قازىر كەز كەلگەن ادامنىڭ جەدەل تانىلۋعا مۇمكىندىگى مول. انشىلەر دە الەۋمەتتىك جەلىنىڭ ارقاسىندا حالىقتىڭ قوشەمەتىنە يە بوپ جاتقانى داۋسىز. سوندايدا ء«شوپ تە ولەڭ, شوڭگە دە ولەڭ» بولماسا ەكەن دەيسىڭ. ويتكەنى كەيدە ەركىندىك تە ادامدى ەسسىزدىككە اپارادى ەمەس پە؟
ءبىر انىعى, بۇگىندە تالعامىنا داق تۇسىرمەگەن جاس انشىلەر شوعىرى قالىپتاسىپ كەلە جاتقانى قۋانتادى. سولاردىڭ ءبىرى – «يا ليۋبليۋ تەبيا, ءاليا» انىمەن تانىلعان جاس پەرى سادراددين بولات ۇلى. جۇرەككە جىلى تيەتىن اندەرىمەن تىڭدارماننىڭ قوشەمەتىنە بولەنگەن ءانشىنىڭ شىعارمالارى بۇگىندە جاستار اراسىندا زور تانىمالدىققا يە ەكەنى داۋسىز.
«مۋزىكا – ادامزات اتاۋلىنىڭ امبەباپ ءتىلى» دەگەن گەنري لونگفەللونىڭ ءسوزىنىڭ جانى بار. ايتالىق, بىرنەشە حيت انىمەن انسۇيەر قاۋىمنىڭ كوزايىمىنا اينالعان ءسادرادديننىڭ «انت» دەگەن شىعارماسى شىنىندا دا جاس تالانتتىڭ تولقۇجاتىنا اينالعانىنا ەشكىمنىڭ تالاسى جوق شىعار.
«جۇرەگىممەن انت بەردىم,
شۇكىر, اللا باق بەردى.
بولاشاقتىڭ داپتەرىن,
جازىپ كەلەم باس ارىپتەرمەن», دەپ باستالاتىن ءاننىڭ العاشقى شۋماعىنان-اق تۋىندىنىڭ ءون بويىنان ديداكتيكالىق ويدىڭ ورىلە تۇسەتىنىن اڭعارۋ قيىنعا سوقپايدى. سوعان قاراپ بۇل ءاننىڭ تىڭدارمانى كوپ بولا قويماس دەپ پايىمدايتىنىڭىز داۋسىز. ويتكەنى تۇپكى ويى ديداكتيكالىق پالساپامەن استاسىپ جاتاتىن شىعارمالاردىڭ «عۇمىرى» بۇل كۇندە ۇزاق ەمەستەي كورىنەتىنى اقيقات. بىراق جاس ءانشىنىڭ تالانتى مەن شەبەرلىگى ءبىز ويلاعان, قالىپتاسقان بارلىق قاساڭ قاعيدانىڭ تاس-تالقانىن شىعارىپ تاستاپتى.
ءيا, جوعارىدا لونگفەللونىڭ ءسوزىن بەكەر ايتپادىق. ءسادرادديننىڭ «انت» دەگەن وسى ءبىر ءانى Youtube-تە 24 ميلليون قارالىم جيناپتى. ەندى سول ميلليونداردىڭ قانشاسى شەتەلدىك ونەرسۇيەر قاۋىم ەكەنىن ءوزىڭىز پايىمداي بەرىڭىز.
«ەڭسەڭدى كوتەر, باۋىرىم,
جاساعىن ءىستىڭ ءتاۋىرىن.
ادامنىڭ كۇنى اداممەن,
كوپ دوسىڭ كەيدە بولعانمەن,
ءىس تۇسسە قايدا قالعانىن؟
بەتپەردە كيگەن جان-جاعىم
كىمگە كىممىن بىلمەي بارامىن», دەگەن شۋماقتار البەتتە جۇرەككە جىلى تيەتىنى داۋسىز. ايتكەنمەن, كۇندەلىكتى ايتىلاتىن مورالدىق اڭگىمەلەردىڭ ولەڭدەگى جيىنتىعىنداي كورىنەتىنى جانە جاسىرىن ەمەس.
«سانادا مىڭ سۇراق,
ءبىر تۇرىپ, ءبىر قۇلاپ.
پەندەڭە مىڭ سىناق,
ءبىر ك ۇلىپ, ءبىر جىلاپ.
قالاعانىڭدى سۇرا,
جاراتقانىڭنان جىلاپ.
الاقانىڭدى جايىپ,
الداعى كۇن ۋايىم», – دەپ تۇيىندەلەتىن ادەمى ءاننىڭ قايىرماسى قازاقتىلدى تىڭدارماننىڭ ساناسىندا بىردەن ساقتالاتىنى تالاس تۋدىرمايدى. تىلگە جەڭىل ەكەنىنە كۇمان جوق.
قالاي الىپ قاراساق تا, ءاننىڭ حالىقارالىق دەڭگەيدە تانىلۋىنا ءانشىنىڭ ۇنىندەگى قازاقى بوياۋ مەن شەبەرلىكتىڭ اسەر ەتكەنى تالاسسىز. ويتكەنى ءانشىنىڭ ءان يىرىمدەرىنە ەرەكشە بوياۋ قوساتىنى, ىزدەنىستىڭ ىزىنە تۇسەتىنى ەستى تىڭدارمانعا بىردەن بايقالادى دەسەك, قاتەلەسە قويماسپىز. سونىسىمەن ءان كوپشىلىكتىڭ جۇرەگىنە جول تاپقانى داۋسىز.
جاس ءانشى بالا كۇنىنەن كاسىبي مامان بولۋدى ارمانداپتى. بۇگىندە جاستاردىڭ جۇرەگىن جاۋلاعان تالانتتى ازامات ارمانىنا جەتكەنى داۋسىز. نامىسىن قايراعان قازاق ۇلى تىنىمسىز ەڭبەك ەتسە, حالىقارالىق دەڭگەيدە دە قازاق ءانىن تانىتاتىنىنا ءشۇبا جوق. «انت» دەگەن انىمەن تانىلعان تالانتتىڭ انتىنا ادال بولىپ, مۋزىكا الەمىندە وشپەس ءىز قالدىراتىنىنا سەنىم مول.
