ونلاين-پلاتفورما يەلەرىنىڭ جاۋاپكەرشىلىگى

زاڭدا مىناداي ەكى ۇعىم بەل­گى­لەن­گەن. ءبىرىنشىسى – ونلاين-پلاتفورمانى جالپى پايدالانۋشى, ياعني قاراپايىم پايدالانۋشىلار. ەكىنشىسى, ينفليۋەنسەر (بلوگەر) – ونلاين-پلاتفورمانى كاسىپ­كەر­لىك قىزمەت ماقساتىمەن پايدالاناتىن تۇلعا.

بۇل جەردە اتاپ وتەتىن ماسەلە, زاڭنىڭ نەگىزگى ماقساتى – ونلاين-پلاتفورمالاردا ءوز ويىن جا­زاتىن تۇلعاعا ەركىندىك بەرۋ. سونداي-اق ازاماتتاردىڭ ونلاين كەڭىستىكتەگى قۇقىقتارىن قامتا­ما­سىز ەتۋ. تيىسىنشە, ينفليۋەنسەر نەمەسە بلوگەر ءوز جۇمىسىن كاسىپ­كەرلىك تۇرعىدا پايدالاناتىن بولعاندىقتان, قوسىمشا مىندەتتەمەلەر جۇكتەلۋى قاجەت.

سوڭعى كەزدەرى ونلاين-پلاتفورمانى پايدالانۋشىلاردىڭ جاريالانىمدارى جويىلىپ, اككاۋنت­تار بۇعاتتالاتىن جاعداي ءجيى كەزدەسەدى. ءتىپتى ول ءۇشىن ناقتى, دالەلدى جاۋاپ بەرىلمەيدى. ونىڭ باستى سەبەبى – ونلاين-پلاتفورمالارمەن ءوزارا بايلانىستىڭ قاراپايىم مەحانيزمىنىڭ بولماۋى.

قۇجاتتا كوزدەلگەن نورمالار قولدانىسقا ەنگىزىلگەن جاع­داي­دا حالىقتىڭ ونلاين-پلاتفورمالار اكىمشىلىگىنە تىكەلەي جۇ­گىنۋ جانە ءوز قۇقىقتارىن قال­پىنا كەلتىرۋ تەتىگىن بەلگىلەۋ جوس­پارلانعان. وسى ماقساتتا اقپارات جانە قوعامدىق دامۋ مينيسترلىگى ونلاين-پلاتفورمالار اكىمشىلەرىمەن كەلىسسوزدەر جۇرگىزىپ جاتىر. جاقىندا عانا «TikTok» الەۋمەتتىك جەلىسى وكىل­دەرىمەن كەزدەسىپ, الداعى بىرلەس­كەن جۇمىس پىسىقتالدى.

قازاق تىلىندەگى كونتەنتتى مودەراتسيالاۋ جانە مونەتيزاتسيالاۋ, ينتەرفەيستى قازاق تىلىنە اۋدارۋ ماسەلەلەرى دە بار. ياعني ونلاين-پلاتفورمالار ينتەرفەيستى قازاق تىلىندە پايدالانۋعا جول بەرمەيدى, ءتىپتى پايدالانۋشى كەلىسىمىمەن تانىسۋعا مۇمكىندىك جوق. وسى ورايدا, زاڭ اياسىندا ينتەرنەت-جارناما سالاسىن ەكونوميكالىق تۇرعىدان قاراستىرۋ كوزدەلگەن. بۇل جەردە ونلاين-پلاتفورمالاردى پايدالانۋشىلاردىڭ جارنامانى تاڭبالاۋى, ونلاين-پلاتفورماداعى ەكونوميكالىق قىزمەتتى رەتتەۋ جۇمىستارى مەن مازمۇنعا قويىلاتىن تالاپتار بار.

جالپى, حالىقارالىق تاجىري­بەدە ونلاين سالاسىنىڭ جۇ­مى­سى زاڭدىق تۇرعىدان رەتتەلگەن. ماسەلەن, گەرمانيادا NetzDZ اتالاتىن قۇجاتتا زاڭسىز كونتەنتتى مودەراتسيالاۋ جانە ەل اۋما­عىندا شەكتەۋ تۋرالى تالاپ قاراس­تى­رىل­عان. وتكەن جىلى ەۋرو­پا­لىق وداقتا قابىلدانعان Digital Services act مودەراتسيا, وكىلدىك اشۋ جانە مەملەكەتتىك ورگاندارمەن بىر­لەسە جۇمىس ىستەۋدى مىندەتتەيدى.

قاينار احەتوۆ,

اقپارات جانە قوعامدىق دامۋ مينيسترلىگى

باق سالاسىنداعى مەملەكەتتىك ساياسات دەپارتامەنتىنىڭ ديرەكتورى