كۇزگى-قىسقى كەزەڭگە دايىندىق اياسىندا جەو-1 جانە جەو-2-دە بىرقاتار قازاندىقتار مەن تۋربينالاردى جوندەۋ جۇمىسى جوسپارلانعان. جۇمىستىڭ ءبىر بولىگى ورىندالعان. سونداي-اق جەو-1 جانە جەو-2 اۋماعىندا گازبەن جابدىقتاۋدىڭ سىرتقى جەلىلەرى سالىنىپ, جەو-1-دەگى بارلىق 10 قازاندىق اگرەگاتى مەن جەو-2-دەگى سۋ جىلىتۋ قازاندىقتارى قايتا جاڭارتىلدى.
قازاندىقتاردى قايتا قۇرۋدىڭ باستى بولىگى – تابيعي گازدى نەمەسە كومىردى/مازۋتتى جاعۋعا ارنالعان جانعىش قۇرىلعىلاردى اۋىستىرۋ.
سونداي-اق «استانا-ەنەرگيا» اق نىساندارىن ارالاۋ بارىسىندا پرەمەر-ءمينيستردىڭ ءبىرىنشى ورىنباسارى مەن استانا اكىمى جابدىقتاردىڭ توزۋىن ازايتۋ, ەلوردانى سەنىمدى ەنەرگيامەن جابدىقتاۋدى قامتاماسىز ەتۋ, سونداي-اق قورشاعان ورتاعا كەرى اسەردى بارىنشا ازايتۋعا باعىتتالعان جاڭا تەحنولوگيالاردى ەنگىزۋ ءۇشىن ىسكە اسىرۋ جوسپارلانىپ وتىرعان پەرسپەكتيۆالى جوبالارمەن تانىستى.
ەلوردا اكىمى جەڭىس قاسىمبەك قالانى قوسىمشا جىلۋمەن قامتاماسىز ەتۋ ءۇشىن «تۇران» جانە «وڭتۇستىك-شىعىس» ەكى گاز جىلۋ ستانساسىنىڭ قۇرىلىسى جۇرگىزىلىپ جاتقانىن اتاپ ءوتتى. ولاردىڭ قۋاتى قۇرىلىسى ۇزاققا سوزىلعان جەو-3 قۋاتىنان اسىپ تۇسەدى. وسى گاز جىلۋ ستانسالارىن الداعى جىلىتۋ ماۋسىمىندا كەزەڭ-كەزەڭىمەن ىسكە قوسۋ جوسپارلانىپ وتىر.
نىسانداردى ارالاۋ بارىسىندا پرەمەر-ءمينيستردىڭ ءبىرىنشى ورىنباسارى مەن استانا اكىمى جاڭا سورعى-سۇزگى ستانساسىنىڭ (سسس-3) جۇمىسىمەن تانىستى. ماۋسىم ايىندا سسس-3 جۇمىسىنىڭ ءبىرىنشى كەزەڭى ىسكە قوسىلدى, سونداي-اق استانا سۋ قويماسىنان سۋ تارتقىشتىڭ جاڭا تارماعىنىڭ قۇرىلىسى اياقتالدى. بۇل قالاداعى سۋمەن جابدىقتاۋ ماسەلەلەرىن شەشۋگە مۇمكىندىك بەردى.
سسس-3 ەكىنشى كەزەڭىن وسى جىلدىڭ تامىز ايىندا اياقتاۋ جوسپارلانىپ وتىر. بۇدان باسقا نۇرا جەراستى سۋ كەن ورنىنان سۋ قۇبىرىن جوبالاۋ جانە تەلمان ەلدى مەكەنىندە سسس قۋاتىن كەڭەيتۋ بويىنشا جوبالاۋ اياقتالىپ قالدى. بۇل جوبالار قالانى ودان ءارى دە اۋىز سۋمەن قامتاماسىز ەتۋ ءۇشىن قوسىمشا مۇمكىندىك بەرەدى.
