ءيا, جۋىردا تۇركىستاندا وتكەن «التىن ساقا» حالىقارالىق انيماتسيالىق فيلمدەر فەستيۆالىندە تۇركىتىلدەس مەملەكەتتەردىڭ بالالارعا ارنالعان باعدارلامالار جاسايتىن رەجيسسەرلەرى باس قوسقان. قازاق ۇلتتىق انيماتسياسىن حالىقارالىق دەڭگەيگە كوتەرۋ, قازاق فولكلورىنىڭ كەيىپكەرلەرىن ناسيحاتتاۋ ماقساتىندا ۇيىمداستىرىلعان فەستيۆالگە وتاندىق رەجيسسەرلەرمەن قاتار, تۇركيا, ازەربايجان, وزبەكستان, تۇرىكمەنستان, قىرعىزستان, تاتارستان, باشقۇرتستاننىڭ انيماتورلارى قاتىستى. ۇيىمداستىرۋ القاسى مەن قازاقستان انيماتورلار وداعى ماماندارىنان قۇرالعان ساراپتاما كەڭەسى اتالعان ءىس-شارادا باق سىناۋعا ىنتا بىلدىرگەن 70-كە جۋىق ءفيلمنىڭ ىشىنەن 30-ىن ىرىكتەپ الىپ, ولارعا فەستيۆالگە قاتىسۋعا جولداما بەرگەن-ءدى.
حالىقارالىق دارەجەدەگى انيماتسيا سالاسىنىڭ ماماندارىنان قۇرالعان, قازاقستان انيماتورلار وداعىنىڭ باسشىسى, رەجيسسەر باتىرحان داۋرەنبەكوۆ توراعالىق ەتكەن قازىلار القاسىنىڭ شەشىمىمەن «ايبىندى اۋلا» انيماتسيالىق فيلمىمەن رەجيسسەر ازامات ەرنازاروۆ گران ءپريدى جەڭىپ الدى. ال جۇلدەلى ءى ورىندى «باقاشاباق» انيماتسيالىق فيلمىمەن رەجيسسەر قۋانىش ناعىز بەن «كاپيتان پەنگۋ» انيماتسيالىق فيلمىمەن تۇرىك رەجيسسەرى الي قاراجام يەلەندى. جۇلدەلى ءىى ورىن «كەنجە باتىر» انيماتسيالىق فيلمىمەن وزبەكستان ەلىنەن رەجيسسەر جاۆلون تۋرديحودجاەۆ پەن «قاجىمۇقان» انيماتسيالىق فيلمىمەن رەجيسسەر امانعالي ەرمانعا, جۇلدەلى ءىىى ورىن «تاريحقا ورالۋ» انيماتسيالىق فيلمىمەن ازەربايجان ەلىنەن رەجيسسەر جەيحۋن تۋركسوي مەن «مارعاۋ مەن ماقتا قىز» انيماتسيالىق فيلمىمەن رەجيسسەر ارنۇر تۇرلىقوجاعا بۇيىردى. بۇدان بولەك قاتىسۋشىلار «ۇزدىك رەجيسسەر», «ۇزدىك قويۋشى سۋرەتشى», «ۇزدىك ستسەناري» اتالىمدارى بويىنشا ماراپاتتالدى. سونىمەن قاتار بارلىق قاتىسۋشىعا «ساق» كينوستۋدياسىنىڭ ديرەكتورى, فەستيۆال ۇيىمداستىرۋشىسى نۇريددين پاتتەەۆ العىس حات تابىس ەتتى.
وبلىس اكىمدىگىنىڭ قولداۋىمەن, وبلىستىق مادەنيەت جانە تۋريزم باسقارماسىنىڭ ۇيىمداستىرۋىمەن وتكەن فەستيۆالدىڭ قوناقتارى قىزىل كىلەم ۇستىمەن ءجۇرىپ ءوتتى. سونداي-اق جەڭىمپازداردىڭ قۇرمەتىنە اننەن شاشۋ شاشىلىپ, جالپى ءىس-شارانىڭ ءوتۋ بارىسىنان كۇندەلىك بەينەفيلم كوپشىلىك نازارىنا ۇسىنىلدى.
تۇركىستان
