كوللاجدى جاساعان زاۋرەش سماعۇل, «EQ»
قازىر ەلىمىزدىڭ ونەركاسىپ كاسىپورىندارىنا مەملەكەتتىك قولداۋ ارقىلى ەڭبەك ونىمدىلىگىن ۇلعايتاتىن تەحنولوگيالاردى ەنگىزۋگە بارىنشا جاعداي قاراستىرىلعان. بۇل ءونىم ءوندىرىسىنىڭ تيىمدىلىگىن جاقسارتۋعا ارنالعان شىعىنداردىڭ بەلگىلى ءبىر بولىگىن وتەۋ اياسىندا قولعا الىندى. مۇنداي قىزمەتتى «QazIndustry» – قازاقستاندىق يندۋستريا جانە ەكسپورت ورتالىعى كورسەتىپ كەلەدى.
Kaizen-ءنىڭ نەگىزگى يدەياسى – كاسىپتى ءتيىمدى باسقارۋ, ياعني شىعىنعا اكەلەتىن ۇدەرىستەردى الدىن الۋ, سونىمەن قاتار ءار قىزمەتكەردىڭ جۇمىسىن جەڭىلدەتىپ, تۇتىنۋشىعا باعدارلانعان قىزمەتتى جولعا قويۋ. وعان باسشىلاردان باستاپ تەحنيكالىق پەرسونالعا دەيىن قاتىسۋى ماڭىزدى.
«زاۋىت جىلىنا 30 ملن كەراميكالىق كىرپىشتىڭ 3 ءتۇرىن شىعارىپ كەلەدى. 2018 جىلى كاسىپورىندا جاڭعىرتۋ جۇمىستارى جۇرگىزىلگەنىمەن, كەيبىر ۋچاسكەلەردە فۋنكتسيونالدى قىزمەتكە بايلانىستى بەلگىلى ءبىر قيىندىقتارعا تاپ بولدىق. سوندىقتان قاجەتسىز شىعىنداردى الدىن الىپ, ءتارتىپتى رەتتەۋ قاجەت بولدى», دەدى «Astana Ceramic» جشس جوبا جەتەكشىسى, ەڭبەك قاۋىپسىزدىگى جانە ەڭبەكتى قورعاۋ جونىندەگى ينجەنەر سەرىك قوجاحانوۆ.
سول سەبەپتى زاۋىت باسشىلىعى جوعارىدا ايتالعان كۇنشىعىس ەلىنىڭ ىسكەرلىك فيلوسوفياسىن ەنگىزۋدى قۇپتاعان. وسى ماقساتتا 2022 جىلى جاپونيادان ءبىلىمىن جەتىلدىرىپ كەلگەن ارنايى ساراپشى شاقىرتىلىپتى. كاسىپورىندا ەكى اپتا بويى جوعارى جانە ورتا بۋىنداعى پەرسونالعا ارنالعان وقىتۋ سەمينارلارى وتكىزىلىپ, ناتيجەسىندە وزەكتى ۋچاسكەلەردە بىرقاتار جاڭاشىلدىق ەنگىزىلگەن.
سونداي-اق ورتا جانە جوعارى بۋىنداعى باسشىلارعا Kaizen بويىنشا جۇمىستارىن جۇيەلەۋ ءۇشىن تەحنيكالىق كەڭەس قۇرىلدى. ال تسەحتاردا 5S جۇمىس كەڭىستىگىن ۇيىمداستىرىپ, وڭتايلاندىرۋ جۇيەسى ەنگىزىلدى. وعان 5 قادام كىرەدى: سۇرىپتاۋ, ءتارتىپ پەن تازالىقتى ساقتاۋ, ستاندارتتاۋ جانە جەتىلدىرۋ.
بۇل ارقىلى «QazIndustry» «Astana Ceramic-ءتىڭ» اتالعان جۇيەنى وندىرىسكە ەنگىزۋگە بايلانىستى شىعىندارىنىڭ 30%-ىن وتەپ بەردى. وسى ورايدا جاپوندىق جۇيە ەنگىزىلگەننەن كەيىن كاسىپورىندا ءونىم ءوندىرىسى 15%-عا ارتىپ, ەلەكتر ەنەرگياسى 10%-عا جانە شيكىزات پەن كومپونەنتتەردى ۇنەمدەۋ 5%-عا جەتكەن. سونىمەن قاتار مامان تاپشىلىعى 10%-عا ازايىپ, قوسالقى بولشەكتەردىڭ شىعىنى 15%-عا تومەندەپتى. قولعا الىنعان امال ارقىلى زاۋىت تولىق ءوندىرىس قۋاتىنا شىقتى.
«Astana Ceramic» جشس 2007 جىلى اقمولا وبلىسىنداعى «بوشان» كىرپىش زاۋىتىنىڭ نەگىزىندە قۇرىلعانىن ايتا كەتكەن ورىندى. مۇندا كىرپىش وندىرىسىنە قاجەتتى شيكىزات ۇشكول كەن ورنىنىڭ ماڭىنان جەتكىزىلىپ وتىرادى. شىعارىلعان ونىمدەر قۇرىلىس سالاسىندا كەڭ قولدانىلىپ كەلەدى. كاسىپورىن اقمولا وبلىسىندا ءىرى كولەمدەگى كەراميكالىق بلوكتار وندىرۋمەن اينالىساتىن جالعىز زاۋىت سانالادى. قازىر ءوندىرىس ورنىندا 70 ادام جۇمىسپەن قامتىلعان. الداعى ۋاقىتتا زاۋىت ينفراقۇرىلىمدى دامىتۋ ارقىلى الەۋمەتتىك جوبالارعا دا قاتىسۋدى جوسپارلاپ وتىر.
