مەنىڭشە, زاڭ حالىقتىڭ مەملەكەتكە, بيلىككە سەنىمىن ارتتىرۋعا ءتيىس. سول سەبەپتى شەتەلگە زاڭسىز شىعارىلعان اكتيۆتەردى قايتارۋ ادىلەتتى قازاقستاندى قۇرۋدىڭ, ادىلەت ورناتۋدىڭ ۇلكەن قۇرالى دەپ ەسەپتەيمىن. دەپۋتاتتاردىڭ باستاماسىمەن بەس زاڭ ۇسىنىلدى. كۇنى كەشە كونستيتۋتسيالىق سوت ونى مۇقيات قاراستىرىپ, اتا زاڭىمىزعا قايشى كەلمەيتىنىن, تولىقتاي ساي ەكەنىن حابارلادى.
وسىلايشا, مەملەكەت باسشىسى قول قويعان كۇننەن باستاپ ۇلكەن جۇمىس باستالادى. ەڭ الدىمەن, ۇيىمداستىرۋ شارالارى قارالاتىنى ءسوزسىز. باس پروكۋراتۋرا جانىنان ارنايى مەملەكەتتىك ورگان قۇرىلادى, وعان 125-كە جۋىق ءتۇرلى سالاداعى مامان تارتىلادى. ولار حالىقارالىق زاڭنامانى بىلەتىن, شەتەلدىك زاڭ سالاسىنان حاباردار حالىقارالىق ماماندار, ساراپشىلار, زاڭگەرلەر, ەكونوميستەردەن قۇرالماق. بۇدان بولەك, ۇكىمەتتىڭ قاۋلىسىمەن قۇرىلاتىن مەملەكەتتىك كوميسسياعا قوعام قايراتكەرلەرى, پارلامەنت دەپۋتاتتارى, كۇشتىك قۇرىلىمدىق ورگانداردىڭ باسشىلارى ەنەدى دەپ جوسپارلانعان.
كوميسسيا تۇراقتى تۇردە جۇمىسىن اتقارىپ, مەملەكەتتىك مەكەمەمەن ەتەنە جۇمىس ىستەمەك. تاپقان قۇجاتتارىن, دەرەكتەرىن, ءتىزىمىن ۇسىنىپ, زاڭسىز شىعارىلعان اكتيۆتەردى انىقتاۋعا بەلسەندى تۇردە ارالاسادى.
قازىرگى تاڭدا ەلىمىز كوپتەگەن حالىقارالىق مىندەتتەمەنى ورىندادى. قارجىنى قايتارۋ, جەمقورلىققا قارسى كۇرەس جونىندەگى حالىقارالىق قۇجاتتاردىڭ مۇشەسىمىز. وسىنىڭ بارلىعى بەس زاڭدى قابىلداۋدا نەگىزگە الىندى. ەندى زاڭدى جۇزەگە اسىرۋ مەملەكەتتىڭ, كۇشتىك قۇرىلىمداردىڭ ءوز ىسىنە جاۋاپكەرشىلىكپەن قاراۋ ماسەلەسىنە اينالادى. زاڭ ىسكە اسىپ, كەزىندە شەتەلگە زاڭسىز شىعارىلعان قارجىلار مەن اكتيۆتەر قايتسا, مول قاراجات ەلدىڭ يگىلىگىنە جۇمسالسا, ادىلەتتى قازاقستاننىڭ العىشارتتارى جاسالعانىنا حالىقتىڭ كوزى جەتەدى.
ايدوس سارىم,
ءماجىلىس دەپۋتاتى
