مۇنى ەستىگەن سەناتورلار عالياسقار سارىباەۆ پەن امانگەلدى تولەمىسوۆ جانە يندۋستريا جانە ينفراقۇرىلىمدىق دامۋ مينيسترلىگىنىڭ اۆتوموبيل جولدارى كوميتەتىنىڭ توراعاسى تولەگەن ابدۋللين «قازاۆتوجول» اق-نىڭ ماماندارىنىڭ ءۋاجىن تىڭداپ, التىنەمەل اسۋىنان وتكىزەتىن كۇرەجولدىڭ قۇرىلىسىن كوزبەن كورىپ قايتتى.
وبلىستىق ءماسليحاتتىڭ توراعاسى گۇلنار تويلىباەۆا, «Amanat» پارتياسىنىڭ جەتىسۋ وبلىستىق فيليالىنىڭ توراعاسى ارىستانعالي ارىن, وبلىستىق جولاۋشى كولىگى جانە اۆتوموبيل جولدارى باسقارماسىنىڭ باسشىسى عالىمجان دارىباەۆ, وبلىستىق, پانفيلوۆ, كەربۇلاق اۋداندىق ءماسليحاتتارىنىڭ دەپۋتاتتارى, وبلىستىق قوعامدىق كەڭەستىڭ مۇشەلەرى قاتىسقان كەزدەسۋدە جەرگىلىكتى تۇرعىنداردىڭ التىنەمەل اسۋىنداعى جولدىڭ بيىل اياقتالمايتىنىنا الاڭداۋشىلىق ءبىلدىرىپ وتىرعانى ايتىلىپ, تالاپ-ارىز بەرگەنى العا تارتىلدى.
كەزدەسۋ بارىسىندا وبلىس اكىمى بەيبىت يساباەۆ بيىل مامىر ايىندا جول جوندەۋ جۇمىستارىنىڭ جاي-كۇيىمەن ارنايى تانىسقانىن اتاپ ءوتتى. ال نىساننىڭ نەلىكتەن كەشىگەتىنى تۋرالى مالىمەتتىڭ شىققانىن سۇراعان سەناتورلارعا جاۋاپ بەرگەن «قازاۆتوجول» ۇك» اق-نىڭ باسقارما توراعاسى مەيىرحات قاسىمباەۆ:
ء«اربىر قۇرىلىس – ءبىر كۇندىك شارۋا ەمەس. سارىوزەك – كوكتال باعىتىنداعى جولدىڭ 45-68 شاقىرىمىنا جۇرگىزىلىپ جاتقان كۇردەلى جوندەۋ جۇمىستارىنىڭ ۇزاق ءجۇرۋى, ەڭ الدىمەن, كەلىسىمشارتقا تىكەلەي بايلانىستى. 2021 جىلى جاسالعان كەلىسىمشارت 3 جىلعا ەسەپتەلگەن. سوعان بايلانىستى قارجى مينيسترلىگى 2021 جىلى قارجىنىڭ 10 پايىزىن, 2022 جىلى تاعى 10 پايىزىن بەردى. ەندى 2023 جىلى كەلگەندە قارجىنىڭ قالعان بولىگىن تۇگەلدەي ءبولدى. العاشقى جىلداردا تەڭ بولىنبەگەن قوماقتى قارجىنى كەيىنگى جىلى تولىق يگەرۋ مۇمكىن بولماي تۇر. وسىلايشا, جالپى 10,2 ملرد تەڭگە ءبولىنىپ وتىر», دەپ ماسەلەنىڭ ءمانىسىن ءتۇسىندىرىپ ءوتتى.
«بۇل – ءبىر. ەكىنشىدەن, 2021 جىلى قارجى قاجەتتى دەڭگەيدە بولىنبەگەندىكتەن, تاۋاردىڭ باعاسى بۇگىندە قىمباتتاپ كەتتى. قارجى مينيسترلىگى مەن ەكونوميكا مينيسترلىگى ينفلياتسيانى قۇرىقتاي الماعانىنان بولەك, جولدىڭ قارجىسىن كەشىكتىرىپ بەرگىزدى. سونىڭ كەسىرىنەن نىساننىڭ قۇنى 2,5 ملرد تەڭگەگە قىمباتتادى. سول سەبەپتى قۇرىلىس مەرزىمى ۇزاردى. مىنا نىساننىڭ ۇزىندىعى – 23 شاقىرىم. رەسپۋبليكا بويىنشا 3 700 شاقىرىم جولدىڭ قۇرىلىسى تۇر. ونىڭ بارىنە قىرۋار جۇمىس كۇشى كەرەك. ونى ىزدەۋ, تابۋ قاجەت. سوندىقتان جالعىز «قازاۆتوجول» ۇك» اق-نى كىنالاي بەرۋگە بولماس. ارينە, ۇلتتىق كومپانيا مەردىگەرلەرىنىڭ كىناسى بار. ونى تۇسىنەمىز. ءوز قۇزىرەتىمىزدىڭ شەگىندە شەشۋگە تىرىسىپ جاتىرمىز. وسىعان وراي بيىلعى قازان-قاراشا ايلارىندا اۆتوجولدى پايدالانۋعا بەرەمىز. كەلەر 2024 جىلى 25 قاراشادا تولىق ءبىتىرىپ, ەلدىڭ قاجەتىنە ۇسىنامىز», دەدى م.قاسىمباەۆ.
