قازاقستان پولشاعا نەگىزىنەن شيكى مۇناي, تاس كومىر, تابيعي گاز, زىعىر تۇقىمدارى, تەمەكى ونىمدەرىن ساتسا, ءوزىمىز ول جاقتان ەسەپتەۋ ماشينالارى, بولشەك ساۋدا ءۇشىن ولشەپ ورالعان دارىلىك زاتتار, الما, المۇرت جانە ايۆا, تەلەفون اپپاراتتارى, تۇرمىستىق جانە وزگە دە توقپەن جىلىتۋ اسپاپتارى, ەلەكتر پليتالارىن اتتاي قالاپ الدىرامىز.
قازاقستاننىڭ ساۋدا جانە ينتەگراتسيا ۆيتسە-ءمينيسترى قايرات تورەباەۆتىڭ ايتۋىنشا, پولشا – قازاقستاننىڭ ورتالىق جانە شىعىس ەۋروپاداعى جەتەكشى سىرتقى ەكونوميكالىق سەرىكتەسىنىڭ ءبىرى.
«بيىلعى 4 ايدىڭ قورىتىندىسى بويىنشا ءبىز ساۋدا كولەمىنىڭ تومەندەگەنىن بايقايمىز. ىنتىماقتاستىقتى جانداندىرۋ ءۇشىن قازاقستان پولشا نارىعىنا 140 ملن دوللار سوماسىنا قوسىمشا 120 تاۋار پوزيتسياسىن ۇسىنۋعا دايىن. ەكسپورتتى مەملەكەتتىك قولداۋ شارالارىنىڭ جۇيەسى وسى ماقساتقا قول جەتكىزۋگە باعىتتالعان. بۇل – قارجىلىق ەمەس جانە قارجىلىق قولداۋدىڭ 20-دان استام قۇرالى. وتاندىق KazakhExport كومپانياسىنىڭ ساقتاندىرۋ قۇرالدارىن پايدالانۋدى كەڭەيتۋ ۇسىنىلادى. ءبىز بيزنەس ءۇشىن ۇسىناتىن بارلىق قارجىلىق مۇمكىندىكتەردى, سونىڭ ىشىندە ساۋدانى قارجىلاندىرۋدىڭ جاڭا قۇرالىن دۇرىس قولدانۋ ماڭىزدى», دەدى, ۆيتسە-مينيستر.
ول جاھاندىق ماركەتپلەيستەر ارقىلى دايىن ءونىم ەكسپورتىن ىلگەرىلەتۋدى دە ۇسىندى. 2022 جىلى قازاقستانداعى بولشەك ەلەكتروندىق كوممەرتسيا نارىعى ءوسىمىن جالعاستىرىپ, 1,3 تريلليون تەڭگەنى قۇرادى, بۇل 2021 جىلعى كورسەتكىشتەن 30%-عا ارتىق. ماركەتپلەيستەردەن ساتۋدىڭ جىلدىق ءوسىمى 33%-عا جەتكەن. ال ينتەرنەت-دۇكەندەردىڭ ساتىلىمى 19%-عا ءوسىپتى. ەلەكتروندىق ساۋدا نارىعى سۋبەكتىلەرىنىڭ 85%-ى – شوب وكىلدەرى.
«تانىمال ماركەتپلەيستەردىڭ ءبىرى – Alibaba.com ەلەكتروندىق پلاتفورماسى. 2020-2022 جىلدارى Alibaba پلاتفورماسىندا 220 كومپانيا ورنالاستىرىلدى. بۇگىندە ساۋدا الاڭىندا 7,5 مىڭنان استام وتاندىق تاۋار بار. وسى كەزەڭدە باعدارلاماعا قاتىسۋشىلاردىڭ جيىنتىق ساتىلىمى شامامەن 260 ملن-دى قۇرادى. 2022 جىلى ءبىز Alibaba پلاتفورماسىندا ۇلتتىق پاۆيلون اشتىق. Ebay پلاتفورماسىندا ورتالىق ازيا ەلدەرىنىڭ وڭىرلىك حابىن قۇرۋ بويىنشا جۇمىس جالعاسۋدا», دەيدى ۆيتسە-مينيستر.
