تىرشىلىگىن تۇزەتىپ, اينالاسىنا ۇلگى بولۋعا تالپىنعان اۋىلداردى ماراپاتتاپ, مەرەيىن ءوسىرۋ بۇرىن دا بار ءداستۇر ەدى. ال بىلتىر باستاۋ العان مىنا كونكۋرستىڭ كوزدەگەنى – اۋىلدار مەن قالانى قاتار دامىتۋ. سالتاناتتى راسىمدە ايماق باسشىسى وسىنى باسا ايتتى.
– مەملەكەت باسشىسى تۇركىستاندا وتكەن ۇلتتىق قۇرىلتايدا «تازالىق پەن ۇقىپتىلىق كۇندەلىكتى ءومىر سالتىمىزعا اينالۋى قاجەت. قالالار مەن اۋىلداردىڭ ساۋلەتتى, ساياباقتار مەن اۋلانىڭ تازا بولۋى ەڭ الدىمەن باسقا بىرەۋگە ەمەس, وزىمىزگە كەرەك. ازاماتتارىمىز قوعامدىق ورىندار مەن قورشاعان ورتاعا جاناشىر كوزقاراسپەن قاراۋى ءتيىس», دەگەن بولاتىن. قازاقىلىقتىڭ قايماعى بۇزىلماعان, ۇلتتىق ءداستۇردىڭ التىن قازىعى سانالاتىن سىربويىلىقتار بۇل باستامانى نەگىزگى قاعيدا ەتەتىنى ءسوزسىز. پرەزيدەنتتىڭ «قازاقستان رەسپۋبليكاسىنىڭ اۋىلدىق اۋماقتارىن دامىتۋدىڭ 2023-2027 جىلدارعا ارنالعان تۇجىرىمداماسىن بەكىتۋ تۋرالى» جارلىعى اياسىندا ۇكىمەت پەن اكىمدىكتەر الداعى بەس جىلدىقتا اۋىل-
دى دامىتۋعا كۇش سالۋدا. ءاربىر ەلدى مەكە-
نىندە اۋقىمدى شارالار ۇزدىكسىز ۇيىم-
داستىرىلىپ كەلەدى, – دەدى وبلىس اكىمى.
اتالعان تۇجىرىمداما اياسىندا بىلتىر وڭىرگە 9,9 ملرد وسى جىلى 17 ملرد 100 ملن تەڭگە ءبولىنىپ وتىر. بۇل قارجى ەلدى مەكەندەردىڭ ينجەنەرلىك-ينفراقۇرىلىمىن جاڭعىرتۋعا, الەۋمەتتىك نىساندار سالۋ مەن جوندەۋگە, مامانداردى الەۋمەتتىك قولداۋعا, شاعىن جانە ورتا كاسىپكەرلىكتى دامىتۋعا باعىتتالادى.
جيىندا ايماق باسشىسى «ۇزدىك ەلدى مەكەن» كونكۋرسىن ءداستۇرلى تۇردە جىل سايىن وتكىزۋ جوسپارلانعانىن اتاپ ءوتتى. اينالاسىنا بىرلىك ارقىلى تۋعان توپىراقتى تۇلەتۋگە بولاتىنىن كورسەتكەن جەڭىمپازدارعا كۇندەلىكتى تۇرمىسقا ەڭ قاجەتتى, زاماناۋي تەحنيكالار تابىستالادى. اباتتاندىرۋدا الدان كورىنگەن قالاداعى شاعىن اۋدانداردا كوشە, اۋلالاردى جارىقتاندىرۋ, بالالار جانە سپورتتىق ويىن الاڭدارىن, گۇلباق سالۋ سىندى جوبالار وبلىستىق بيۋدجەتتەن قارجىلاندىرىلادى.
– كۇزدە «ۇلگىلى ەلدى مەكەن» كونكۋرسى قالانىڭ شاعىن اۋداندارى, اۋدان ورتالىقتارى مەن اۋىلدار اراسىندا قايتا جالعاسادى. قازىردىڭ وزىندە وبلىستىق بيۋدجەتتەن 523 ملن تەڭگە قارجى ءبولىنىپ, دايىندىق جۇمىستارى باستالدى, – دەدى نۇرلىبەك ماشبەك ۇلى.
