كەزدەسۋدە ق.كەلىمبەتوۆ ەلباسىعا رەسپۋبليكادا قازاقستان پرەزيدەنتىنىڭ باستاماسىمەن وزىق الەمدىك تاجىريبە نەگىزىندە قۇرىلعان, قارجىلىق قىزمەتتەر كورسەتەتىن جەتەكشى ورتالىق قالىپتاستىرۋ جونىندەگى شارالاردىڭ ىسكە اسىرىلۋى تۋرالى باياندادى.
نۇرسۇلتان نازارباەۆ «استانا» حالىقارالىق قارجى ورتالىعى (احقو) ستراتەگياسىن جۇزەگە اسىرۋ ەل ەكونوميكاسىنا ەلەۋلى قارجى رەسۋرسىن تارتۋعا مۇمكىندىك بەرەتىنىن اتاپ ءوتتى. «استانا» حالىقارالىق قارجى ورتالىعى قازاقستاننىڭ قارجى ينفراقۇرىلىمىنىڭ وزەگىنە اينالىپ, ورتالىق ازيا مەن ەۋرازيالىق ەكونوميكالىق وداقتىڭ قارجى حابى ءرولىن اتقارۋعا ءتيىس», – دەدى ەلباسى. ق.كەلىمبەتوۆ بىلتىرعى جەلتوقسان ايىندا «استانا» حالىقارالىق قارجى ورتالىعى تۋرالى كونستيتۋتسيالىق زاڭعا قول قويىلۋى پوستكەڭەستىك كەڭىستىكتە تۇڭعىش رەت اعىلشىن قۇقىعى قاعيداتى نەگىزىندە جۇمىس جۇرگىزۋگە مۇمكىندىك بەرگەنىن ايتتى. قارجى ورتالىعىنىڭ باسقارۋشىسى قازاقستان پرەزيدەنتىن احقو-نى قۇرۋ تۋرالى يدەيانىڭ حالىقارالىق ينۆەستيتسيالىق ورتا وكىلدەرى تاراپىنان وتە جوعارى باعاعا يە بولىپ وتىرعانى تۋرالى حاباردار ەتتى. «مەملەكەت باسشىسىنىڭ شەتەلگە ساپارلارى بارىسىندا قول جەتكىزىلگەن ۋاعدالاستىقتار ورتالىقتىڭ جۇمىسىنا ەرەكشە سەرپىن بەرىپ وتىر. اتاپ ايتقاندا, «10 تريلليون» كلۋبىنىڭ وكىلدەرىمەن وتكەن كەزدەسۋدىڭ تابىستى بولعانى اتاپ ءوتىلدى», – دەدى ق.كەلىمبەتوۆ. مەملەكەت باسشىسى قارجى قىزمەتتەرى نارىعىنىڭ الەمدىك كوشباسشىلارىمەن ىنتىماقتاستىق ورناتۋدىڭ جانە احقو قىزمەتكەرلەرىنىڭ جوعارى كاسىبي قۇرامىن جاساقتاۋ باعىتىندا جۇرگىزىلەتىن جۇمىستىڭ ماڭىزدىلىعىنا باسا نازار اۋداردى. كەزدەسۋ قورىتىندىسى بويىنشا ەلباسى بىرقاتار ناقتى تاپسىرمالار بەردى.
ەلباسى كەزدەسۋ بارىسىندا يۋ. لۋجكوۆتىڭ استانا مەن ماسكەۋ اراسىنداعى ىنتىماقتاستىقتى نىعايتۋعا سىڭىرگەن ەڭبەگىن اتاپ ءوتىپ, ونى 80 جاسقا تولعان مەرەيتويىمەن قۇتتىقتادى.
ماسكەۋ قالاسىنىڭ بۇرىنعى مەرى مەملەكەت باسشىسىن جانە بارشا قازاقستاندىقتاردى رەسپۋبليكا تاۋەلسىزدىگىنىڭ 25 جىلدىعىمەن قۇتتىقتاپ, كورسەتكەن قۇرمەتى مەن كەزدەسۋگە مۇمكىندىك تۋعىزعان نۇرسۇلتان نازارباەۆقا العىسىن ءبىلدىردى.
