دوڭگەلەك ۇستەلگە پارلامەنت ءماجىلىسىنىڭ دەپۋتاتتارى, الەۋمەتتىك مەديتسينالىق ساقتاندىرۋ قورىنىڭ توراعاسى ءسابيت احمەتوۆ, دەنساۋلىق ساقتاۋ, قارجى مينيسترلىگى, جەكەمەنشىك مەديتسينالىق كلينيكالاردىڭ جانە ولاردىڭ سالالىق بىرلەستىكتەرىنىڭ باسشىلارى, مەديتسينالىق قاۋىمداستىق وكىلدەرى قاتىستى. الدىمەن ءبىز دوڭگەلەك ۇستەلدىڭ ماقسات-مىندەتى جايىندا «اق جول» پارتياسىنىڭ توراعاسى ازات پەرۋاشەۆتان سۇراپ بىلگەن ەدىك.
– مەديتسينالىق ساقتاندىرۋ قورىنا قاتىستى حالىقتان, ونىڭ ىشىندە جۇمىس بەرۋشىلەردەن پارتياعا نارازىلىق ءتۇسىپ جاتىر. ءتىپتى بىرەر اي جۇمىسى توقتاپ, تولەم جاساماعان پاتسيەنتتەردىڭ اراسىندا ساقتاندىرۋ پاكەتىندەگى ءتيىستى كومەكتى تولىق الماعاندار بار ەكەن. بەيىندى ماماندارعا قارالۋ قيىن. پارتياعا جەكەمەنشىك مەديتسينالىق كلينيكالاردان دا ارىز-شاعىم كوپ تۇسەدى. ولاردىڭ ايتۋىنشا, مەديتسينالىق ساقتاندىرۋ قورىنىڭ مەملەكەتتىك جانە جەكەمەنشىك اۋرۋحانالارعا كوزقاراسى ەكى بولەك. بۇل – دۇرىس ەمەس. سەبەبى كونستيتۋتسيا بويىنشا مەملەكەتتىك جانە جەكەمەنشىك قىزمەتتىڭ قۇزىرى تەڭ. ءبىزدىڭ ويىمىزشا, وسى مەديتسينالىق ساقتاندىرۋدى ناعىز نارىقتىق جولعا سالۋىمىز كەرەك. ويتكەنى ءاربىر ادام ءوزىنىڭ دەنساۋلىعىنا ءوزى جاۋاپتى. مۇندا اركىم جەكە تولەمدەرىن دەربەس شوتىنا جيناعانى تيىمدىرەك. سونداي-اق پاتسيەنت قاي ەمحاناعا, قانداي دارىگەرگە قارالاتىنىن ءوزى شەشۋگە ءتيىس, دەيدى ازات پەرۋاشەۆ.
وسىدان سوڭ, الەۋمەتتىك مەديتسينالىق ساقتاندىرۋ قورىنىڭ توراعاسى ءسابيت احمەتوۆ ءمامس-ءتى ۇيلەستىرۋدەگى ماقسات-مىندەتتەرمەن قوسا كەدەرگىلەردى جىپكە ءتىزىپ باياندادى.
– تۇسىنىكتىرەك بولۋ ءۇشىن ءمامس جۇيەسىن ەنگىزۋ يدەياسى نەدەن باستالعانىن, قازىر قانداي ءىس-شارالاردى ىسكە اسىرىپ, قاي باعىتتا دامىپ جاتقانىمىزدى حابارلايىن. ءمامس-ءتى ەنگىزۋ بويىنشا جۇمىس 2015 جىلى باستالدى. مەديتسينالىق ساقتاندىرۋدىڭ پاكەتىن كەزەڭ-كەزەڭىمەن ەنگىزۋ ارقىلى مەملەكەتكە, بيۋدجەتكە ارتىق سالماق سالماۋ كوزدەلدى. بىراق ءىس جۇزىندە بارلىعى باسقاشا ءوربىدى. بيۋدجەتكە سالماق كوبىرەك ءتۇستى. قارجىلاندىرۋ ارتتى. بىزدە ءمامس جۇيەسىنەن كەيىنگى جەتىستىكتەر بار. جوعارى تەحنولوگيالىق وپەراتسيالارعا, دياگنوستيكا, وڭالتۋعا بولىنەتىن قارجى ارتتى. سونىمەن قاتار دارىگەرلەر مەن ورتا بۋىن مامانداردىڭ جالاقىسى ءوستى. بۇدان باسقا دا ءتيىمدى تۇستارى بارشىلىق. قازىر ءمامس-ءتى دامىتۋدىڭ الۋان نۇسقالارى تالقىلانىپ جاتىر. نەگىزى ءمامس-ءتى ەنگىزەردە گەرمانيا, ەۋروپا تاجىريبەلەرى ەسكەرىلگەن. بۇل جۇيەنىڭ باعاسىن قازىر بەرە المايمىز. ويتكەنى مەديتسينالىق ساقتاندىرۋ كەشەگى پاندەميادا عانا ناقتى ىسكە اسا باستادى. ساناۋلى جىلدا ءمامس تۋرالى بىرجاقتى شەشىم شىعارۋ ەرتە سەكىلدى. سەبەبى جۇيە ءوزىنىڭ الەۋەتىن ءالى تولىق كورسەتە المادى. ال ەۋروپالىقتاردىڭ ساقتاندىرۋ قورى بويىنشا ونداعان, جۇزدەگەن جىلدىق تاجىريبەسى بار, دەگەن ءسابيت احمەتوۆ ءمامس جۇيەسىندەگى بۇدان وزگە دە ماسەلەلەردى قاۋزادى. سونىڭ ىشىندە ءمامس-ءتى تسيفرلاندىرۋعا قاتىستى كەمشىلىك قامتىلدى. ول ءسوزىن تۇيىندەي كەلە جەكەمەنشىك جانە مەملەكەتتىك ەمحانالاردىڭ اراسىندا باسەكەلەستىك ارتسا, مۇنداي وڭ وزگەرىس مەديتسينالىق كومەكتىڭ ساپاسىنا اسەر ەتەتىنىن ايتتى.
باسقوسۋعا قاتىسقان جۇمىس بەرۋشىلەر قوردىڭ بيۋدجەتى مەن قارجىلىق اعىندارىن جاريا ەتىپ, ءاربىر قاتىسۋشىنىڭ جەكە جيناقتارىن ساقتاۋدى ۇسىندى. ارينە, وسى تۇستا مەديتسينالىق كومەكتىڭ ساپاسى, ۇزىن-سونار كەزەكتە ءسوز بولدى. توقسان اۋىز ءسوزدى تۇيىندەي كەلە «اق جول» دەموكراتيالىق پارتياسىنىڭ توراعاسى ازات پەرۋاشەۆ الدا ءمامس بويىنشا تاعى دا كەزدەسۋ وتكىزىپ, ماسەلەنى تالقىلاۋعا جەكە ەمحانالار مەن بيزنەس وكىلدەرىن شاقىرۋعا دايىن ەكەنىن جەتكىزدى.
