بىرەر كۇن بۇرىن ەلورداداعى №1 كوپبەيىندى قالالىق اۋرۋحاناعا جانە «ونەگە» وڭالتۋ ورتالىعىنا بارعانىمىزدا, ءمامس شەڭبەرىندە كورسەتىلەتىن مەديتسينالىق كومەك تۋراسىندا دايەكتى اقپارات جينادىق. سونىمەن بىلتىر №1 كوپبەيىندى قالالىق اۋرۋحانانىڭ بازاسىندا جەدەل كورونارلى سيندروممەن كەلگەن پاتسيەنتتەرگە كومەك كورسەتۋ ءۇشىن ينتەرۆەنتسيالىق رەنتگەنحيرۋرگيا بولىمشەسى اشىلعان. بولىمشەدە جاسالاتىن وپەراتسيالارعا بىلتىر ءمامس ەسەبىنەن 200 947 760 تەڭگە قارالعان. وسى سوماعا 231 وپەراتسيا جاسالعان. ال بيىل 291 160 736 تەڭگە سوماسىنا 283 ناۋقاس وپەراتسيا جاساتىپ, دياگنوستيكادان وتكەن. تاعى ايتا كەتەتىنى, بيىل ماۋسىم ايىنان وسى اۋرۋحانادا جۇرەك-قان تامىرلارى اۋرۋىمەن كەلگەن ناۋقاسقا جوسپارلى كومەك كورسەتۋ ءۇشىن №1 تەراپيا بولىمشەسىندە كارديوحيرۋرگيا ءپروفيلى اشىلعان. ءبىز وسى اۋرۋحانانىڭ ينتەرۆەنتسيالىق رەنتگەنحيرۋرگيا بولىمشەسىنىڭ دارىگەرى ازات ىدىرىسوۆپەن پىكىرلەسكەن ەدىك.
– ءبىز استانا قالاسىنىڭ بايقوڭىر, الماتى اۋداندارى بويىنشا كورونارلى سيندروممەن تۇسكەن ناۋقاستاردى جەدەل قابىلدايمىز. مۇندايدا ناۋقاس انگيوگراف اپپاراتىنا جاتادى. سوسىن, وسى اپپاراتتا جۇرەك-قان تامىرلارىنىڭ بىتەلگەن تۇستارىن انىقتاپ, تازارتامىز. بۇل – جوعارى تەحنولوگيالىق وپەراتسيا سانالادى. قان تامىرلارىندا ترومب پايدا بولۋى مۇمكىن. ول كىسىلەر جۇرەك ۇستاماسىمەن تۇسكەندە, جەدەل وپەراتسيا جاسايمىز. وكىنىشكە قاراي, جۇرەكتىڭ يشەميالىق اۋرۋى جاسارىپ بارادى. جەدەل تۇردە ينفاركتپەن تۇسكەن ناۋقاستاردىڭ ىشىندە قازىر 20-25 جاستاعى پاتسيەنتتەر دە كەزدەستى. اپتاپ ىستىقتا جۇرەگى اۋىرىپ كەلەتىن پاتسيەنتتەر جيىلەدى. بولىمشەدە سوڭعى ۇلگىدەگى ستاندارتتارعا ساي اپپارات, قۇرال-جابدىقتار جەتكىلىكتى. بولىمشەدەگى وپەراتسيالاردىڭ بارلىعى ءمامس جۇيەسى ەسەبىنەن تەگىن جاسالادى. قازىر بولىمشەدەگى وپەراتسيالار تامىر ارقىلى جاسالادى. ەندى بيىل جىل سوڭىنا دەيىن كارديوحيرۋرگيا بولىمشەسىن اشۋعا دايىنبىز. وندا اشىق تۇردەگى وپەراتسيالار جاسالادى, دەيدى ا.ىدىرىسوۆ.
