زامان تالابىنا ساي, قازىر قوعامنىڭ سۇرانىسى كۇشەيدى. حالىق بيلىكتەن بەرگەن ۋادەلەرىنىڭ ۋاقىتىندا ءارى ساپالى ورىندالۋىن, رەفورمالاردىڭ ناقتى ناتيجەسىن تاعاتسىزدانا كۇتىپ وتىر. راسىندا, رەفورمالاردىڭ ناتيجەسىن كورمەك كەرەك, اسەرىن سەزبەك كەرەك. سوندا عانا حالىقتىڭ بيلىككە سەنىمى كۇشەيەدى. وسى تۇستا ەلگە جەتەتىن اقپاراتتىڭ ناقتى ءارى سەنىمدىلىگى ۇلكەن ءرول اتقارادى. كەيىنگى ۋاقىتتا الەۋمەتتىك جەلىلەر نەگىزگى اقپارات كوزى مەن قوعامدىق-ساياسي باعىتتى قالىپتاستىراتىن پلاتفورماعا اينالدى. الەمدە الەۋمەتتىك جەلى ارقىلى جاڭالىقپەن تانىسۋ 30 پايىزعا ۇلعايعانىن كورىپ وتىرمىز. ەۋروپا ەلدەرى بۇل باعىتتا تيەسىلى زاڭدارىن الدەقاشان قابىلدادى. مەملەكەتتىك مۇددە مەن اقپارات قۇرالدارى بىتە قايناسىپ جاتقان ۇعىم. ەۋروپاداعى دەموكراتيالىق جۇيەنىڭ دە مىزعىماستىعىنىڭ كۇندەلىكتى ساقشىلارى – جۋرناليستەر قاۋىمى.
الەمدىك زايىرلى قوعام تاريحىنا ۇڭىلسەك, ەڭ الدىمەن, ەلدىڭ كوركەيۋى ءسوز قادىرىن باعالاۋدان باستالادى ەكەن. فرانتسيا مەن ۇلىبريتانيانى الايىق. وسى الىپ ەكى مەملەكەتتىڭ مىڭجىلدىق ادامى بولىپ ناپولەون بوناپارت پەن ۋينستون چەرچيلل تانىلعان. ەكەۋى دە ءومىر جولىن جۋرناليستيكادان باستاعان. بارلىق رەفورماسىن اقپارات قۇرالدارىنا سۇيەنىپ, سولاردىڭ قولداۋىمەن جۇزەگە اسىرعان. ناپولەوننىڭ «ازاماتتىق كودەكسىن» بۇگىنگى كۇنگە دەيىن قولدانىستا بولۋى ءسوز بەن ءىستىڭ بىرىزدىلىگىنەن.
«ادىلەتتى قازاقستاندى قۇرۋ مينيسترلەر مەن اكىمدەردىڭ عانا مىندەتى ەمەس. وعان بۇكىل قوعام بولىپ جۇمىلۋىمىز كەرەك. ال تۇپكى ماقساتىمىزعا جەتۋ ءۇشىن ساياسي-ەكونوميكالىق رەفورما جاساۋ جەتكىلىكسىز. باستىسى, ءار ازاماتتىڭ سانا-سەزىمى جاڭعىرۋى قاجەت. حالقىمىزدىڭ دۇنيەتانىمى جانە ومىرلىك ۇستانىمدارى وزگەرۋگە ءتيىس. ايتپەسە, باسقا رەفورمانىڭ ءبارى بەكەر. ءبىر سوزبەن ايتساق, پيعىل وزگەرمەسە, ەشتەڭە دە وزگەرمەيدى». بۇل – مەملەكەت باسشىسى قاسىم-جومارت توقاەۆتىڭ تۇركىستاندا وتكەن ۇلتتىق قۇرىلتايدا ايتقان ءسوزى.
پرەزيدەنت «ونلاين-پلاتفورمالار جانە ونلاين-جارنامالار تۋرالى» زاڭعا قول قويدى. بۇل زاڭ ومىرىمىزگە ۇلكەن وڭ وزگەرىستەر ەنگىزەدى. جالپى, بۇل قۇجات ءبىرىنشى كەزەكتە ازاماتتاردىڭ قۇقىعىن قورعاۋعا, ونلاين ورتانى قاۋىپسىز جانە اشىق تۇردە دامىتۋعا باعىتتالعان. قازاق – ءسوز قادىرىن بىلەتىن, ورىندى سوزگە توقتاپ, «ات-شاپان ايىبىم» دەپ كادە جاسايتىن حالىق. اتا داستۇرمەن ونلاينداعى ءسوزىمىزدى تۇزەسەك, ناقتى ومىردەگى ءىسىمىز دە العا باسادى.
ماحات سادىق,
جۋرناليست
