مىسالى, ەكى عاسىرلىق تاريحى بار سەكەر سۇلۋ كەسەنەسى – سولاردىڭ ءبىرى. راس, بۇگىنگە دەيىن كۇمبەزى ساقتالماسا دا, قابىرعالارى ءالى دە قاسقايىپ تۇر.
جەرگىلىكتى ولكەتانۋشىلاردىڭ ايتۋىنشا, سەكەر سۇلۋ 1786 جىلى ويىلدا دۇنيەگە كەلگەن ەكەن. ونىڭ رۋى شەركەش-جاۋعاشتى. ول – بايسالى دەگەن مىڭعىرعان مالى بار بايدىڭ قىزى. اكەسى باي بولا تۇرا وتە مەيىرىمدى جان بولعان دەسەدى. مالىن ۇرلاعانداردى جازالاماي, وعان كوڭىل اۋدارماۋعا تىرىسىپتى. بايسالىنىڭ اقبۇلتىش پەن اقتومپىش دەگەن ەكى ايەلى بولعان. ءبىرىنشى ايەلىنەن بالا بولماعان. ال, ەكىنشىسىنەن سەكەر سۇلۋ تۋعان. ونى اكەسى ەركەلەتىپ ءوسىرىپتى. قىزى ءۇش جاسقا تولعاندا شەركەش-قوسىمنىڭ اقشولاق دەگەن بايى قۇدا تۇسۋگە كەلگەن.
ونىڭ ۇلى اقسەيىت ول كەزدە بەس جاستا بولىپتى. سەكەر سۇلۋ 15 جاسقا كەلگەندە ونى اقسەيىل الىپ كەتۋگە كەلەدى. قىز ۇزاتۋ تويى ونىڭ قازىرگى بەيىتى ورنالاسقان جەردە وتەدى. توي ءۇش كۇنگە سوزىلعان. ال, ءتورتىنشى كۇنى بايسالىنىڭ ءبىرىنشى ايەلى قورقىنىشتى ءتۇس كورەدى. تۇسىندە سەكەر ءبىر توپ اداممەن بىرگە كەتىپ بارا جاتىر ەكەن. ءبىر قىزىعى, ولاردىڭ ءبارى دە الدەقاشان ومىردەن ءوتىپ كەتكەن. بۇل ءتۇس تۋرالى سۇلۋدىڭ ءوزى بىلمەگەن. ءسويتىپ, تاڭەرتەڭ ويىل وزەنىنە بارادى. سۋعا شومىلعان سوڭ كيىنىپ جاتقاندا ونى جىلان شاعىپ الادى. ولەرىنىڭ الدىندا ءوزى ۇزاتىلعان جەرگە جەرلەۋىن سۇراپتى. سوڭىنان اقسەيىل دە «سەكەردەي سۇلۋ ەندى تۋار ما؟!» دەگەن وكىنىشپەن قايتىس بولادى.
بۇل تەك اڭىز عانا. ال, شىن مانىندە قالاي بولعانى ناقتى بەلگىسىز. بىراق ماحابباتتا جولى بولماعاندار ءالى دە بولسا وسىندا بارادى. ولار بۇل جەرگە سۇلۋ قايتىس بولعان 14 تامىز كۇنى بارۋعا تىرىسادى ەكەن.
