بالالاردىڭ يگىلىگىنە بەرىلىپ وتىرعان ورتالىقتىڭ اشىلۋ سالتاناتىنا ءوڭىر باسشىسى نۇرجان نۇرجىگىتوۆ, وقۋ-اعارتۋ مينيسترلىگى بالالار قۇقىعىن قورعاۋ كوميتەتى توراعاسىنىڭ ورىنباسارى باتىرحان جولداس قاتىسىپ, بالالاردى قۋانىشىمەن قۇتتىقتادى. ورتالىقتىڭ اشىلۋ راسىمىندە ءسوز العان ءوڭىر باسشىسى نىساننىڭ جىل بويى توقتاۋسىز جۇمىس ىستەيتىنىن ايتىپ ءوتتى.
«پرەزيدەنتتىڭ سايلاۋالدى باعدارلاماسىن ىسكە اسىرۋ ماقساتىندا وڭىردە اۋقىمدى جۇمىستار اتقارىلۋدا. باعدارلاما اياسىندا رەسپۋبليكا بويىنشا بالالارعا ارنالعان 50 ساۋىقتىرۋ لاگەرىن قۇرۋ كوزدەلگەنى ءمالىم. مەملەكەت باسشىسى بىرنەشە وڭىردەگى رەزيدەنتسيانى بالالاردىڭ يگىلىگىنە بەرۋدى تاپسىرعان ەدى. سول تاپسىرما وڭىردە ورىندالدى. ناتيجەسىندە, ء«مولدىر بۇلاق» وقۋ-ساۋىقتىرۋ ورتالىعىنىڭ اشىلۋ سالتاناتىنا كۋا بولىپ وتىرمىز. ورتالىققا كەلگەن بالالار جاز مەزگىلىندە 12 كۇن, باسقا مەزگىلدەردە 24 كۇن ساۋىقتىرۋ شارالارىمەن قامتىلادى. بالالاردىڭ بولاشاعى مەن دەنساۋلىعى – مەملەكەت العا قويعان باستى باسىمدىقتاردىڭ ءبىرى. ەل ەرتەڭىنە ۇمىتپەن قاراپ وتىرعان جاس وسكىندەردىڭ ءبىر پاراسى وسى ورتالىقتىڭ العاشقى قارلىعاشتارىنا اينالعانىمەن بارشاڭىزدى قۇتتىقتايمىن», دەدى ن.نۇرجگىتوۆ ساۋىقتىرۋ ورتالىعىنىڭ اشىلۋ سالتاناتىندا سويلەگەن سوزىندە.
مۇنان كەيىن ءسوز العان وقۋ-اعارتۋ مينيسترلىگى بالالار قۇقىعىن قورعاۋ كوميتەتى توراعاسىنىڭ ورىنباسارى باتىرحان جولداس, وبلىستىق اتا-انالار قوعامدىق كەڭەسىنىڭ توراعاسى رينات نۇراقباەۆ تا ىزگى لەبىزدەرىن جەتكىزدى. ءىس-شارا بارىسىندا جينالعاندار كونتسەرتتىك باعدارلامانى تاماشالادى.
جالپى, ءوڭىر جاسوسپىرىمدەرىنىڭ يگىلىگىنە بەرىلگەن ورتالىق 10 گەكتار القاپتى الىپ جاتىر. مۇندا بالالاردىڭ دەمالىسىن جوعارى دەڭگەيدە ۇيىمداستىرۋعا بارلىق جاعداي قاراستىرىلعان. ناقتىراق ايتار بولساق, زاماناۋي قۇرال-جابدىقتارمەن قامتىلعان وقۋ كابينەتتەرى, سپورت الاڭدارى, ۇيىرمە بولمەلەرى بار. سونداي-اق بالدىرعاندار بەس مەزگىل ىستىق تاماقپەن قامتىلعان.
