ۇكىمەت باسشىسى بۇگىندە دايىندىق جۇمىستارىنىڭ بارىسىندا وتە مۇقيات قاراۋدى قاجەت ەتەتىن پروبلەمالىق ماسەلەلەر تۋىنداپ جاتقانىن ايتتى. اتاپ ايتقاندا, بىرقاتار وبەكت بويىنشا جوندەۋ جۇمىستارى مەرزىمىنەن كەشىگىپ جاتىر.
«بۇل ماسەلەنى ءبىز جاقىندا وتكەن ۇكىمەت وتىرىسىندا تالقىلادىق. دەگەنمەن ءوزارا ۇيلەسىمدى, بىرلەسكەن ءىس-قيمىلدى بۇدان دا كۇشەيتۋ قاجەت. سوندىقتان وسى جۇمىستاردىڭ بارلىعىن تاعى دا مۇقيات قاراپ, تىكەلەي شەشىم قابىلدايمىز», دەدى ءاليحان سمايىلوۆ.
ەنەرگەتيكا ءمينيسترى الماسادام ساتقاليەۆ رەسپۋبليكانىڭ بىرقاتار ءوڭىرىنىڭ جىلۋ كوزدەرىندەگى پروبلەمالىق ماسەلەلەر تۋرالى ەگجەي-تەگجەيلى باياندادى, ال يندۋستريا جانە ينفراقۇرىلىمدىق دامۋ ۆيتسە-ءمينيسترى دينارا ششەگلوۆا جىلۋمەن جابدىقتاۋ جەلىلەرىن جوندەۋ بارىسى تۋرالى ايتىپ بەردى.
پرەمەر-مينيستر «اتىراۋ جەو» اق-دا №12 تۋربينا وتكەن جىلدان بەرى جوندەۋدە تۇرعانىن, ال №6 تۋربينادا كۇردەلى جوندەۋ جۇمىستارى ءالى باستالماعانىن اتاپ كورسەتتى. اتىراۋ وبلىسىنىڭ اكىمى سەرىك شاپكەنوۆ وسى ماسەلە بويىنشا تۇسىنىكتەمە بەردى.
وعان قوسا قاراعاندى وبلىسىنداعى جەو-دا جوندەۋ جۇمىستارىنىڭ تۇرلەرى وزگەرىپ, مەرزىمدەرى ۇزارتىلسا, ماڭعىستاۋ وبلىسىندا جەكەلەگەن قازاندىقتار مەن تۋربينالاردا جۇرگىزىلىپ جاتقان جۇمىستاردىڭ كەشىگىپ جاتقانى, سونداي-اق «ماەك» جشس-ءنىڭ №2 ەنەرگەتيكالىق بلوگىن جوندەۋگە كەلىسىم-شارت جاسالماعانى, ۇلىتاۋ وبلىسى جەزقازعان جەو-سىنداعى قازاندىقتى جوندەۋ 2024 جىلعا شەگەرىلگەنى جانە №8 قازاندىقتى كۇردەلى جوندەۋ مەرزىمدەرىن اۋىستىرۋعا بايلانىستى ءتيىستى رەزەرۆ قامتاماسىز ەتىلمەگەنى ايتىلدى. وڭىرلەر اكىمدەرى ەرماعانبەت بولەكپاەۆ, نۇرلان نوعاەۆ جانە بەرىك ابدىعالي ۇلى قابىلدانىپ جاتقان شارالار تۋرالى تۇسىنىكتەمە بەردى.
سونىمەن قاتار ۇكىمەت باسشىسى سقو-دا «سەۆكازەنەرگو» اق-نىڭ 2-ءشى جەو-سىنداعى №9 قازاندىققا جوندەۋ جۇرگىزىلىپ جاتقانىن, ال تۇركىستان وبلىسىندا كەنتاۋ جەو-سىنىڭ 4 قازاندىعىن كۇردەلى جوندەۋ جوسپارلانعانىن, الايدا بۇل رەتتە جسق ءالى دە مەملەكەتتىك ساراپتامادان ءوتۋ ساتىسىندا ەكەنىن اتاپ ءوتتى. ءوز كەزەگىندە ايداربەك ساپاروۆ پەن دارحان ساتىبالدى كوتەرىلگەن ماسەلەلەر بويىنشا تۇسىنىكتەمە بەردى.
وتىرىس بارىسىندا استانا اكىمى جەڭىس قاسىمبەك پەن جامبىل وبلىسىنىڭ اكىمى نۇرجان نۇرجىگىتوۆ ءسوز سويلەدى.
قورىتىندىلاي كەلە, پرەمەر-مينيستر جىلۋ بەرۋ ماۋسىمىنا دايىندىق ماسەلەلەرى ۇلكەن الەۋمەتتىك ماڭىزعا يە ەكەنىن اتاپ ءوتتى, سوندىقتان قازىردەن باستاپ ءىرى اپاتتاردىڭ الدىن الىپ, جىلىتۋ ماۋسىمىنىڭ تۇراقتى ءوتۋى ءۇشىن قاجەتتى شارالاردى قابىلداۋ قاجەت.
«اتاپ ايتقاندا, جەو جانە جەلىلەر يەلەرىمەن تىكەلەي, تىعىز جۇمىس ىستەۋ ماڭىزدى. مەملەكەت تاراپىنان ستانتسيالاردىڭ وتىنىمدەرىنە سايكەس تاريفتەر بەكىتىلدى. بۇل قارجىلاندىرۋدى تارتۋعا جانە جاڭعىرتۋ جۇمىستارىن باستاۋعا مۇمكىندىك بەرەدى», دەدى ءاليحان سمايىلوۆ.
سونداي-اق ۇكىمەت باسشىسى ەنەرگەتيكا سالاسىن باقىلاۋدى كۇشەيتۋدىڭ جانە ءتيىستى وڭىرلىك شتابتار جۇمىسىنىڭ ماڭىزىن اتاپ ءوتتى.
كەڭەس سوڭىندا ۇكىمەت باسشىسى ءبىرىنشى ۆيتسە-پرەمەر رومان سكليارعا جانە ەنەرگەتيكا ءمينيسترى الماسادام ساتقاليەۆكە كەستەگە سايكەس جۇرگىزىلىپ جاتقان جۇمىستاردىڭ بارىسىن جەكە باقىلاۋ ءۇشىن رەسپۋبليكانىڭ ەنەرگەتيكالىق نىساندارىن تەكسەرۋدى تاپسىردى.
«رومان ۆاسيلەۆيچ, بۇگىندە ءسىز كەستە بويىنشا پاۆلودار وبلىسىنىڭ ەنەرگەتيكالىق نىساندارىن, ونىڭ ىشىندە ەكىباستۇز جەو-سىن تەكسەرۋىڭىز كەرەك. كەڭەس اياقتالعاننان كەيىن تەز ارادا جولعا شىعۋىڭىزدى سۇرايمىن. كەلەسى اپتادا الماسادام مايدان ۇلى ريددەر جانە كەنتاۋ جەو-لارىنا بارادى», دەپ تۇيىندەدى پرەمەر-مينيستر.
