قازنەتتە شاي توكسيندەرىن قالاي انىقتاۋ كەرەكتىگى بەينەلەنگەن روليك تاراپ ءجۇر. قۇرعاق قايناتپاعا ازداپ سۋ قۇيىلادى, سودان كەيىن ونى سارعىش-قوڭىر تۇسكە بويالعان قاعاز پاراعىنا ىسقىلايدى. اۆتور مۇنداي شاي دەنساۋلىققا قاۋىپتى ەكەنىن ايتىپ, ءتىپتى قاتەرلى ىسىك تۋدىرادى دەگەن قورىتىندى جاساعان.
بەينەجازبانىڭ سيپاتتاماسىنا قاراعاندا, شاي پاكىستاندا وندىرىلگەن جانە ونىڭ قۇرامىنان حيميالىق بوياعىشتار تابىلعان. ايتا كەتۋ كەرەك, قازاقستاندا پاكىستان شايىنىڭ كەيبىر ماركالارى كەدەن وداعىنىڭ تەحنيكالىق رەگلامەنتتەرىنىڭ تالاپتارىنا سايكەس كەلمەۋىنە بايلانىستى تىيىم سالىندى. سەبەبى ولاردىڭ قۇرامىنان سينتەتيكالىق بوياعىشتار تابىلعان. الايدا بەينەدە كورسەتىلگەن شاي تىيىم سالىنعان ونىمدەر تىزىمىندە بولماعان.
«ۆيدەوداعى شايدىڭ پاكىستانعا ەشقانداي قاتىسى جوق. ءىرى ماركەتپلەيستەردىڭ بىرىندە ءسىز ءونىمنىڭ قاپتاماسىنىڭ فوتوسۋرەتتەرىن ءارتۇرلى دۇكەندەردەن تابا الاسىز. ولاردىڭ بىرىندە كەنيادا شاي وندىرىلگەنى, ال قازاقستاندا, الماتى وبلىسى قاراساي اۋدانى كوكوزەك اۋىلىندا قاپتالعانى انىق كورىنەدى. سونداي-اق قاپتامادا شايدىڭ قۇرامى كورسەتىلگەن. وندا سينتەتيكالىق بوياعىشتار جوق. شايدىڭ وزىنەن باسقا, قۇرامىندا اپەلسين مەن گرەيپفرۋت بار», دەپ ءتۇسىندىردى Stopfake.kz.
ايتا كەتسەك, شايدىڭ بوياعىش قاسيەتتەرى قانداي دا ءبىر توكسيننىڭ بار ەكەنىن بىلدىرمەيدى. شاي قۇرامىندا كاروتين, تەافلاۆين جانە تەارۋبيگين بار, ولار قاعازدى جانە باسقا اق زاتتاردى بوياۋعا قابىلەتتى. سوڭعى ەكەۋى شاي جاپىراعىن اشىتۋ پروتسەسىندە پايدا بولادى. ولار التىن سارى جانە قىزىل-قوڭىر رەڭكتەر بەرەدى.