بۇدان ءارى كوپبەيىندى اۋرۋحانانىڭ كارديولوگيا بولىمشەسىنە بارىپ, وپەراتسيادان شىققان پاتسيەنتتەرمەن جۇزدەسۋدى ءجون كوردىك. بولىمشەدە 35 ناۋقاسقا شاقتالعان توسەكتىك ورىن بار ەكەن. ءبىز ەگدە جاستاعى ناۋقاستار جايعاسقان پالاتادا پاتسيەنتتى ب.سىدىقوۆانى اڭگىمەگە تارتتىق.
– 2017 جىلى قال-احۋالىم ناشارلاي باستادى. دارىگەرگە قارالا كەلە, جۇرەكتەگى ەكى تامىرعا دۇرىس قان جۇرمەيتىنىن بىلدىك. تاۋبە, سول جىلى №2 قالالىق اۋرۋحانانىڭ دارىگەرلەرى جەدەل كومەك كورسەتتى. اۋرۋحانادا 18 كۇن جاتتىم. شۇكىر, جاعدايىم جاقساردى. سودان بەرى مىنە, 5 جىل وتە شىعىپتى. كارديولوگتەردىڭ نۇسقاۋىمەن 14 ماۋسىمدا №1 قالالىق اۋرۋحاناعا جولدامامەن كەلدىم. دەنساۋلىعىمدى ءجىتى باقىلاعان دارىگەرلەر كەلگەن كۇننىڭ ەرتەسىنە-اق جۇرەك-قان تامىرلارىنىڭ بىتەلگەن تۇستارىن تازارتتى. وپەراتسيا ءساتتى ءوتتى. جارتى ساعاتتا پالاتاعا الىپ كەلدى. مەديتسينالىق تەكسەرىستەردەن تۇگەل ءوتتىم. جاعدايىمىزدى دارىگەرلەر ۇنەمى باقىلاپ وتىرادى. شۇكىر, بىرەر كۇندە اۋرۋحانادان شىعامىن, دەدى دارىگەرلەرگە العىسىن جاۋدىرعان انا.
ءمامس جۇيەسىندە ساقتاندىرىلعان ازاماتتار بازالىق اناليز تالداۋلارىنان باستاپ قۇنى قىمبات وپەراتسياعا دەيىنگى بارلىق قاجەتتى مەديتسينالىق كومەكتى تەگىن الادى. مەديتسينالىق ساقتاندىرۋ قورى ەسەبىنەن مەملەكەتتىك مەديتسينا ۇيىمدارى عانا ەمەس, قورمەن كەلىسىمشارت جاساعان جەكەمەنشىك كلينيكالار دا مەديتسينالىق كومەك كورسەتەدى. امسق استانا قالاسى بويىنشا فيليالىنىڭ حالىقتى اقپاراتتاندىرۋ جانە وتىنىشتەردى قاراۋ ءبولىمىنىڭ جەتەكشىسى عۇلامجان جۇمانوۆتىڭ ايتۋىنشا, جىل سايىن مەديتسينالىق ساقتاندىرۋ ەسەبىنەن كارديوحيرۋرگيا, نەيروحيرۋرگيا, ۋرولوگيا, تراۆماتولوگيا, ونكولوگيا, حيرۋرگيا, باسقا پروفيلدەر بويىنشا ناۋقاستارعا وپەراتسيا جاسالادى. وسىنداي ءبىر عانا كۇردەلى وتانىڭ قۇنى ورتا ەسەپپەن بىرنەشە ميلليونعا شىعۋى مۇمكىن. الىس كەتپەي-اق قويالىق, مىسالى, بيىل ءتورت ايدا استانا قالاسى بويىنشا 4,5 ملرد تەڭگەگە 777 كارديوحيرۋرگيالىق وپەراتسيا جاسالعان.
وسى كۇنى الەۋمەتتىك مەديتسينالىق ساقتاندىرۋ قورىنىڭ ماماندارىمەن بىرگە «ونەگە» وڭالتۋ ورتالىعىنا دا باردىق. وندا ورتالىقتىڭ باسشىسى دارىگەر-رەابيليتولوگ گ ۇلىم دۇيسەنبينا ورتالىقتىڭ تىنىس-تىرشىلىگىن تانىستىردى.
