وتكەن جىلى جامبىل اۋدانىنا قاراستى جاسوركەن اۋىلىندا بولعان وقيعا كەزىندە 7 جاسار نەمەرەسىن قۇتقارۋعا ۇمتىلعان 61 جاستاعى قاريا نەمەرەسىمەن بىرگە باقيعا اتتانعان بولاتىن. ارينە, بۇل شومىلۋ ماۋسىمى كەزىندە وڭىردە تىركەلگەن العاشقى كىسى ءولىمى ەمەس. ايتكەنمەن, ءدال وسى جاسوركەندەگى وقيعا قوعامدىق رەزونانس تۋدىرعان ەدى.
توتەنشە جاعدايلار دەپارتامەنتى كەلتىرگەن دەرەكتەرگە زەر سالساق, سالا قىزمەتكەرلەرى شومىلۋ ماۋسىمى كەزىندە تىنباي جۇمىس ىستەيدى. الايدا ازاماتتاردىڭ ساقتىقتى ۇمىتۋى وقىس وقيقاعا ۇشىراتىپ جاتادى.
«بيىلعى شومىلۋ ماۋسىمى كەزىندە 11 ەلدى مەكەندە جۇمىس ىستەيتىن 12 جاعاجاي بەلگىلەنگەن بولاتىن. جازاتايىم وقيعالاردىڭ الدىن الۋ ماقساتىندا بريفينگتەر وتكىزدىك. وڭىردەگى تەلەارنالار مەن راديو ارقىلى ماماندار ءتۇسىندىرۋ جۇمىستارىن ۇيىمداستىرىپ تۇرادى. سونداي-اق تەلەارنالاردا ەسكەرتۋ سيپاتىنداعى بەينەروليكتەر كورسەتىلىپ, باسىلىمداردا ماقالالار جاريالانادى. ءتيىستى جەرلەرگە تىيىم سالۋ بەلگىلەرى بار اقپاراتتىق ستەندتەر ورناتىلادى. وبلىستىق توتەنشە جاعدايلار دەپارتامەنتىنىڭ قۇتقارۋ بولىمشەلەرى ەرىكتى قۇتقارۋشىلارمەن بىرلەسىپ, شومىلۋعا تىيىم سالىنعان جانە جابدىقتالماعان ورىنداردا جۇيەلى تۇردە پاترۋلدەۋ جۇمىستارىن ۇيىمداستىردى. وبلىستىق ىشكى ىستەر دەپارتامەنتى جەرگىلىكتى پوليتسيا ۋچاسكەلىك قىزمەتىنىڭ ۋچاسكەلىك ينسپەكتورلارىنىڭ قاتىسۋىمەن رەيدتىك ءىس-شارالار, ازاماتتارمەن ءتۇسىندىرۋ جۇمىستارى جۇرگىزىلىپ تۇرادى», دەيدى وبلىستىق توتەنشە جاعدايلار دەپارتامەنتىنىڭ باسشىسى ەرمەك مومباەۆ اتقارىلىپ جاتقان جۇمىستارعا توقتالىپ.
دەپارتامەنت باسشىسى كەلتىرگەن دەرەكتەرگە سۇيەنسەك, شومىلۋ ماۋسىمى كەزىندە كىسى شىعىنىن بولدىرماۋ ماقساتىندا اتقارىلىپ جاتقان جۇمىس از ەمەس ەكەن. «اكىمشىلىك قۇقىق بۇزۋشىلىق تۋرالى» كودەكسىنىڭ 440, 412, 582 باپتارىنا سايكەس, زاڭسىز ارەكەت جاساعان ازاماتتارعا 174,2 مىڭ تەڭگە سوماسىندا 17 ايىپپۇل سالىنىپتى. ايتا بەرسەك, تىندىرىلعان تىرلىك جەتكىلىكتى. كەرەك دەرەككە كوز جۇگىرتسەك, وبلىس بويىنشا سۋ ايدىندارىنىڭ دەمالۋعا جانە شومىلۋعا قاۋىپتى, جابدىقتالماعان ۋچاسكەلەرىندە «قاۋىپتى ايماق», «تىيىم سالىنعان» دەگەن سەكىلدى وزگە دە ماتىنمەن تىيىم سالاتىن 360 بەلگى جانە 45 اقپاراتتىق ستەند ورناتىلىپتى.
وبلىس ورتالىعى تاراز قالاسىنداعى «دەلفين» جانە «تاراز ارەنا» سپورت كەشەنىنىڭ بازاسىندا 955 بالا ءجۇزۋدىڭ بارلىق ءتاسىلىن مەڭگەرگەن. بۇدان بولەك, توتەنشە جاعدايلار دەپارتامەنتىنە قاراستى «جەدەل قۇتقارۋ جاساعىنىڭ» ماماندارى قاراتاۋ قالاسىنداعى «جارتاس» سۋ قويماسىندا جانە جاڭاتاستاعى «كومسومولسكوە» قالالىق جاعاجايىندا 100 بالاعا سۋدا ءجۇزۋ تاسىلدەرىن ۇيرەتكەن. ۇگىت-ناسيحات جۇمىستارىن جۇرگىزۋ ءۇشىن جەرگىلىكتى بيۋدجەتتەن 26 ميلليون 100 مىڭ تەڭگە قاراستىرىلعان. جەدەل قۇتقارۋ جاساعىنىڭ قۇرال-سايمانى دا جەتكىلىكتى سياقتى...
ارينە, تىلگە تيەك ەتسەك, جاۋاپتى دەپارتامەنت وكىلدەرى سۋعا شومىلۋ ماۋسىمى كەزىندە كىرپىك قاقپاي جۇمىس ىستەپ وتىرعانداي كورىنەدى. سولاي دا شىعار. الايدا دەپارتامەنت باسشىسى كەلتىرگەن دەرەكتەر جاعا ۇستاتپاي قويمايدى. قازىرگى كەزگە دەيىن وڭىردە 3 ادام سۋعا باتىپ كەتىپتى. ونىڭ ىشىندە ءجاسوسپىرىم بالا دا بار.
شومىلۋ ماۋسىمى كەزىندە اتا-انالار بالالارىن قاراۋسىز قالدىرماسا, ءتيىستى ماماندار جۇمىسقا جاۋاپكەرشىلىكپەن قاراسا يگى.
