كەنتاۋ قالالىق ورتالىق اۋرۋحاناسىنىڭ باس دارىگەرى اسىلبەك وتەباەۆتىڭ مالىمدەۋىنشە, اۋرۋحاناعا جاتقىزىلعانداردىڭ 27-ءسى ەرەسەك, قالعانى بالالار. ەرەسەكتەردىڭ ۇشەۋى – جۇكتى ايەل. «اۋرۋحاناعا جاتقىزىلعان بارلىق ناۋقاستىڭ جاعدايى تۇراقتى, ورتاشا اۋىرلىقتا. سونداي-اق قاناعاتتانارلىق جاعدايداعى 28 ناۋقاس امبۋلاتورلى ەمگە جىبەرىلدى, ونىڭ ىشىندە 19 ەرەسەك, 9 بالا بار. ناۋقاستار جايىندا كەنتاۋ قالالىق تققب-عا شۇعىل حابار بەرىلىپ, ءتيىستى تالدامالار الىنىپ, باكتەريولوگيالىق تەكسەرۋگە جىبەرىلدى. جۇقپالى اۋرۋلار بولىمشەسىندە 40 توسەكتىك ورىن بار, ناۋقاستاردىڭ كوبەيۋىنە بايلانىستى قوسىمشا تاعى 40 توسەك-ورىن قاراستىرىلىپ, بەكەتتەر اشىلدى. ناۋقاستاردىڭ بارلىعىنا قاجەتتى مەديتسينالىق كومەك كورسەتىلىپ جاتىر. ءدارى-دارمەكتەر جەتكىلىكتى. جالپى جاعداي تولىق باقىلاۋدا», دەدى باس دارىگەر وسى وقيعاعا قاتىستى وتكىزىلگەن بريفينگتە.
تۇركىستان وبلىسىنىڭ سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسقار ىسقاقوۆ بولعان جاعداي نەگىزىندە كەنتاۋ قالالىق پوليتسيا ءبولىمى سوتقا دەيىنگى تەرگەپ-تەكسەرۋ بويىنشا قىلمىستىق ءىس قوزعاعانىن ايتتى. ءبىر ايتا كەتەرلىگى, ءدال وسى تاماقتانۋ ورنىندا ادامداردىڭ دەنساۋلىعى مەن ومىرىنە قاۋىپ كەلتىرۋدىڭ, ياعني جاپپاي تاماقتان ۋلانۋ جاعدايى وسىمەن ءۇشىنشى رەت تىركەلىپ وتىر. «بۇعان دەيىن وسى ءدامحانادا 2022 جىلدىڭ تامىز ايىندا 8 ادام, ال قازان ايىندا 168 ادام ۋلانىپ قالعان بولاتىن. اتالعان دەرەكتەر بويىنشا سانيتاريالىق-ەپيدەميولوگيالىق باقىلاۋ قىزمەتى تاراپىنان زاڭ اياسىندا ءتيىستى شارالار قابىلدانعان. ءبىرىنشى جاعدايدا جەكە كاسىپكەرگە 230 اەك ايىپپۇل سالىنىپ, قۇقىق بۇزۋشىلىقتى جويۋ تۋرالى ۇيعارىم بەرىلگەن. ال 168 ادام ۋلانعان ەكىنشى جاعدايدا قىلمىستىق كودەكستىڭ 304-بابى 1-بولىگىمەن كەنتاۋ قالالىق پوليتسيا ءبولىمى سوتقا دەيىنگى تەرگەپ-تەكسەرۋ بويىنشا قىلمىستىق ءىس قوزعاعان ەدى. قىلمىستىق ءىستىڭ قاۋلىسى نەگىزىندە سەبب تاراپىنان جوسپاردان تىس تەكسەرۋ دە تاعايىندالعان. تەكسەرۋ كەزىندە كوپتەگەن كەمشىلىك انىقتالعان. اتالعان قىلمىستىق ءىس 2022 جىلدىڭ 30 جەلتوقسان كۇنى اياقتالىپ, سوتقا دەيىنگى تەرگەپ-تەكسەرۋدى توقتاتۋ تۋرالى قاۋلىعا سايكەس قوعامدىق تاماقتانۋ ورنىنىڭ يەسى كۇدىكتى رەتىندە تانىلىپ, ونىڭ ءىس ارەكەتىندە قىلمىستىق قۇقىق بۇزۋشىلىقتىڭ قۇرامى انىقتالعان. الايدا جابىرلەنۋشىلەرمەن تاتۋلاسۋىنا بايلانىستى, قىلمىستىق ءىس توقتاتىلعاندىعى جونىندە قپب-نىڭ قاۋلىسى شىعارىلعان. وسىعان بايلانىستى, قالالىق سانيتاريالىق-ەپيدەميولوگيالىق باقىلاۋ باسقارماسى تاراپىنان قوعامدىق تاماقتانۋ ورنىنىڭ يەسى – جەكە كاسىپكەر ج.ءتاجىباي ۇلىنا اكىمشىلىك قۇقىق بۇزۋشىلىق تۋرالى حاتتاما تولتىرىلىپ, ءىس-قۇجاتتار قالالىق سوتقا جولدانادى. الايدا سوتقا جەكە كاسىپكەرگە قاتىستى ناقتى سول فاكت بويىنشا تۇلعانى كۇدىكتى دەپ تانۋ تۋرالى قاۋلىنىڭ بولۋىنا بايلانىستى ءىس توقتاتىلسىن دەپ قاۋلى شىعارعان. تەرگەپ-تەكسەرۋ جۇمىستارى بارىسىندا نىسان 46 ورىندىق تاماقتانۋ ورنى رەتىندە اشىلىپ, دەنساۋلىق ساقتاۋ مينيسترلىگىنىڭ بۇيرىعىنا سايكەس, ەپيدەميالىق ءمانى بولماشى وبەكتى رەتىندە كەنتاۋ قالالىق سەب باسقارماسىنا 2023 جىلدىڭ ءساۋىر ايىندا قىزمەتىن باستاۋ تۋرالى حابارلاما جىبەرگەن», دەيدى وبلىستىق سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى.
