قوناقتارعا ارناپ كونتسەرتتىك باعدارلاما ۇيىمداستىرىلدى, ال انيماتورلار كىشكەنتاي بۇلدىرشىندەردىڭ كوڭىلىن كوتەردى.
«مۇنداي ءىس-شارالاردىڭ اشىق اسپان استىندا وتكەنى كەرەمەت. ءبىز جاقىن جەردە تۇرامىز. جالپى, ماعان ەلوردا كۇنى ۇنايدى, قالا كۇن ساناپ وزگەرۋدە, كوپتەگەن قىزىقتى ءىس-شارالارعا بارۋعا بولادى, دەگەنمەن بۇل ىلعي دا مۇمكىن ەمەس», دەپ ءبولىستى استانالىق الەكساندرا فەوكتيستوۆا.
ءىس-شارانىڭ ەرەكشەلىگى – كەز-كەلگەن ادام ءوز تىلەگىن بىلدىرە الاتىن العىس تاقتاسى قويىلعان. ۇيىمداستىرۋشىلاردىڭ ايتۋىنشا, بۇل تاقتايعا اتا-اناعا, بالالارىنا, جۇبايىنا, قالاعا, الەمگە «راقمەت» دەپ جازۋعا بولادى.
«ماعان استانامىزدىڭ بارىنشا كوركەيگەنى ۇنايدى. بۇگىن قالامىزدىڭ 25 جىلدىعى اتاپ ءوتىلىپ جاتىر. بۇل مەرەكە بالالار مەن ەرەسەكتەرگە ەرەكشە كوڭىل-كۇي سىيلايدى, ال جاعالاۋ ماڭايى ايتارلىقتاي وزگەردى», دەپ ارمان كەڭەسوۆ اسەرىمەن ءبولىستى.
سونداي-اق بايقوڭىر اۋدانىندا وتكەن ءىس-شارادا مەتسەناتتار الەۋمەتتىك وسال توپتاردىڭ بالالارىنا ماۋسىمدىق كيىم ساتىپ الۋعا سەرتيفيكاتتار تابىس ەتتى.
ايتا كەتەيىك, بيىل اقبۇلاق وزەنىنىڭ جاعاسىندا اممان كوشەسىنەن تاۋەلسىزدىك داڭعىلىنا دەيىن اسفالت توسەلدى, بالالار ويىن الاڭى مەن workout-ايماقتار, كوپىر استىنداعى جاياۋ جۇرگىنشىلەر وتكەلى جابدىقتالدى.
سونداي-اق مۇندا 25-تەن استام ورىندىق پەن قوقىس تاستايتىن جاشىكتەر, 20-دان استام جارىقتاندىرۋ تىرەگى ورناتىلىپ, 90-نان استام اعاش وتىرعىزىلدى.
