قىلمىس پەن قۇقىق بۇزۋشىلىقتىڭ الدىن الۋدا بەينەباقىلاۋ كامەرالارىنىڭ كومەگى وتە زور. بۇل قۇرىلعىلار – جول ينفراقۇرىلىمىنىڭ باقىلاۋدا تۇرعانىن ەسكەرتەتىن بىردەن-ءبىر قۇرال. «ادامدار ءوز ءىس-ارەكەتتەرىنىڭ كامەراعا جازىلاتىنىن بىلگەن جاعدايدا زاڭعا ەرىكسىز باعىنادى. بۇل قىلمىستىڭ الدىن الىپ, قالا قاۋىپسىزدىگىنىڭ جاقسارۋىنا مۇرىندىق بولادى», دەيدى ماماندار.
بەينەباقىلاۋ كامەرالارى جىلدامدىقتى ارتتىرۋ, باعدارشامنىڭ قىزىل تۇسىنە ءوتۋ سەكىلدى بىرقاتار ەرەجە بۇزۋشىلىقتى دەر كەزىندە انىقتاي الادى. قالانىڭ باقىلاۋ اۋماعىندا اۆتوكولىك ترافيگىن تىركەۋگە جانە جىلدامدىق رەجىمىنىڭ بۇزىلۋ بەلگىلەرى مەن وقيعالاردى انىقتاۋعا ارنالعان 70 اپپاراتتىق-باعدارلامالىق كەشەن بار. سونداي-اق جول قيىلىسىنداعى باعدارشامنىڭ تىيىم سالۋ سيگنالىنا ءوتۋ مەن توقتاۋ سىزىعىنا شىعۋ ەرەجەلەرىن بۇزۋ وقيعالارىن انىقتاۋعا ارنالعان 16 كەشەن جۇمىس ىستەيدى.
باقىلاۋ كامەرالارى كولىك قوزعالىسى, قوزعالىس ءتارتىبى جانە جاياۋ جۇرگىنشىلەردىڭ ءجۇرىس-تۇرىسى تۋرالى دەرەكتەردى ۇلكەن كولەمدە جيناۋعا مۇمكىندىك بەرەدى. بۇل دەرەكتەردى قالالىق ينفراقۇرىلىمدى تالداۋ جانە جوسپارلاۋ ءۇشىن پايدالانۋعا بولادى. وسى ورايدا جاقىندا اباي, شاحتينسك قالالارى مەن شاحان, دولينكا جانە سەۆەرو-زاپادنىي كەنتتەرىندەگى بەينەباقىلاۋ كامەرالارى بىرىڭعاي قالالىق بەينەباقىلاۋ جۇيەسىنە بىرىكتىرىلدى. دەرەكتەرگە سۇيەنسەك, وبلىسقا قاراستى قالالاردا بيىلعى 5 ايدا جول-كولىك وقيعالارى سانى 2022 جىلعى سايكەس كەزەڭمەن سالىستىرعاندا 16,2 پايىزعا تومەندەگەن.
«جول بويىنداعى بەينەباقىلاۋ كامەرالارى قالالاردى قاۋىپسىز ورتاعا اينالدىرۋ ءۇشىن ماڭىزدى ءرول اتقارادى. بۇل قۇرىلعىلاردىڭ سانى مەيلىنشە ارتقان سايىن قۇقىق بۇزۋشىلىقتار قاتارى دا ازايا بەرمەك. بۇل ەل تۇرعىندارىنىڭ ءومىرى مەن دۇنيە-مۇلكىنىڭ اماندىعى ءۇشىن قاجەت دۇنيە», دەيدى جول ساقشىلارى.
