كەز كەلگەن قۇقىق قورعاۋ ورگانىنىڭ, ونىڭ ىشىندە پروكۋراتۋرا قىزمەتىنىڭ تيىمدىلىگى ونىڭ قىزمەتكەرلەرىنىڭ قىزمەتتىك مىندەتتەرىن ساۋاتتى جانە ساپالى ورىنداۋ قابىلەتىنە تىكەلەي بايلانىستى. پروكۋراتۋرا قىزمەتكەرلەرىنىڭ كۇردەلى پروبلەمالىق ماسەلەنى شەشكەن نەمەسە قىلمىستىق, ازاماتتىق, اكىمشىلىك ىستەر بويىنشا كاسىبيلىك تانىتقان ىسكەرلىك جانە مورالدىق قاسيەتتەرىن مەملەكەتتىك ورگاندار مەن قاراپايىم ازاماتتار جوعارى باعالايدى. وعان كۇندەلىكتى ومىردەن ناقتى مىسالدار جەتەرلىك.
مىسالى, ۇلتتىق قاۋىپسىزدىك كوميتەتىنىڭ باسشىلىعى باس پروكۋراتۋراعا قىلمىستىق توپتى جويۋ جونىندەگى ارنايى وپەراتسيانى جۇرگىزۋ كەزىندە كاسىبيلىك پەن باتىلدىق تانىتقان پروكۋراتۋرا ورگاندارىنىڭ قىزمەتكەرىن كوتەرمەلەۋ تۋرالى ۇسىنىس بىلدىرگەن بولاتىن. سونىمەن قاتار تالدىقورعان قالالىق سوتى ءوز ۇسىنىسىندا جەتىسۋ وبلىسى پروكۋراتۋراسىنىڭ قىزمەتكەرى س.ا.دۇيسەباەۆتىڭ قىلمىستىق ءىس بويىنشا جوعارى بىلىكتىلىك كورسەتكەنىن اتاپ ءوتتى. ونىڭ مەملەكەتتىك ايىپتاۋدى بەلسەندى جانە ساۋاتتى جۇرگىزۋى جوعارى لاۋازىمدى شەنەۋنىككە قاتىستى ادىلەتتى سوت اكتىسىن شىعارۋعا سەپتىگىن تيگىزدى.
كاسىپكەرلەردىڭ قۇقىقتارىن قورعاۋ – پروكۋراتۋرا ورگاندارى قىزمەتىنىڭ باسىم باعىتتارىنىڭ ءبىرى. مەملەكەتتىك جانە باقىلاۋشى ورگاندار تاراپىنان زاڭنامانى ورەسكەل بۇزۋ جاعدايلارىنا جول بەرىلگەن كەزدە زاڭدى تۇلعالار پروكۋرورلاردىڭ ىسكە جەدەل ارالاسۋىن قاجەت ەتەدى. سولاردىڭ قاتارىندا باس پروكۋراتۋراعا «قازۆتورمەت», «پروگرەسس KZ» جشس, «ەۆروكرۋك» جشق باسشىلارىنان العىسحاتتار كەلىپ ءتۇستى. ولار استانا قالاسى پروكۋراتۋراسى مەن كولىك پروكۋراتۋراسىنىڭ قىزمەتكەرلەرىن كوتەرمەلەۋدى سۇرادى.
پروكۋرورلىق قاداعالاۋ اكتىلەرى بويىنشا ءبىر كاسىپكەرگە استانا قالاسى اكىمدىگىنەن 12 ملن تەڭگە جەدەل قايتارىلدى. سونىمەن قاتار سولتۇستىك قازاقستان كولىك پروكۋراتۋراسىنىڭ قىزمەتكەرلەرى رەسەيلىك كومپانيانىڭ نەگىزسىز ۇستالعان كولىگىن قايتارعانى ءۇشىن العىسقا يە بولدى. ال كىرمە جولداردى سۋ باسۋ پروبلەماسىنىڭ پروكۋرورلاردىڭ ارالاسۋى ارقاسىندا شەشىلۋى «قازۆتورمەت» جشس جۇمىسىنىڭ تۇراقتى جولعا قويىلۋىنا سەبەپشى بولدى. بۇدان بولەك, باس پروكۋراتۋرا قىزمەتكەرلەرىنە سوتتالعانداردان دا العىسحاتتار كەلىپ ءتۇسىپ جاتادى.
جالپى, پروكۋراتۋرا ورگاندارىنىڭ قىزمەتى سان قىرلى جانە قاراپايىم تۇرمىستىق ماسەلەلەردەن باستاپ, كوپتەگەن ادامداردىڭ قۇقىقتارىن قوزعايتىن جاپپاي زاڭ بۇزۋشىلىقتاردى جويۋعا دەيىنگى اۋقىمدى ءىس-قيمىلداردى قامتيدى. ونىڭ ءبارى ازاماتتار مەن زاڭدى تۇلعالاردىڭ ومىرلەرىنە تىكەلەي قاتىستى. ماسەلەن, «جايناق» شاعىن اۋدانىنىڭ تۇرعىندارى 4 ايعا سوزىلعان ەلەكترمەن جابدىقتاۋ پروبلەمالارىن شەشكەن الماتى وبلىسى ىلە اۋدانىنىڭ پروكۋرورلارىنا العىس بىلدىرگەن بولاتىن. سونداي-اق الماتى قالاسى جىبەك جولى جانە ماۋلەنوۆ كوشەلەرىندەگى
4 كوپپاتەرلى ءۇيدىڭ تۇرعىندارى دا كوممۋنالدىق جابدىقتاۋ پروبلەماسىن شەشكەن پروكۋرورلارعا ريزاشىلىق جەتكىزدى.
پروكۋراتۋرا قىزمەتكەرلەرىنىڭ جۇمىستان تىس ۋاقىتتا جاساعان ىستەرى دە ازاماتتاردىڭ نازارىنان تىس قالعان جوق. باس پروكۋراتۋرانىڭ قۇقىقتىق ستاتيستيكا جانە ارنايى ەسەپكە الۋ كوميتەتىنىڭ قىزمەتكەرى ج.مۇرات «LIDER.KZ» ەرىكتىلەرىمەن بىرگە استانا قالاسىندا جوعالىپ كەتكەن بالانى تاۋىپ, اتا-اناسىنا تاپسىرعان بولاتىن. سول سەكىلدى قوستاناي وبلىسىنىڭ رۋدنىي قالاسىندا پروكۋراتۋرا قىزمەتكەرى ن.قالمان كورشىسىنىڭ جوعالعان بالاسىن تاۋىپ بەردى.
جالپى العاندا, بيىل پروكۋراتۋرا ورگاندارىنا مەملەكەتتىك مەكەمەلەردەن, ازاماتتاردان جانە زاڭدى تۇلعالاردان 128 العىس حات كەلىپ ءتۇستى. وسىعان وراي, ەرەكشە جەتىستىكتەرگە قول جەتكىزگەن قىزمەتكەرلەردى باس پروكۋرور مەن وبلىستىق پروكۋراتۋرا باسشىلارى ۆەدومستۆولىق ناگرادالارمەن جانە باسقا دا كوتەرمەلەۋ شارالارىمەن ماراپاتتادى.
ايسۇلۋ ماحسەمەتوۆا,
قورقىت اتا اتىنداعى قىزىلوردا ۋنيۆەرسيتەتىنىڭ 3-كۋرس ستۋدەنتى
