سول جىلدارى قاقپاشى قۇرالبەك ورداباەۆ پەن قورعاۋشى سەيىلدا بايشاقوۆ اپتا سايىن ميلليونداعان كورەرمەننىڭ كوز الدىندا ويقاستاپ جۇرەتىن. ول كەزدە الماتىنىڭ وزىندە قازاق بالاسى تىم سەلدىر. اۋىلدان كەلگەن, ياعني قانىنا تارتاتىن باۋىرلاردىڭ كوپشىلىگى كسرو جوعارى توبىنداعى «قايراتتىڭ» ويىندارىنا سەيىلدا مەن قۇرالبەك اعالاردى كورۋ ءۇشىن باراتىن. ورتالىق ستاديوننىڭ كۇنباتىس بەتىندەگى تۋننەلدەن سەيىلدا مەن قۇرالبەك اعالاردىڭ توبەسى كورىنگەننەن مىڭداعان تىلەۋلەستەر مويىندارىن سوزا گۋىلدەسىپ, دۋىلداسا جونەلەتىن. ال ەكى اعامىز جاي باسىپ, جوعارى ورلەگەن كەزدە مىڭ شاقىرىم اۋىلدان ارتىنىپ-تارتىنىپ اكەمىز كەلىپ جەتكەندەي ءماز-مەيرام بولۋشى ەدىك.
«جان تارتپايدى, قان تارتادى» دەمەكشى, سەيىلدا بايشاقوۆ الاڭعا «قايراتتىڭ» كاپيتاندىق «پوۆيازكاسىن» تاعىپ شىققاندا جالىمىز كۇدىرەيىپ, قانىمىز ىسىپ شىعا كەلەتىن. سەيىلدانىڭ قيمىلى ءوزىنىڭ مىنەزى ءتارىزدى ورنىقتى, تياناقتى. كەيبىرەۋلەر ءتارىزدى ۇشقالاقتانىپ, ساسقالاقتاعانىن كورگەن ەمەسپىز. قاشان كورسەڭ اياقتى ەركىن تاستاپ, قاراعايداي بويىمەن انادايدان كوز تارتادى. قارسى جاقتىڭ وقتاي زۋلاعان, قىرىق ايلالى شابۋىلشىلارى ءۇشىن بايشاقوۆ ناعىز اسۋ بەرمەس, تاسقامال قورعانىستىڭ ءوزى بولاتىن. «سەيىلدا قارسىلاستىڭ كەز كەلگەن شابۋىلشىسىن تۇساي بىلەتىن, – دەيدى قۇرالبەك اعامىز. – زەرەك, العىر سپورتشى. ەسەپپەن, جۇيەلى ويناعاندى ۇناتادى. كوپ سوزگە جوق. سابىرلى. كومانداداعى ەڭ ابىرويلى, ەڭ سەنىمدى فۋتبولشىنىڭ ءبىرى رەتىندە ۇزاق ۋاقىت كوماندانىڭ كاپيتانى ءارى سەركەسى بولدى».
ءيا, قازاق فۋتبولشىلارىنان ەڭ العاشقى بولىپ كسرو قۇراماسىندا ويناعان دا وسى بايشاقوۆ ەدى. قىرسىققاندا, 1977 جىلى كسرو قۇراماسى بايشاقوۆ قاتىسقان ەكى باسەكەدە ماجارستان مەن گرەكيادان ۇتىلىپ قالىپ, ءارى قاراي اعامىزدى ۇلتتىق قۇراماعا شاقىرمادى. ءادىلىن ايتساق, سەيىلدا بايشاقوۆ سول تۇستا كەڭەس قۇراماسىنداعى قورعاۋشىلاردىڭ قاي-قايسىسىنان دا كەم سوققان جوق. بىراق ماسكەۋدەگى فۋتبول قوجايىندارىنىڭ سىرت كوزدەن تاسا ءوز مۇددەسى, ءوز ساياساتى بولدى.
حالقىمىزدىڭ تۇڭعىش كاسىبي فۋتبولشىسى تيمۋر سەگىزباەۆتان كەيىن «قازاق دوپ تەبە المايدى», دەگەن تۇتاس ءبىر ۇلتتى قورلاۋعا باعىتتالعان سىڭارجاق, تاياز, كەرتارتپا پىكىردى تەرىسكە شىعارعان ايبوز ۇلدىڭ ءبىرى ءارى بىرەگەيى – وسى سەيىلدا يكرام ۇلى ەدى. بايشاقوۆ «قايراتتىڭ» ساپىندا 296 رەت الاڭعا شىعىپ, قارسى قاقپاعا 11 دوپ ەنگىزدى.
سوناۋ بودان زاماندا, تار كەزەڭدە قازاعىنىڭ الا دوپتاعى نامىسىن اۋەلەتە كوتەرگەن سەيىلدا اعا دا ماڭگىلىك مەكەنىنە اتتاندى. كاتەپتى قارا كەمەدەي ورنىقتى ازاماتتىڭ جانى ءجانناتتا بولۋىنا تىلەكتەسپىز. بايشاق اۋلەتىنە اللا سابىر بەرسىن!
قازاق سپورتى ءالى تالاي سەيىلدا ءىزباسارلارىن الىپ كەلەتىنىنە سەنەمىز
قىدىربەك رىسبەك,
سپورت ءجۋرناليسى