– ورتالىقتا نەيروورتوپەديالىق پاتولوگياسى بار بالالار ەمشارا قابىلدايدى. ايىنا ءبىز كەمىندە 50 بالانى قوعامعا بەيىمدەۋگە بار كۇشىمىزدى سالامىز. ورتالىققا تەك استانا قالاسى ەمەس, وڭىرلەردەن دە بالالار كەلەدى. دتسپ, گەنەتيكالىق اقاۋلارى بار بالالار, داۋن سيندرومىنا شالدىققان, اۋتيستىك سپەكترى بۇزىلعان جانە جاراقات العان بالالار كەلەدى. قاراپ وتىرسام, رەابيليتاتسيادا ەڭبەك ەتكەنىمە 10 جىلعا جۋىقتاپتى. سوندا بايقاعانىم, كەيىنگى جىلدارى دتسپ, اۋتيستىك سپەكترى بۇزىلعان بالالار ءجيى كەلەتىندىگى. مۇندايدا بالالاردىڭ دياگنوزىن مەيلىنشە ەرتەرەك انىقتاسا, ەم شيپالى بولادى. ورتالىقتا بەيىمدەلگەن بالالار كوپ. ءبىز وسىعان دەيىن نەۆروپاتولوگ-دارىگەر ەكەۋمىز اۋستريالىق مامانداردان وقىدىق. بالانى شاقالاق كەزىنەن باقىلاۋ ارقىلى بۇزىلىستارىن تابا الاتىن بولدىق. ءىس-قيمىلىندا نەمەسە ويلاۋ قابىلەتىندە بۇزىلىسى بار التى ايعا دەيىنگى بالالاردى دا انىقتاي الامىز. كەيبىر بالالاردىڭ دامۋىنداعى كەدەرگىلەر استە ءىس-قيمىلىنان بايقالمايدى. بىراق بالانىڭ قابىلداۋ قابىلەتىندە نەمەسە پسيحولوگيالىق جاعىنان سويلەۋ قابىلەتىندە بۇزىلىستارى بولۋى مۇمكىن. ءبىز مۇنى سابيلەردىڭ ەموتسياسىنان دا بايقايمىز. سوندىقتان كەيدە تۋعانىنا 3 نەمەسە 5 اي بولعان بالالاردىڭ اتا-اناسىنا رەابيليتاتسيادان ءوتۋدى ۇسىنامىز, دەيدى دارىگەر-رەابيليتولوگ.
الەۋمەتتىك مەديتسينالىق ساقتاندىرۋ قورىنىڭ استانا قالاسى بويىنشا فيليالى بيىل وڭالتۋعا ۇلەس قوسىپ جۇرگەن 65 مەديتسينا ۇيىمىمەن كەلىسىمشارت جاساعان. ونىڭ ىشىندە 38 – جەكەمەنشىك, 25 – مەملەكەتتىك, 3 – رەسپۋبليكالىق مەديتسينا ۇيىمى بار. ولارعا بيىل ءمامس ەسەبىنەن 9,2 ملرد تەڭگە قارالعان.
قازىر قوعامدا ءمامس جۇيەسىنە قاتىستى ورىندى-ورىنسىز سىن-پىكىرلەر ءجيى ايتىلادى. شىن مانىسىندە, قور ەسەبىنەن جاسالىپ جاتقان جوعارى تەحنولوگيالىق وپەراتسيالاردان باسقا دا قىزمەتتەر جەتىپ ارتىلادى. سونىمەن قاتار قورمەن شارت جاساعان مەديتسينالىق ۇيىمدار حالىققا ساپالى ءارى قولجەتىمدى مەديتسينالىق كومەك كورسەتۋ جاۋاپكەرشىلىگىن وزىنە الادى. ياعني قور اراداعى شارتتاردىڭ ورىندالۋىن باقىلايدى.
