بۇل جولى اقپاراتتىق-ناسيحات توبىمەن بىرگە زاپاستاعى پولكوۆنيك ايدار ورازباەۆ جانە شقو پوليتسيا دەپارتامەنتى باستىعىنىڭ ورىنباسارى پوليتسيا پولكوۆنيگى مەدەت بەردىمۇراتوۆ بولدى.
اسكەردىڭ باس تاربيەشىسى قاريالاردىڭ ءحال-جاعدايىمەن تانىسىپ, استانا كۇنى مەرەكەسىمەن قۇتتىقتادى.
ء«بىز سىزدەرگە بىلتىر دا كەلگەنبىز. بيىل دا وسكەمەندە اقپاراتتىق-ناسيحات توبىنىڭ جۇمىسى جالعاسۋدا. كەشە ۇلتتىق ۇلان ءان-بي ءانساملىنىڭ قاتىسۋىمەن 5518 اسكەري بولىمىندە ءبىرىنشى كونتسەرتىمىزدى وتكىزدىك. ال بۇگىن سىزدەرگە استانا كۇنى مەرەيتويى قارساڭىندا مەرەكەلىك كوڭىل-كۇي سىيلاپ كەتۋدى ءجون كوردىك. سىزدەرمەن بايلانىسىمىز ۇزىلمەيدى», دەدى قايرات جارىلعاسىن ۇلى.
سونداي-اق گەنەرال-مايور قايرات ۇمبەتوۆ شىعىس قازاقستان وبلىسى جۇمىسپەن قامتۋ جانە الەۋمەتتىك باعدارلامالاردى ۇيلەستىرۋ باسقارماسىنىڭ «وسكەمەن ارنايى الەۋمەتتىك قىزمەت كورسەتۋ ورتالىعى» كوممۋنالدىق مەملەكەتتىك مەكەمەسىنە ارنايى اكەلگەن سىيلىعىن تارتۋ ەتتى.
«120 قارتتى باعىپ-قاعىپ وتىرعان ءبىزدىڭ مەكەمەمىزگە حالىق قاھارمانىنىڭ كەلۋى ۇلكەن مارتەبە. بىزگە قاراي اتباسىن بۇرعاندارىڭىزعا قۋانىشتىمىز. كەلگەن قادامدارىڭىز قۇتتى بولسىن! ءان-بي ءانسامبلىنىڭ قىز-جىگىتتەرىنە دە ايتار العىسىمىز ايرىقشا. ونەرلەرىڭىز ۇستەم بولسىن!», دەدى قارتتار ءۇيىنىڭ ديرەكتورى ەربولات وشاقباەۆ.
جىلى لەبىزگە تولى جۇزدەسۋ كونتسەرتتىك باعدارلامامەن جالعاستى. ساحنا شىمىلدىعى بارد ءانشى اسحات امىرعاليدىڭ ورىنداۋىنداعى «اق ماحاببات» انىمەن اشىلدى. كەلەسى كەزەكتە جىرشى ساكەن ءالىمحان «جەلدىرمە» تەرمەسىن ورىندادى. ال ءانشى ديحان يلياشەۆ «قازاق وسى» ءانىن شىرقادى. كورەرمەندەر حورمەن ايتىلعان اندەردى ۇيىپ تىڭدادى. ء«داۋىر» تريوسى اقساقالدار مەن اق جاۋلىقتى انالاردىڭ جاستىق شاعىنان سىر شەرتەتىن ەسكى اندەردى اۋەلەتتى.
ء«ارى اسكەري قىزمەتكەر, ءارى ءانشى قىز-جىگىتتەردىڭ ونەرىنە ءتانتى بولدىق. سوليست دەنيس ياكوۆلەۆ «قۇسني قورلان» ءانىن قازاق تىلىندە شىرقاعاندا كوزىمە جاس ۇيالادى. تالابى تاۋداي جاستارعا باسىمدى ءيىپ, وسىنداعى ۇلكەندەردىڭ اتىننان العىس ايتامىن. قىزمەتتە تابىستى بولىڭدار! جولدارىڭ اشىق, باقىتتى بولعايسىڭدار!», دەدى تۇرسىن قۋسانوۆا ەسىمدى زەينەتكەر.
وسىدان كەيىن ونەرپازدار قاريالاردى ورتاعا الىپ ەستەلىك سۋرەتكە ءتۇستى. كوپتى كورگەن ۇلكەندەر جاعى قوناقتارعا باتاسىن بەرىپ, العىسىن جاۋدىردى.
