كونگرەستىڭ اشىلۋ سالتاناتىندا پرەمەر-ءمينيستردىڭ ورىنباسارى – ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا, دەنساۋلىق ساقتاۋ ءمينيسترى اجار عينيات, پارلامەنت دەپۋتاتتارى جانە عىلىمي-زەرتتەۋ ينستيتۋتتارى مەن مەديتسينالىق ورتالىقتاردىڭ ءبىرىنشى باسشىلارى قاتىسىپ, نەيروحيرۋرگيا ورتالىعىنىڭ 15 جىلدىق بەلەسىمەن قۇتتىقتادى. اتاۋلى ءىس-شاراعا ۇزىن-سانى 250-دەن استام ادام قاتىسسا, ونىڭ ىشىندە ەلدىڭ تۇكپىر-تۇكپىرىنەن 150-دەن استام نەيروحيرۋرگ كەلگەن. سالتاناتتى جيىندا تامارا دۇيسەنوۆا مەملەكەت باسشىسى قاسىم-جومارت توقاەۆتىڭ ۇلتتىق نەيروحيرۋرگيا ورتالىعىنىڭ 15 جىلدىعىنا ارنالعان قۇتتىقتاۋىن وقىپ بەردى. حابارلامادا پرەزيدەنت ورتالىقتىڭ جەمىستى باستامالارىنا از-كەم توقتالىپ, سەرىك اقشولاقوۆ باستاعان نەيروحيرۋرگيا عىلىمي ورتالىعىنىڭ ۇجىمىنا عىلىم مەن مەديتسينا سالاسىندا جەتىستىكتەرگە جەتە بەرۋىنە تىلەكتەستىك بىلدىرگەن.
وسىدان سوڭ دەنساۋلىق ساقتاۋ ءمينيسترى اجار عينيات مەديتسينادا اۋرۋ-سىرقاۋدىڭ الدىن الۋ, ياعني ناۋقاستاردىڭ دەرتىن ەرتە ساتىدا انىقتاۋ شارالارىنا باسىمدىق بەرىلەتىنىن ايتتى.
– كونگرەستە ەلگە الىس-جاقىن شەتەلدەردەن كەلىپ ەمدەلىپ جاتقان پاتسيەنتتەردىڭ بارىن ەستىدىڭىزدەر. بۇل – ۇلتتىق نەيروحيرۋرگيا ورتالىعىنىڭ الەۋەتى جوعارى ەكەنىن بىلدىرەدى. ءبىز, ءبىرىنشى كەزەكتە جاڭا تەحنولوگيالارعا كوڭىل اۋدارۋدامىز. قازىر اۋدان ورتالىقتارىندا, جاڭادان قوسىلعان وبلىستاردا نەيروحيرۋرگيانىڭ دەڭگەيىن كوتەرۋ جايى وزەكتى. سونىمەن قاتار رەابيليتاتسيالىق كومەكتى دامىتۋعا باسىمدىق بەرىپ وتىرمىز. كادرلاردى شەتەلدە وقىتۋعا كوڭىل ءبولىپ, شەتەلدىڭ ەڭ ۇزدىك دەگەن ماماندارىن مەيلىنشە ەلگە شاقىرۋعا تىرىسامىز. وسىلايشا, ماماندار بىلىكتىلىگىن ارتتىرادى. سالادا ءبىلىمدى دە, بىلىكتى نەيروحيرۋرگتەر بارشىلىق. قازىر ەل بويىنشا 71 ينسۋلتتىك ورتالىق بار. وسى ەكى جىلدا 32 اۋداننىڭ ورتالىعىندا ينسۋلت ورتالىعى اشىلدى. وندا نەيروحيرۋرگتەرمەن قوسا كت, مرت اپپاراتتارىن بىلەتىن ماماندار بولادى. ءبىزدىڭ باستى ماقساتىمىز – اۋرۋلاردى بارىنشا ەرتە ساتىدا انىقتاپ, مەديتسينالىق كومەكتى مەيلىنشە جەدەل كورسەتۋ. سوندىقتان دياگنوستيكاعا ەڭ وزىق اپپاراتتاردى الامىز, دەيدى ا. عينيات.
