شومىلۋ ماۋسىمى باستالعالى بەرى سۋ ايدىندارىندا 49 ادام, ونىڭ ىشىندە 16 بالا قۇتقارىلدى. بۇل رەتتە جۇرگىزىلىپ جاتقان پروفيلاكتيكالىق جۇمىستارعا قاراماستان, شومىلۋ كەزەڭىنىڭ باسىنان 59 ادام سۋعا باتىپ كەتتى, ونىڭ ىشىندە 19 بالا بار. سۋعا باتقانداردىڭ كوبى الماتى, اقتوبە جانە اقمولا وبلىستارىندا تىركەلگەن.
قازاقستاندا شومىلۋ جانە دەمالۋ ءۇشىن پايدالاناتىن 50 مىڭنان استام سۋ ايدىنى بار. جىل باسىنان بەرى سۋدا 103 ادام قۇتقارىلدى, ونىڭ ىشىندە 43 بالا بولعان. دالىرەك ايتساق, 85 ادام تجم, 16 ادام كۋاگەرلەرمەن, 2 ادام پوليتسيا كۇشىمەن قۇتقارىلدى.
«بۇگىنگى كۇنى ەل بويىنشا 612 شومىلۋعا رۇقسات ەتىلگەن ورىن انىقتالدى, ونىڭ 167-ءسى كوممۋنالدىق جانە 445-ءسى جەكە جاعاجايلار. 3 757 ورىن شومىلۋعا تىيىم سالىنعان ورىندار دەپ تانىلدى. جىل باسىنان بەرى جەرگىلىكتى اتقارۋشى ورگاندار وسى ورىنداردا 2 808 تىيىم سالۋ بەلگىلەرىن ورناتتى, وسى باعىتتاعى جۇمىس جالعاسىپ جاتىر», دەلىنگەن قر تجم ءباسپاسوز قىزمەتى حابارلاماسىندا.
مينيسترلىك وكىلدەرىنىڭ مالىمەتىنشە, كۇندەلىكتى رەيدتەر بارىسىندا 2 702 بۇزۋشى اكىمشىلىك جاۋاپكەرشىلىككە تارتىلعان.
