دەپۋتاتتار اقسۋ قالاسىنىڭ اۋىلدىق ايماعىنا كىرەتىن پوگرانيچنيك اۋىلىنا ساپارى بارىسىندا ەكى پروبلەمالىق نىساندار - فەلدشەرلىك امبۋلاتوريا مەن دەنە شىنىقتىرۋ-ساۋىقتىرۋ كەشەنىن ارالادى. قازىردىڭ وزىندە ولاردىڭ قۇرىلىسى بەكىتىلگەن كەستەدەن اقساپ تۇر. ءبىرىنشى نىساننىڭ مەردىگەرى ونىڭ مەرزىمىندە ىسكە قوسىلاتىنىنا سەندىرەدى. دەگەنمەن, جۇمىس كولەمى ارتۋى مۇمكىن, ويتكەنى, دەپۋتاتتاردىڭ ايتۋىنشا, جوبانى تۇزەتۋ قاجەت.
«فەلدشەرلىك امبۋلاتوريا اۋماعىن اباتتاندىرۋ تولىعىمەن قامتىلۋى ءتيىس. جوبانى وسى كەزەڭدە قايتا قاراۋ كەرەك دەپ ەسەپتەيمىز», دەدى امانتاي جارقىنبەك.
نۇرجان اشىمبەتوۆ تاعى ءبىر نىسان – دەنە شىنىقتىرۋ-ساۋىقتىرۋ كەشەنىنىڭ مەردىگەرى قۇرىلىس الاڭىندا مۇلدە جوق ەكەنىن اتاپ ءوتتى.
«مەردىگەر – «گرادستروي» كومپانياسى وبلىستاعى الەۋمەتتىك نىسانداردى سالۋ جانە جوندەۋ بويىنشا كوپتەگەن تەندەرلەردى ۇتىپ الىپ, بىلتىردان بەرى جەرگىلىكتى مەملەكەتتىك ورگاندارمەن سوتتاسىپ كەلەدى. بۇل رەتتە مەردىگەر ۇيىمنىڭ ءوزى ورنىندا جوق. بارلىق جۇمىس قوسالقى مەردىگەرلەرگە بەرىلدى», دەدى دەپۋتات.
سونىمەن قاتار دەپۋتاتتار اقسۋ قالاسىنداعى ماگيسترالدىق جانە تاراتۋشى جىلۋ جەلىلەرىن قايتا جاڭعىرتۋ جۇمىستارىنىڭ بارىسىمەن تانىستى. مۇنداعى جۇمىستار كەستەگە ساي جۇرگىزىلىپ جاتىر. سونىمەن قاتار №7 مەكتەپتە جىلۋ, ەلەكتر جانە كارىز جۇيەلەرىنە, قابىرعالارىنا, توبەلەرىنە, ەدەندەرىنە كۇردەلى جوندەۋ جۇمىستارى جۇرگىزىلىپ جاتىر.
ماجىلىسمەندەر «جۇمىسپەن قامتۋدىڭ جول كارتاسى» اياسىندا قۇرىلىسى 2021 جىلى باستالعانىمەن, بۇگىندە ىرگەتاسى عانا قۇيىلعان, قۇرىلىسى ءجۇرىپ جاتقان مۇز سارايىندا دا بولدى.
«اقشا ءبولىندى, مۇز ايدىنىن سالۋعا مەردىگەر كومپانيا ۇتىس ويىنى ويناتىلدى. بىراق جەرگىلىكتى بيلىك نىساندى اسا قاجەت ەمەس دەپ تاۋىپ, قۇرىلىس توقتاتىلدى. قازىر بۇل نىساندى جەكە باقىلاۋىما الدىم», دەيدى نۇرجان اشىمبەتوۆ.
ساپار سوڭىندا دەپۋتاتتار ازاماتتاردى قابىلدادى. تۇرعىندار جايىلىمدىق, شابىندىق جەرلەرگە قاتىستى ساۋالدارىن قويدى.