كونگرەستە ورتالىقتىڭ باسشىسى, ەلىمىزدىڭ باس نەيروحيرۋرگى, ۇعا اكادەميگى سەرىك اقشولاقوۆ ۇلتتىق نەيروحيرۋرگيا ورتالىعىنىڭ 15 جىلداعى بەلەسى جايىندا بايانداپ, سالاداعى ءتۇيىندى ماسەلەلەردى اينالىپ وتپەدى.
«15 جىل ىشىندە ەلدە العاش رەت نەيروحيرۋرگيانىڭ جاڭا باعىتتارى ەنگىزىلدى. جالپى العاندا 70 يننوۆاتسيالىق تەحنولوگياعا جول اشتىق. وسى جىلدار ىشىندە 40 مىڭنان استام وپەراتسيا جۇرگىزىلدى, ونىڭ ىشىندە III-V كۇردەلىلىك ساناتى 90%-دى قۇرايدى. بۇرىن ورتالىق اشىلعانعا دەيىن نەيروحيرۋرگيالىق پاتولوگياسى بار پاتسيەنتتەرگە شامامەن 80% ەلدە جوعارى تەحنولوگيالىق ەم كورسەتىلمەگەن. سوڭعى 15 جىلدا وڭىرلەرگە 64 تەحنولوگيا ترانسفەرتى جۇزەگە اسىرىلدى. سونىڭ ارقاسىندا كوپتەگەن وبلىستا جوعارى تەحنولوگيالىق مەديتسينالىق كومەك كورسەتىلەدى. بۇگىندە جوعارى تەحنولوگيالىق نەيروحيرۋرگيالىق ەمدەۋ بارشا ازاماتقا قولجەتىمدى جانە ونىڭ بارلىعى ورتالىقتا ءساتتى قولدانىلۋدا. بۇگىندە ەلىمىزدىڭ نەيروحيرۋرگيالىق قىزمەتى ۇلتتىق نەيروحيرۋرگيا ورتالىعى مەن 39 وبلىستىق جانە قالالىق اۋرۋحانالاردىڭ بازاسىندا ورنالاسقان 51 نەيروحيرۋرگيالىق بولىمشەدەن تۇرادى. دەگەنمەن ءالى دە بولسا, سالادا وزەكتى ماسەلەلەر بار. بۇل نەيروحيرۋرگتەرمەن, ايماقتارداعى نەيروحيرۋرگيالىق توسەكتەرمەن قامتاماسىز ەتۋدىڭ بىركەلكى ەمەستىگى جانە جاراقتاندىرۋ پروبلەمالارى. بالالاردىڭ نەيروحيرۋرگيالىق توسەكتەرىنىڭ سانى از, كەيبىر ايماقتاردا مۇلدەم جوق. وسى ماسەلەنىڭ بارلىعىن ءبىز ەرتەڭگى وتىرىستا مىندەتتى تۇردە تالقىلايمىز, مىندەتتەردى بەلگىلەيمىز جانە ەل نەيروحيرۋرگياسىن ودان ءارى جاقسارتۋ جانە دامىتۋ بويىنشا پەرسپەكتيۆالىق جوسپارلار قۇرامىز», دەيدى س.اقشولاقوۆ.
كونگرەستىڭ ەكىنشى كۇنىندە سالانىڭ تاجىريبەلى ماماندارى, پروفەسسورلار نەيروحيرۋرگياداعى نەيروونكولوگيا, ج ۇلىن, تامىر, بالالار نەيروحيرۋرگياسى, كىشى ينۆازيالىق نەيروحيرۋرگيا جانە نەيرووڭالتۋ باعىتىنداعى وزەكتى ماسەلەلەردى تالقىلادى.