«قازاۆتوجول» اق-نىڭ الماتى وبلىستىق فيليالىنىڭ توراعاسى نۇرحات اقىلتاەۆتىڭ ايتۋىنشا, سارىوزەك – كوكتال باعىتىنداعى اۆتوكولىك جولىنىڭ 45-68 شاقىرىمىنداعى قۇرىلىس جۇمىستارى كەيىنگى ءبىر ايدىڭ ىشىندە قارقىن العان. ەندى كوزگە كورىنبەيتىن جولدىڭ تابانىن بەكىتۋ جۇمىستارى اياقتالىپ, بەتونداۋ اياقتالا باستاعان. قازىر كۇنىنە 1 كم جولدىڭ ءاسفالتى توسەلىپ, التىنەمەل اسۋىنداعى كۇردەلى بۇرىلىستاردى تۇزەۋ, بەكىتۋ جۇمىستارى ءجۇرىپ جاتىر. ۇزىندىعى 23 شاقىرىمعا تەڭ جولدى جوندەۋگە العان «رسۋ-1» جاۋاپكەرشىلىگى شەكتەۋلى سەرىكتەستىگىنە كومەككە 2 سۋبمەردىگەر كەلگەن. بۇل – «KazContructionGroup», «E.S.T.Contruction» جاۋاپكەرشىلىگى شەكتەۋلى سەرىكتەستىكتەرى. قازىر اسۋدا 105 ءتۇرلى تەحنيكا, 170 ادام جۇمىس ىستەپ جاتىر. وسىعان وراي بيىلعى قوڭىر كۇزدە ءاسفالتى توسەلگەن جولدىڭ ءبىر باعىتى اشىلىپ, جولاۋشىلاردى وتكىزە باستايدى. ءبىر وكىنىشتىسى, «الاتسەم» زاۋىتىنا شيكىزات تاسيتىن جۇك كولىكتەرى جولدىڭ جابىندىسىن توزدىرىپ, ءتۇزۋ جەرىن قيراتىپ كەتۋدە. وسىعان وراي سەناتورلارعا ءوتىنىش جاساعان «قازاۆتوجول» اق باسشىلارى جولمەن سالماعى اۋىر كولىكتەردى جۇرگىزبەۋدى ۇكىمەت دەڭگەيىندە شەشىپ بەرۋگە كومەكتەسۋدى سۇرادى.
ءوتىنىش اياقسىز قالمايتىنىن جەتكىزگەن سەنات دەپۋتاتى ع.سارىباەۆ ۇلتتىق كومپانيا باسشىلىعىنا اسۋداعى جولدىڭ قاۋىپسىزدىگىن قامتاماسىز ەتۋدى تاپسىرىپ, پرەزيدەنتتىڭ تاپسىرماسىنا وراي جول بيىل پايدالانۋعا بەرىلۋى كەرەك ەكەنىن ەسكەرتتى. كۇنىنە 3 رەيس جاسايتىن قىتايلىق اۋىر جۇك كولىكتەرى جاڭا جولدى توزدىرىپ جىبەرەتىنىن العا تارتقان م.قاسىمباەۆ التىنەمەل اسۋىنداعى جۇك كولىكتەرىنىڭ سانىن ازايتۋ قۇرىلىستىڭ ساپاسىنا تىكەلەي اسەر ەتەتىنىن اتاپ ءوتتى.
بۇدان سوڭ التىنەمەل اسۋىنىڭ باسشي اۋىلدىق وكرۋگىمەن شەكتەسەتىن جەرىنە دەيىن بارىپ, قۇرىلىس جۇمىستارىمەن تانىسقان جۇمىس توبى ماسەلەنى بىرلەسە شەشۋگە كەلىستى. ول ءۇشىن «قازاۆتوجول» اق اسۋدان وتەتىن جولعا اسفالت توسەۋدى كۇز ايىندا ءبىتىرىپ, اۆتوكولىكتەردىڭ وتۋىنە مۇمكىندىك بەرۋى كەرەك. ال جول قۇرىلىسى جوسپارعا سايكەس كەلەر جىلى كۇزدە بىتەدى. ياعني تاۋدى كەسىپ وتەتىن جولدى اباتتاندىرۋ جۇمىستارى 2024 جىلى اياقتالادى.
كەزدەسۋگە كەلگەن قوعامدىق كەڭەس مۇشەلەرى مەن اۋداندىق, وبلىستىق ءماسليحاتتاردىڭ دەپۋتاتتارى سارىوزەك – كوكتال اۆتوجولىنىڭ وزەكتى ماسەلەلەرى – جولدىڭ ماڭىن تازارتۋ, اباتتاندىرۋ سىندى جۇمىستاردى قارجىلاندىرۋعا قاتىستى سۇراقتارىن قويىپ, لايىقتى جاۋاپ الدى.
پارلامەنت سەناتىنىڭ دەپۋتاتتارىمەن كەزدەسۋگە كەلگەن «الاتسەم» زاۋىتىنىڭ جۇرگىزۋشىلەرى زاۋىتقا شيكىزات جەتكىزىپ بەرۋمەن اينالىساتىن « ۇلى دالا جولى» جشس-نىڭ وسپادارسىز ارەكەتىنە نارازىلىعىن جەتكىزدى. ولاردىڭ ايتۋىنشا, التىنەمەل اسۋىنان جەتكىزىلەتىن تاستى سەرىكتەستىك 20 توننالىق جۇك كولىكتەرىنە 40 توننادان تيەۋدى مىندەتتەپ, جول ءجۇرۋ قاۋىپسىزدىگىن ايرىقشا بۇزىپ وتىر. وسىعان بايلانىستى «الاتسەم» زاۋىتىنىڭ باسشىلىعىمەن ارنايى كەزدەسىپ, ماسەلەنى شەشۋدى تاپسىراتىنىن جەتكىزگەن حالىق قالاۋلىلارى اۆتوجولدى مەرزىمىندە بەرۋدىڭ قاجەتىن ەسكەرتتى.
