قارجى مينيسترلىگىنىڭ وبليگاتسيالارىنا سالىنعان ينۆەستيتسيالار ەڭ جوعارى تاريحي دەڭگەيگە دەيىن ءوسىپ, قازىر 453 ملرد تەڭگە بولدى. وتكەن جىلى بەيرەزيدەنتتەردىڭ پورتفەلدىك ينۆەستيتسيالارىنىڭ دامۋشى ەلدەردەن اكەتىلگەنى بايقالعان ەدى. ونىڭ اسەرى بىزگە دە ءتيىپتى: 2022 جىلى بەيرەزيدەنتتەردىڭ كەتۋى (-) 214 ملرد تەڭگە بولدى. سول جىلى حالىقارالىق ينۆەستورلاردىڭ تاۋەكەل سەنتيمەنتى وزگەرگەنىن دە كورىپ وتىرمىز.
«بەيرەزيدەنتتەردىڭ مەملەكەتتىك باعالى قاعازدارعا كەلۋىنەن نارىققا بەرەر وڭ اسەرى تۋرالى ايتار بولساق, وندا ينۆەستورلاردىڭ, ونىڭ ىشىندە شەتەلدىك ينۆەستورلاردىڭ اۋقىمدى شوعىرىنىڭ بولۋى مەملەكەتتىك باعالى قاعازدار نارىعىنىڭ تيىمدىلىگىن ارتتىرادى. باسقا ەلدەردىڭ تاجىريبەسى كورسەتكەندەي, شەتەلدىك پورتفەلدىك ينۆەستيتسيالاردىڭ اكەلىنۋى قارىز الۋ قۇنىن تومەندەتۋگە مۇمكىندىك بەرەدى جانە قورلاندىرۋدىڭ قوسىمشا كوزىنە اينالادى», دەيدى ۇلتتىق بانك مونەتارلىق وپەراتسيالار دەپارتامەنتى باسقارماسىنىڭ باستىعى ولجاس يعساتوۆ.
بەيرەزيدەنتتەر قازاقستاننىڭ مەملەكەتتىك باعالى قاعازدارىن ساتىپ الۋ ءۇشىن الدىمەن ءبىزدىڭ نارىقتا ءوز ۆاليۋتاسىن ساتىپ, تەڭگەنى ساتىپ الۋى قاجەت. وسىلايشا جىل باسىنان بەرى بەيرەزيدەنتتەر شامامەن 400 ملن دوللار ساتقان. بۇل ءوز كەزەگىندە ۆاليۋتا نارىعىندا قوسىمشا ۇسىنىستى قامتاماسىز ەتتى.
«شەتەلدىك ينۆەستورلاردىڭ قىزىعۋشىلىعى ۇلتتىق بانك پەن قارجى مينيسترلىگىنىڭ ءوزارا بەلسەندى كوممۋنيكاتسيالىق ساياساتىنا دا بايلانىستى. جىل باسىنان بەرى شەتەلدىك ينۆەستورلارمەن بىرقاتار كەزدەسۋ ءوتتى. سونىڭ بارىسىندا وتاندىق نارىقتاعى مەملەكەتتىك باعالى قاعازداردىڭ كەلەشەگى مەن تارتىمدىلىعى تۋرالى ايتىلدى. سونىمەن قاتار قازىرگى ۋاقىتتا مەملەكەتتىك بورىش نارىعىندا باستاپقى ديلەرلەر ينستيتۋتىن ەنگىزۋ بويىنشا جۇمىس جۇرگىزىلىپ جاتىر. ول دا نارىقتى دامىتۋدا جانە ونىڭ وتىمدىلىگىن ارتتىرۋدا قوسىمشا قادام بولادى», دەيدى ۇلتتىق بانك وكىلى.
