ونلاين-پلاتفورما تۋرالى زاڭ ۋاقىتىلى قابىلدانىپ وتىر. قازىرگى تاڭدا ەۋروپانىڭ كوپتەگەن ەلىندە مۇنداي قۇجات قابىلدانعان. جارنامالىق جاعى رەتتەلگەن. وسى زاڭدى ءبىراز بۇرىن قابىلداۋىمىز قاجەت ەدى, بىراق «ەشتەن – كەش جاقسى».
ويتكەنى الەۋمەتتىك جەلىنىڭ قارىشتاپ دامۋىمەن قاتار, ينفليۋەنسەر, بلوگەر سەكىلدى جاڭا ماماندىقتار پايدا بولدى. ولار جارناما ارقىلى پايدا تاۋىپ وتىر. بىراق جەكە كىرىسىنەن قازىناعا سالىق تولەمەيدى. وعان قوسا, وقىرماندارىنا انىق-قانىعى بەلگىسىز كوپ اقپارات تاراتادى دا, ەشقانداي جاۋاپكەرشىلىك جۇكتەمەيدى. كىرىسى جۋرناليستەردەن الدەقايدا كوپ. مىسالى, ءتۇرلى پوست جازادى, جارنامامەن اينالىسادى.
جاڭا زاڭعا سايكەس, مۇنداي بلوگەرلەر جارناما جاساعان كەزدە بۇقارالىق اقپارات قۇرالدارىنداعىداي ارنايى بەلگى قويۋعا ءتيىس. ونىڭ قانداي بولاتىنى مينيسترلىك ازىرلەيتىن نورماتيۆتىك-قۇقىقتىق اكتىدە كورسەتىلەدى.
بۇدان بولەك, ونلاين-پلاتفورما ارقىلى الاياقتارعا جەم بولىپ جاتقان ادامدار وتە كوپ. ياعني تانىمال ادامدارعا جارناما جاساتۋ ارقىلى قاراپايىم تۇرعىنداردى سان سوقتىرىپ كەتەدى. سوندىقتان بۇل ماسەلەنى رەتتەيتىن كەز كەلدى. وسى تۇرعىدان العاندا دا زاڭنىڭ قابىلدانۋى وتە ماڭىزدى.
سونداي-اق قىلمىستىق كودەكسكە, اكىمشىلىك كودەكسكە زاڭدىق تۇرعىدا جاۋاپكەرشىلىگىن قاراۋعا بايلانىستى وزگەرىستەر ەنگىزىلدى. بىرەۋدى قورقىتىپ, ۇركىتىپ جازۋ, جالعان اقپارات تاراتۋ ماسەلەلەرى دە قارالادى.
ونلاين-پلاتفورمالاردىڭ باسىم بولىگى – شەتەلدىك سۋبەكتىلەر. ولار ەندىگى جەردە مىندەتتى تۇردە قازاقستاندا وكىلدىگىن اشۋى قاجەت. بۇل مەكەمە ەلىمىزدەگى ۋاكىلەتتى ورگانعا ءار توقسان سايىن اقپارات بەرىپ وتىرۋعا ءتيىس. كەيدە جالعان اقپاراتتى وشىرۋگە نۇسقاۋلىق بەرىلسە, ونى ورىنداۋى كەرەك. ياعني ونلاين-پلاتفورما يەلەرىنىڭ مىندەتتەمەلەرى كۇشەيتىلدى. قىسقاسى, بۇل زاڭ قوعامعا وتە قاجەت.
ايگۇل قاپباروۆا,
سەنات دەپۋتاتى
