فەستيۆالدە شىعارماشىلىق ۇجىم مەن سوليستەرى باستاعان 500-گە جۋىق ءارتىس فيلارمونيا الدىنا جيىلعان قالا تۇرعىندارى مەن قوناقتارىنا جانە ەركە ەسىلدىڭ جاعالاۋىنا سەرۋەنگە شىققان قاۋىمعا ەستە قالارلىق ەرەكشە كەش وتكىزدى. سونىمەن قاتار بالالار شىعارماشىلىق ۇيىمدارى مەن ءبىلىم بەرۋ ستۋديالارى, تسيرك ارتىستەرى بالدىرعانداردى قۋانتتى. فەستيۆالدىڭ اشىلۋ سالتاناتىندا توبە كورسەتكەن ەركەعالي راحماديەۆ اتىنداعى مەملەكەتتىك اكادەميالىق فيلارمونياسىنىڭ باس ديرەكتورى ەرلان داكەنوۆ ەلوردالىقتاردى قالا كۇنىمەن قۇتتىقتاپ, ارىپتەستەرىنە تولاعاي تابىس تىلەدى. كوپ ۇزاماي فيلارمونيانىڭ كوركەمدىك جەتەكشىسى گۇلميرا قۇتتىباداموۆا استانا كۇنىنە ارنالعان فەستيۆالدىڭ باعدارلاماسى تۋرالى ايتىپ بەردى.
«قالا كۇنىنە ارنالعان مەرەكەلىك ءىس-شارالاردىڭ ىشىندە «Filarmonia fest -2023» فەستيۆالىنىڭ دە اۋقىمى كەڭ. باعدارلاماعا سايكەس ونەرپازدار ەرتەدەن كەشكە دەيىن قالا تۇرعىندارىنا مەرەكەلىك كوڭىل كۇي سىيلايدى. فەستيۆال وزدەرىڭىز تاماشالاعان «مۋزىكا بالالار كوزىمەن» اتتى سۋرەت بايقاۋىمەن باستالدى. ەندى «بورمەن سۋرەت سالۋ», ء«مۇسىن», «كومپوزيتسيا» نوميناتسيالارى بويىنشا ۇزدىك شىققان جاستار انىقتالادى», دەدى گۇلميرا قۇتتىباداموۆا.
ءتۇس اۋا «سارىارقا» حالىق مۋزىكاسى ءانسامبلى مەن ۇرمەلى وركەستردىڭ جاس مۋزىكانتتارعا ارنالعان «مۋزىكالىق اسپاپتار الەمىنە ساياحات» اتتى شەبەرلىك ساعاتى ءوتتى. كەشكە قازاق وركەسترى مەن حالىق ءانى ءبولىمىنىڭ ءداستۇرلى انشىلەرى اكىمدىك الدىنداعى امفيتەاتردا ونەر كورسەتتى. وسىدان سوڭ ەلوردالىقتار عازيزا جۇبانوۆا اتىنداعى مەملەكەتتىك ىشەكتى اسپاپتار كۆارتەتىنىڭ كونتسەرتىن تىڭدادى. كوپ ۇزاماي سول ماڭدا استانانىڭ 25 جىلدىعىنا فلەشموب ۇيىمداستىرىلىپ, «فيلارمونيا – ەلوردانىڭ مۋزىكالىق ماگنيتى» ەسسە بايقاۋىنىڭ قورىتىندىسى شىقتى. فەستيۆال فيلارمونيا ۇجىمىنىڭ گالا-كونتسەرتىمەن تۇيىندەلدى.
ەركەعالي راحماديەۆ اتىنداعى مەملەكەتتىك اكادەميالىق فيلارمونيانىڭ باي تاريحى بار. بۇگىندە فيلارمونيا قۇرامىنداعى 13 شىعارماشىلىق ۇجىمدى قوسا العاندا ۇزىن-سانى 606 ادام ەڭبەك ەتەدى. ونەر مايتالماندارى وسى كۇنگە دەيىن ءتۇرلى باعىتتاعى مۋزىكالىق شىعارمالاردى ناسيحاتتاي وتىرىپ, مادەنيەت سالاسىنا ۇلەس قوسۋدان تانعان ەمەس. مۇنى استانا كۇنىنە تارتۋ بولعان «Filarmonia fest-2023» مۋزىكالىق فەستيۆالىنىڭ اۋقىمىنا قاراپ باعامداي بەرسەك بولادى.