ال كۇنى كەشەگى جاعداي بويىنشا قالالىق پوليتسيا ءبولىمى قىلمىستىق كودەكستىڭ 304-بابى 1-بولىگىمەن سوتقا دەيىنگى تەرگەپ-تەكسەرۋ بويىنشا قىلمىستىق ءىس قوزعادى. قۇزىرلى ورىنداردىڭ تەرگەپ-تەكسەرۋى بارىسىندا بىرقاتار كەمشىلىك انىقتالعان. مىسالى, نىساندا وندىرىستىك باقىلاۋ باعدارلاماسى جوق. اسپازدار مەن داياشىلار الدىن الا پروفيلاكتيكالىق مەديتسينالىق تەكسەرۋدەن تولىق وتپەگەن. جۇمىس ىستەيتىن 20 قىزمەتكەردىڭ تەك 12-ىندە عانا مەديتسينالىق كىتاپشا بار. شيكىزات پەن ءونىمنىڭ قاۋىپسىزدىگىن كۋالاندىراتىن قۇجاتتارى دا تولىق ەمەس. تاعام دايىنداۋعا قاجەتتى ونىمدەردىڭ قايدان الىنعانى بەلگىسىز. سونداي-اق ونىمدەردى ساقتاۋ كەزىندە ولاردىڭ تاۋارلىق كورشىلەستىگى ساقتالماعان, ياعني ەت ونىمدەرى, قۇس ەتى, ءسۇت ونىمدەرى, كوكونىستەر مەن جەمىستەر, بارلىعى ءبىر توڭازىتقىشتا ارالاسا ساقتالعان. قىزمەتكەرلەردىڭ جەكە جانە ارنايى كيىمدەرىن, جەكە زاتتارىن ساقتاۋعا ارنالعان ورىن قاراستىرىلماعان. ونىمدەردىڭ جارامدىلىق مەرزىمدەرى ءوتىپ كەتكەن. اسقار ىسقاقوۆتىڭ مالىمدەۋىنشە, زەرتحانالىق زەرتتەۋگە الىنعان سىنامالار جۇمىس ۇستىندە.
حالىق «اۋرۋ – استان» دەپ بەكەر ايتپايدى. اسىرەسە, جازدىڭ اپتاپ ىستىعىندا بۇزىلعان تاعام مەن جەمىس-جيدەكتەن ۋلانۋ قاۋپى جوعارى. بىراق كەنتاۋداعى «ريزىق-رايانا» ءدامحاناسىنان تاماقتانعاندار جازدا عانا ەمەس, بىلتىر تامىزدا جانە قازان ايىندا دا ۋلانعان بولاتىن. وكىنىشكە قاراي, قازان ايىندا 168 ادامنىڭ دەنساۋلىعىنا زيان كەلتىرگەن جەكە كاسىپكەر سول قاتەلىكتەن ساباق الماپتى. سول كەزدە كەشىرىم بەرگەندەر كەشەگى وقيعادان كەيىن وكىنگەن دە بولار. ال مۇنداي ءدامحانالاردىڭ تازالىعى مەن تاماق ساپاسىن قاداعالايتىن جاۋاپتى مەكەمەلەر ارىز-شاعىم تۇسپەسە تەكسەرۋگە بولمايدى دەگەن ءموراتوريدى العا تارتىپ وتىر. ياعني بىلتىر قازان ايىنداعى وقيعادان كەيىن اراعا از ۋاقىت سالىپ جۇمىسىن قايتا باستاعان ءدامحانانىڭ قىزمەتى مۇلدە تەكسەرىلمەگەن.
تۇركىستان وبلىسى
