدى سىرتتا وتكىزگەن ازاماتپىن. اقكول اۋىلىنا كەلگەلى مال ازىعىن دايىنداۋدىڭ ماڭىزى زور ەكەنىن اڭعاردىم. ويتكەنى جەرگىلىكتى شارۋالار مەن كورشىلەس اۋداننىڭ مالساق ازاماتتارى تاراپىنان سۇرانىس بار ەكەنى بايقالدى. قۇراماجەمنىڭ ءىرى-قاراعا, قويعا, تاۋىققا ارنالعان تۇرلەرىن شىعارىپ جاتىرمىز. بۇل وتباسىلىق بيزنەس بولعانىمەن, قوسىمشا جۇمىس كۇشى كەرەك ەكەنىن سەزىنىپ وتىرمىز. الايدا قارا جۇمىسشىلاردى تابۋ ماسەلەسى قيىنداپ تۇر», دەيدى ج.سارتاەۆ.
اقكولدە كاسىپورىن اشىپ, تالماي تەر توگىپ جۇرگەن ازاماتتىڭ ايتۋىنشا, جۇمىسىن جولعا قويۋ ءۇشىن «دامۋ» بانكىنەن قوماقتى قاراجاتتى نەسيەگە الىپتى. قۇراماجەم ءوندىرۋ ماۋسىمدىق جۇمىس بولعاندىقتان, نەسيەنى تولەۋ ايتارلىقتاي ماسەلە تۋىنداتاتىن كورىنەدى. ويتكەنى بانك تاراپىنان كانيكۋل قاراستىرىلماعان.
«تاۋەكەلكە بەل بايلاعان سوڭ جۇمىستى جوسپارعا سايكەس ىسكە اسىرۋ كەرەك. بۇل, ارينە, وڭاي ەمەس. وسى ۋاقىتقا دەيىن 35 ملن تەڭگە سالدىم. ءبىر جاقسىسى اۋدان اكىمدىگى قۋاتتىلىعى 65 كۆت بولاتىن ترانسفورماتر ورناتىپ بەردى. ال ءوزىم ارقايسىسى 2,5 ملن تەڭگە تۇراتىن ءۇش اپپارات الدىم. البەتتە, وتباسىلىق بيزنەس بولعاندىقتان بۇل جۇمىستى يگەرۋدىڭ وزىندىك قيىندىقتارى بار. قازىر قوسىمشا ەكى جۇمىسشى كەرەك. الايدا قارا جۇمىستى اتقارۋعا نيەتتى ازاماتتاردى تاپپاي دال بولىپ وتىرعان جايىمىز بار», دەيدى ول جاعدايدى ءتۇسىندىرىپ.
ج.سارتاەۆ كەلتىرگەن دەرەكتەرگە سەنسەك, قۇراماجەم وندىرۋدەن بولەك, 1000 تونناعا ارنالعان ساقتاۋ قويماسىن جاساقتاپ قويعان. ونىڭ ايتۋىنشا, كەيىنگى جىلدارى كورشى اۋدانداردىڭ شارۋالارى دا «جان» شارۋا قوجالىعى وندىرگەن ونىمگە قىزىعا باستاعان. كاسىپكەر وتكەن جىلى 670 توننا قۇراماجەم ساتىپتى. جالپى العاندا ءونىمنىڭ وتكەرىلۋ كورسەتكىشى جىل وتكەن سايىن ارتا تۇسكەن.
«اقكول اۋىلىنداعى توزعان عيماراتتى ساتىپ الدىم. بۇگىنگى تاڭدا ەكى قاباتتى سول مەكەمەنى قايتا قالپىنا كەلتىرىپ جاتىرمىن. بۇل عيماراتتى ارت سپورت تۇرلەرىنە نەمەسە بالالارعا ارنالعان ءتۇرلى ۇيىرمە ءۇيى رەتىندە پايدالانۋعا بارلىق مۇمكىندىك بار. البەتتە, جەرگىلىكتى اتقارۋشى بيلىك عيماراتتى مەملەكەتتىك مەنشىككە قايتارۋعا نيەتتى بولسا, ءوزىم جۇمساعان قوسا ەسەپتەگەندەگى قۇنىنا ساتۋعا دايىنمىن. قاراۋسىز قالعان مەكەمە ەل يگىلىگىنە جاراسا دەگەن تىلەك كوكەيدە اتويلاپ تۇر. جەكە شارۋا قوجالىعىم بار. اۋىلدىڭ كوركەيۋى مەن وركەندەۋى ءۇشىن قولدان كەلگەنشە دەمەۋشىلىك جاساپ ءجۇرمىن. اتقارعان جۇمىستارىمنىڭ بارلىعىنا 100 ملن تەڭگەنىڭ شاماسىندا قاراجات جۇمساپپىن. شىنى كەرەك, از تىرلىك تىندىرعان جوقپىن. الايدا ءوڭىر بيلىگى تاراپىنان ماقتاۋ قاعاز دا الىپ كورمەپپىن. كەيدە سانادا ەڭبەگىمىزدى ەلەپ قويسا دەگەن وي دا قىلاڭ بەرەدى», دەيدى ول.
قۇراماجەم ءوندىرۋ ءىسىن قولعا العان ج.سارتاەۆ الداعى ۋاقىتتا جۇمىسىن جانداندىرا تۇسۋگە نيەتتى. ول جۇمىسشى كۇشىن ارتتىرۋ ارقىلى ءونىم كولەمىن ۇلعايتۋعا قۇلشىنىپ وتىر.