الەۋمەتتىك جاۋاپكەرشىلىكتى سەزىنگەن ايماق كاسىپكەرلەرى دە ەل ەكونوميكاسىن دامىتۋعا قوماقتى ۇلەس قوسىپ وتىر. جەرگىلىكتى ىسكەرلەر مەن قازىر ەلىمىزدىڭ ءار تۇكپىرىندە جۇرگەن مەتسەناتتار «تۋعان جەردى بىرگە تۇلەتەيىك!» باستاماسىن قولدادى. وسىلايشا, قازىر وڭىردە دەمەۋشىلىكپەن بارلىعى 30 ملرد 100 ملن تەڭگەنىڭ جوبالارى جۇزەگە اسۋدا. ونىڭ ىشىندە ەلدى مەكەندەر مەن قالانى كوركەيتۋگە باسىمدىق بەرىلگەن. دەمەۋشىلەردىڭ قولداۋىمەن 1 ملرد 100 ملن تەڭگەگە وبلىس ورتالىعىنداعى 50 ءۇيدىڭ قاسبەتى زاماناۋي پانەلدەرمەن قاپتالۋدا. تاعى 1 ملرد تەڭگەگە 20 كوپقاباتتى تۇرعىن ءۇيدىڭ اۋلالارىنا سپورت الاڭدارى سالىنىپ, تروتۋارلار مەن جارىق باعانالارى جاڭارتىلىپ جاتىر.
وبلىس تۇرعىندارى اتىنان ىسكەر ازاماتتارعا العىس ايتقان وبلىس اكىمى تاعى ءبىر ەرەكشە باستامانى اتاپ ءوتتى.
قازىرگى تالاپ, قالا مەن اۋىل تۇرعىندارىنا بىردەي جاعداي جاساۋ, ورتالىق پەن شالعايداعى ەلدى مەكەندەر اراسىنداعى ايىرماشىلىقتى ازايتۋ. الداعى ۋاقىتتا اۋدان ورتالىقتارىنداعى تۇرعىندار تىلەگى بويىنشا مۋزەي, كىتاپحانا, ارحيۆ, نەكە قيۋ زالى, ارداگەرلەر جانە انالار, جاستار ورتالىقتارى سىندى بىرقاتار مەكەمە بىرىكتىرىلىپ, ولارعا زاماناۋي ءبىر عيمارات سالۋ ويلاستىرىلىپ وتىر.
ايماقتا العاش رەت وتكىزىلىپ وتىرعان «ۇلگىلى ەلدى مەكەن» وبلىستىق كونكۋرسىنداعى «ۇلگىلى اۋىل» اتالىمى بويىنشا ءۇشىنشى ورىننان ارال اۋدانى امانوتكەل اۋىلى كورىنىپ, ەلدى مەكەنگە امبەباپ تيەگىش تراكتور تابىستالدى. ەكىنشى ورىن جەڭىمپازى جالاعاش اۋدانىنداعى تاڭ اۋىلىنا جەر قازاتىن تراكتور تىركەمەسىمەن بەرىلدى. ال جەڭىمپاز – سىرداريا اۋدانىنداعى ناعي ءىلياسوۆ اۋىلىنا جەر قازاتىن تراكتور مەن جۇك تاسىمالدايتىن كاماز كولىگى تابىستالدى.
«ۇلگىلى اۋدان ورتالىعى» اتالىمىندا ءۇشىنشى ورىننان كورىنگەن قازالى اۋدانىنداعى ايتەكە بي كەنتىنە اسسەنيزاتور كولىگى مەن جول تازالايتىن تراكتور بەرىلدى. ال ەكىنشى ورىنعا يە بولعان شيەلى كەنتى قالدىق تاسىمالدايتىن كاماز كولىگىن, جول تازالايتىن تراكتور جانە اسسەنيزاتور كولىگىنە قول جەتكىزدى. ءبىرىنشى ورىن العان جاڭاقورعان كەنتىنە قالدىق تاسىمالدايتىن كاماز, ارنايى جول تازالايتىن كولىك, اسسەنيزاتور مەن كران مانيپۋلياتورى تابىستالدى.
«قىزىلوردا قالاسىنىڭ ۇلگىلى شاعىن اۋدانى» نوميناتسياسى بويىنشا ءۇشىنشى ورىن جەڭىمپازى بولعان بايتەرەك-شۇعىلا شاعىن اۋدانىنا «سكۆەر قۇرىلىسى» جوباسى سىيعا تارتىلدى. ەكىنشى ورىن جەڭىمپازى سىرداريا شاعىن اۋدانىنا «بالالار جانە سپورتتىق ويىن الاڭدارى قۇرىلىسى» جوباسى تاپسىرىلدى. ءبىرىنشى ورىن جەڭىمپازى اراي-2 شاعىن اۋدانى «سكۆەر, سپورتتىق ويىن الاڭدارى قۇرىلىسى جانە كوشە-اۋلالاردى جارىقتاندىرۋ» جوباسىن الدى. بۇل جوبالار وبلىستىق بيۋدجەت ەسەبىنەن سالىنادى. وبلىستىق كونكۋرسقا قاتىسىپ, كوركەيتۋ-كوگالداندىرۋ شارالارىنا ۇلەس قوسقان بىرقاتار ازاماتتار دا ماراپاتتالدى.
