بۇقارالىق اقپارات قۇرالدارى قىزمەتكەرلەرى مەرەكەسىنە وراي ۇيىمداستىرىلعان ءىس-شارادا ءوڭىر باسشىسى جۋرناليستەردى مەرەكەسىمەن قۇتتىقتاپ, العىسىن جەتكىزدى.
«بۇگىنگى اقپاراتتىق-كوممۋنيكاتسيالىق تەحنولوگيا زامانىندا جۋرناليست بولۋ ءارى جەڭىل, ءارى قيىن. ولاي دەيتىنىم, قازىر اقپارات لەگى وتە كوپ. سولاي بولا تۇرا سونىڭ ىشىندەگى ەڭ پايدالىسىن, قاجەتتىسىن حالىققا سۇرىپتاپ, سارالاپ, تارازىلاپ جەتكىزە ءبىلۋ, مالىمەتتەردىڭ راس-وتىرىگىن انىقتاۋ, ءار ءسوزدىڭ سالماعى مەن جاۋاپكەرشىلىگىن سەزىنۋ اسا ماڭىزدى. راسىندا, ەلىمىزدە اشىق ءارى ادىلەتتى قوعام قالىپتاستىرۋدا, قوعامدىق باقىلاۋدى كۇشەيتۋدە, بيلىك پەن حالىق اراسىندا التىن كوپىر بولۋدا اقپارات قۇرالدارىنىڭ ءرولى زور. سوندىقتان اقپاراتتىق ساياساتتاعى وزگەرىستەر, ەڭ الدىمەن, باق جۇمىسىنا تىكەلەي قاتىستى, دەپ اتاپ وتكەن ايماق باسشىسى قازاق جۋرناليستيكاسىنا ەسەلى ەڭبەك سىڭىرگەن ارداگەرلەر مەن اعا بۋىن وكىلدەرىنىڭ ەسىمدەرىن ايرىقشا اتاپ, وبلىستاعى ءباسپاسوز ارنالارى مەن باسىلىمدارىن ءسوز ەتتى.
ۇلتتىڭ اسىل مۇراتىن اسقاقتاتىپ, جوعىن تۇگەندەپ, قۇندىلىعىن قاستەرلەۋ, اسقاق ارمانىنا قول جەتكىزىپ, رۋحىمىزدىڭ جالاۋىن جەلبىرەتۋ ماقساتىندا وسىدان 105 جىل بۇرىن, ياعني 1918 جىلدىڭ 21 ماۋسىمىندا گازەت بولىپ حاتتالعان, تالاي باسىلىمدى باۋىرىنان قاناتتاندىرعان «جەتىسۋ» گازەتىنىڭ مەرەيتويىنا وراي وبلىس اكىمى ب.يساباەۆ ۇجىمعا سۋ جاڭا (JAC J7) ماركالى اۆتوكولىك تارتۋ ەتتى.
كوڭىل تولقىعان سالتاناتتى جيىن بارىسىندا قازاقستاننىڭ قۇرمەتتى ءجۋرناليسى جاقىپجان نۇرعوجاەۆ اتا باسىلىمنىڭ تاراۋ-تاراۋ تاريحىن ايتىپ, وبلىس اكىمىنە جۋرناليستەر قاۋىمى اتىنان العىس ءبىلدىردى.
جەتىسۋ وبلىسى
