استانا قالاسىنىڭ اكىمدىگى قولداعان بايقاۋدىڭ ماراپاتتاۋ راسىمىنە مەملەكەت جانە قوعام قايراتكەرلەرى, قالامگەرلەر, زيالى قاۋىم, بەلدى جۋرناليستەر جانە مەدياساراپشىلار كەلدى. سالتاناتتى جيىندا استانا قالاسى اكىمىنىڭ ورىنباسارى ەسەت بايكەن باق وكىلدەرىن ەڭسەلى ەلوردانىڭ 25 جىلدىعىمەن قۇتتىقتادى.
– وسىدان 25 جىل بۇرىن اقمولادا نەبارى 20-عا شامالاس باق قۇرالى بولعان. قازىر 640-تان استام بۇراقالىق اقپارات قۇرالى ەلوردادان حابار تاراتىپ وتىر. تارقاتىپ ايتساق, 30-دان استام تەلەارنا, 490-نان استام باسىلىم جانە 137 ينتەرنەت باسىلىم تىركەلگەن. پرەزيدەنت قاسىم-جومارت توقاەۆ ءوز ءىسىنىڭ شەبەرلەرى, مايتالمان جۋرناليستەر ارقاشان قولداۋعا يە بولاتىنىن ايتقان ەدى. ءوزىمىز دە وسى سالاعا كوڭىل اۋدارۋدى ءبىر مىندەتىمىز دەپ تۇيدىك, – دەدى ە.بايكەن.
قالا باسشىلىعى بايقاۋدى ەلوردانىڭ تىنىس-تىرشىلىگى اشىلا ءتۇسسىن, قالا جايىندا تانىمدىق ماتەريالدار جاريالانسىن دەگەن نيەتتە ۇيىمداستىرعان. بايقاۋعا باس-اياعى 100-دەن استام ءوتىنىش تۇسكەن. ولاردى جۋرناليستيكا سالاسىنىڭ مايتالماندارىنان قۇرالعان قازىلار قۇرامى مۇقيات قاراعان, سارالاعان. قۋانتارلىعى, بايقاۋعا تەك استانالىق ارىپتەستەر عانا ەمەس, ءوڭىر جۋرناليستەرى دە قاتىسىپ, جۇلدەلى بولدى. جەڭىمپازداردى مەملەكەت جانە قوعام قايراتكەرى, ەلىمىزدىڭ تۇڭعىش اقپارات ءمينيسترى قۋانىش سۇلتانوۆ, قالا ءماسليحاتىنىڭ توراعاسى ەرلان كاناليموۆ, اقپارات جانە قوعامدىق دامۋ ۆيتسە-ءمينيسترى ەلدار تولعانباەۆ, «قازاق گازەتتەرى» جشس باس ديرەكتورى ديحان قامزابەك ۇلى, «حابار» اگەنتتىگى» اق باسقارما توراعاسى بەرىك ءۋالي, راديو جانە تەلەجۋرناليست قىمبات دوسجان ماراپاتتادى. سونىمەن «ۇزدىك جۋرناليست ساراپشى» اتالىمىندا ءبىرىنشى ورىندى «استانا اقشامى» گازەتىنەن گۇلشات سەرالى ەنشىلەسە, جۋرناليست ارنۇر اسقار ەكىنشى ورىن الدى. ءۇشىنشى ورىنعا «ۆەچەرنيايا استانا» گازەتىنىڭ ءتىلشىسى ماكسيم ۋدود لايىق دەپ تانىلدى. «ۇزدىك فوتورەپورتاج» اتالىمىندا شۇكىر شاحاي ءبىرىنشى, ۆلاديسلاۆ ۆودنەۆ ەكىنشى بولسا, ءۇشىنشى ورىندى «Egemen Qazaqstan» گازەتىنىڭ ءفوتوتىلشىسى ەرلان ومار مەن «استانا اقشامى» گازەتىنىڭ ءفوتوتىلشىسى سۇلتان سەيىت قانجىعالادى. بايقاۋدا «الەۋمەتتىك جەلىدەگى استانانانىڭ 25 جىلدىعى تۋرالى ۇزدىك ماتەريال», «ۇزدىك شولۋشى», «ۇزدىك راديورەپورتاج», «ۇزدىك تەلەسيۋجەت», «ۇزدىك مابيلوگراف» سىندى اتالىمدار بويىنشا دا جۇزدەن جۇيرىكتەر انىقتالدى. بايقاۋدا الدىنا قارا سالماي, ءبىرىنشى ورىن ەنشىلەگەندەر 1 ملن تەڭگە, ەكىنشى ورىن ولجالاعاندار 500 مىڭ تەڭگە جانە ءۇشىنشى ورىن العان سالا ساڭلاقتارى 300 مىڭ تەڭگە قارجىلاي سىياقى الدى.