قايرات تورەباەۆ ەلىمىزدە قايتا وڭدەلگەن جانە تاماق ونىمدەرى كولەمىنىڭ وتكىزۋ قابىلەتىن ارتتىرۋعا ارنالعان ترانسشەكارالىق حابتاردى قالىپتاستىرۋ جونىندەگى جوسپارلارىمەن ءبولىستى. ونىڭ ايتۋىنشا, قازىرگى ترانسشەكارالىق ساۋدا-لوگيستيكالىق ينفراقۇرىلىمدى دامىتۋدا نەگىزگى ء«وسۋ نۇكتەلەرى» قىتاي شەكاراسىنداعى قورعاس تورابى جانە قازاقستان-وزبەكستان شەكاراسىنداعى «ورتالىق ازيا» حوكو بولادى.
وسىعان ۇقساس يندۋستريالىق ساۋدا-لوگيستيكالىق كەشەنى قىرعىزستانمەن شەكارادا دا قۇرىلماق. كاسپي تەڭىزىندەگى وتاندىق پورتتارعا ەلىمىزدەگى جانە ترانزيتتىك جۇكتەردى تارتۋ ءۇشىن قازىرگى ۋاقىتتا ۇكىمەت «اقتاۋ تەڭىز پورتى» اەا بازاسىندا كونتەينەرلىك حاب قۇرۋ ماسەلەلەرىن بەلسەندى پىسىقتاۋدا.
فورۋمنىڭ پانەلدىك سەسسياسى بارىسىندا قايرات تورەباەۆقا قازاقستاننىڭ ۇجىمدىق باتىس ەلدەرىنىڭ سانكتسيالارىن ساقتاۋىنا قاتىستى سۇراق قويىلدى. ۆيتسە-مينيستر ەلىمىزگە قايتالاما سانكتسيالار قولدانۋعا جانە اۋماقتى ولاردى اينالىپ ءوتۋ ءۇشىن پايدالانۋعا جول بەرمەۋ بويىنشا ەل قابىلداعان شارالار تۋرالى ايتىپ بەردى.
اتاپ ايتقاندا, ۇكىمەت سانكتسيالىق تىزىمدەرگە ەنگىزىلگەن تاۋارلاردىڭ ساۋداسىن قاداعالايتىن سانكتسيالىق تاۋەكەلدەرگە قارسى تۇرۋ ءۇشىن جۇمىس توبى قۇرىلدى. ول ءۇشىن مەملەكەتتىك كىرىستەر ورگاندارىنىڭ اقپاراتتىق جۇيەلەرىندە (استانا-1 اج) فورماتتى-لوگيستيكالىق باقىلاۋ ورناتىلعان. 2023 جىلعى 1 ساۋىردەن باستاپ ەاەو ەلدەرىمەن ءوزارا ساۋدادا تاۋارلارعا ىلەسپە جۇكقۇجاتتاردى مىندەتتى رەسىمدەۋ ەنگىزىلدى. بۇل ناقتى ۋاقىت رەجىمىندە تاۋارلاردىڭ, سونىڭ ىشىندە سانكتسيالار تىزىمىنە ەنگىزىلگەن تاۋارلاردىڭ قوزعالىسىن باقىلاۋعا مۇمكىندىك بەرەدى.
وتاندىق بيزنەس ءۇشىن traderadar.kz سايتى اشىلدى جانە ۇنەمى جاڭارتىلىپ وتىرادى. وندا رەسەيگە قارسى بارلىق سانكتسياعا ارنالعان نۇسقاۋلىقتار كورسەتىلگەن. سونىمەن قاتار بۇگىندە رەسەي فەدەراتسياسى مەن بەلارۋسكە قارسى سانكتسيالار قولداناتىن ەلدەردىڭ ۋاكىلەتتى ورگاندارىمەن دەرەك الماسۋ جانە جەدەل دەن قويۋ جۇمىستارى جۇرگىزىلىپ جاتىر.
