زاڭنىڭ ادىلەتتى قازاقستاندى قالىپتاستىرۋ جولىنداعى بىرنەشە پايدالى تۇسى بار. بىرىنشىدەن, قۇجات الەۋمەتتىك ادىلدىكتى ورناتادى. اسىرەسە جوعارى لاۋازىمدى تۇلعالار, قولىندا بيلىگى بار باسشىلار مەملەكەتكە تيەسىلى نارسەنىڭ تەك حالىق يگىلىگى ءۇشىن عانا جۇمىس ىستەۋى كەرەك ەكەنىن تۇسىنەدى. ەكىنشىدەن, شەتەلگە زاڭسىز شىعارىلعان قارجىنىڭ ءبارى قايتارىلعان سوڭ, ەلدىڭ الەۋمەتتىك-ەكونوميكالىق دامۋىنا جۇمسالادى. ول ءاۋ باستان-اق وسى باعىتتا جۇمىس ىستەيتىن قاراجات ەدى. بىراق زاڭدى بەلشەسىنەن باسقانداردىڭ كەسىرىنەن قولدى بولدى. ەندى ادىلدىك ورنايتىن ۋاقىت جەتتى.
ەلگە قايتارىلعان اكتيۆتەردىڭ حالىقتىڭ الەۋمەتتىك جاعدايىن جاقسارتۋعا جۇمسالۋىن قاداعالايتىن ارنايى كوميسسيا قۇرىلماق. ال باس پروكۋراتۋرا جانىنداعى اكتيۆتەردى قايتارۋ جونىندەگى كوميسسيا بۇرىنعىداي وسى ىستە زاڭدىلىقتىڭ ساقتالۋىن قاداعالايدى.
مەنىڭ ويىمشا, الداعى ۋاقىتتا ءاربىر ادام مەملەكەتتىك قىزمەتكە بارعان سوڭ, ونى بايۋدىڭ مۇمكىندىگى, وزىنە تيەسىلى ەمەس نارسەنى زاڭسىز جىمقىرۋدىڭ جولى دەگەن ويدان تولىقتاي ارىلۋعا ءتيىس. قابىلدانىپ وتىرعان زاڭ دا وسىنداي كەلەڭسىزدىكتەرگە جول بەرمەۋدى كوزدەيدى. ونىڭ تاعى ءبىر ارتىقشىلىعى – زاڭسىز اكتيۆتەردى قايتارۋدىڭ نەگىزگى تەتىگى رەتىندە ازاماتتىق تاركىلەۋ ينستيتۋتىنىڭ ەنگىزىلۋى. ول قولدانىستاعى قىلمىستىق جانە اكىمشىلىك تاركىلەۋ نورماتيۆتەرىنە قوسىمشا ەنگىزىلىپ وتىر. ونىڭ ماقساتى – ەگەر مەملەكەت مۇلكىن زاڭسىز يەلەنگەندەر تىزىمىنە ەنسە, ونى زاڭدى جولمەن العانىن دالەلدەۋى كەرەك. بۇل تالاپتىڭ مەرزىمى ءوتىپ كەتپەيدى. مەيلى قاي ۋاقىتتا الىنعان دۇنيە بولسا دا, دالەلدەۋ مىندەت. ونى جاساي الماي ما, مەملەكەتكە كەرى قايتارادى. ازاماتتىق تاركىلەۋ قىلمىستىق تاركىلەۋدى الماستىرمايتىنىن ايتا كەتۋ كەرەك. ەكەۋى قاتار جۇرەدى. بۇل تاجىريبە انگليا, اقش سەكىلدى ەلدەردە تيىمدىلىگىن كورسەتكەن.
ماگەررام ماگەرراموۆ,
ءماجىلىس دەپۋتاتى
