ۇكىمەت باسشىسى قازىرگى ۋاقىتتا رەسپۋبليكادا بيزنەسكە قاتىستى جاڭا رەتتەۋشىلىك ساياسات ەنگىزىلىپ جاتقانىن اتاپ ءوتتى. ونىڭ اياسىندا 44 سالادا ەڭبەك ەتەتىن كاسىپكەرلەرگە قويىلاتىن 10 مىڭنان استام نەگىزسىز تالاپ انىقتالدى. 9 مىڭ تالاپ جويىلدى, قالعاندارى بويىنشا جۇمىس جىل سوڭىنا دەيىن اياقتالادى. جالپى بۇل بيزنەسكە جۇكتەمەنى ايتارلىقتاي ازايتۋعا مۇمكىندىك بەرەدى.
وعان قوسا بيىل مەملەكەتتىك رەتتەۋدىڭ بارلىق سالاسىندا تاۋەكەلدەردى باسقارۋ جۇيەلەرى اۆتوماتتاندىرىلاتىن بولادى, بۇل بيزنەستى جوسپارلى تەكسەرۋدى ەكى ەسەگە قىسقارتۋعا مۇمكىندىك بەرەدى.
سونداي-اق شاعىن جانە ورتا بيزنەستى قولداۋدىڭ جۇيەلى شارالارى كەڭەيتىلدى.
«وڭدەۋ ونەركاسىبىن دامىتۋ ماقساتىندا قولداۋ كورسەتىلەتىن سالالاردىڭ ءتىزىمى 116-عا ۇلعايتىلدى, ال بىرقاتار سالادا پايىزدىق مولشەرلەمەنى سۋبسيديالاۋ مەرزىمى 5-تەن 7 جىلعا دەيىن ۇزارتىلدى. جالپى بيزنەستى مەملەكەتتىك قولداۋ 266 ملرد تەڭگەگە دەيىن ۇلعايتىلدى», دەدى ءاليحان سمايىلوۆ.
سونىمەن قاتار ۇكىمەت باسشىسىنىڭ ايتۋىنشا, ءماسليحاتتار العاش رەت وڭىردەگى شاعىن جانە ورتا بيزنەس ءۇشىن جەرگىلىكتى بيۋدجەتكە تۇسەتىن بولشەك سالىق مولشەرلەمەسىن 4%-دان 2%-عا دەيىن وزدەرى بەلگىلەي الادى.
جالپى كاسىپكەرلىكتى قولداۋ اياسىندا بيىل 12 مىڭنان استام جوبانى سۋبسيديالاۋ, 12 مىڭعا جۋىق جوباعا كەپىلدىك بەرۋ كوزدەلىپ وتىر. ورتا بيزنەستى قولداۋ بويىنشا قوسىمشا شارالار قابىلدانادى.
مۇناي-گاز سالاسىن دامىتۋ اياسىندا قاشاعان كەن ورنىندا جالپى قۋاتى 1 ملرد تەكشە مەتردەن اساتىن گاز وڭدەۋ زاۋىتىنىڭ قۇرىلىسى جالعاسىپ جاتىر. سونداي-اق قاشاعاندا قۋاتى 4 ملرد تەكشە مەتر بولاتىن تاعى 1 گاز وڭدەۋ زاۋىتىنىڭ قۇرىلىسى پىسىقتالىپ, قاراشىعاناق كەن ورنىندا قۋاتى 4 ملرد تەكشە مەتر بولاتىن گاز وڭدەۋ زاۋىتىن سالۋ جونىندە شەشىم قابىلداندى. وعان قوسا جاڭاوزەن قالاسىندا قۋاتى 900 ملن تەكشە مەتر بولاتىن جاڭا گاز وڭدەۋ زاۋىتىنىڭ قۇرىلىسى كۇزگە دەيىن باستالادى.
اگروونەركاسىپ كەشەنىندە 536 ملرد تەڭگەنى قۇرايتىن 300-گە جۋىق جوبا ىسكە اسىرىلۋدا. بيىل مەملەكەت مەنشىگىنە قوسىمشا 5 ملن گەكتار اۋىل شارۋاشىلىعى جەرى قايتارىلادى.
اۋىل حالقىنىڭ تابىسىن ارتتىرۋ ماقساتىندا «اۋىل اماناتى» جوباسى ىسكە اسىرىلىپ جاتىر, ونىڭ اياسىندا بيزنەستى دامىتۋعا شاعىن نەسيە بەرۋ جانە اۋىل شارۋاشىلىعى كووپەراتسياسىن نىعايتۋ جونىندە شارالار قابىلداۋ جوسپارلانىپ وتىر. بيىل بۇل ماقساتقا 100 ملرد تەڭگە ءبولىندى. جالپى 7 جىل ىشىندە جوبامەن 1 ملن-نان استام اۋىل تۇرعىنىن قامتۋ جوسپارلانىپ وتىر, ال ونى قارجىلاندىرۋ سوماسى 1 ترلن تەڭگەنى قۇرايدى.
وڭىرلەردە ەلەكتر ەنەرگەتيكاسى سالاسىندا دا جاڭا جوبالار ىسكە اسىرىلىپ جاتىر. اتاپ ايتقاندا, بيىل جالپى قۋاتى 600 مۆت-تان اساتىن ەلەكتر ستانتسيالارىن جاڭعىرتۋ جۇمىستارى اياقتالادى. الماتى مەن تۇركىستاندا 2025-2026 جىلدارى جالپى قۋاتى 2,3 گۆت-تان اساتىن گاز گەنەراتسياسىنىڭ ەنەرگەتيكالىق جوبالارى ىسكە قوسىلادى. قىزىلوردادا جاڭا جىلۋ ەلەكتر ورتالىعىنىڭ قۇرىلىسى باستالدى. كوكشەتاۋدا جانە سەمەيدە 2 جىلۋ ەلەكتر ورتالىعىن سالۋ ماسەلەسى قاراستىرىلىپ جاتىر. سونداي-اق بيىل جالپى قۋاتى 276 مۆت بولاتىن جاڭارتىلاتىن ەنەرگيا كوزدەرىنىڭ 10 جوباسى ىسكە اسىرىلادى.
