ولاي دەيتىنىمىز, تاۋ شىڭىنا جاپپاي كوتەرىلۋ جەتىسۋ وبلىسىنا تۋريستەردىڭ كەلۋىن ارتتىرىپ, بەلسەندى تاۋ ءتۋريزمىن سۇيەتىن جانداردىڭ نازارىن اۋدارا الادى. سونىمەن قاتار وبلىستاعى تاۋ ءتۋريزمىنىڭ داستۇرلەرىن ساقتاي وتىرىپ, تۇرعىنداردى بۇقارالىق تۋريزمگە, تاۋ جورىقتارىنا تارتىپ, تاۋ ءتۋريزمى مەن جۇگىرۋدى ناسيحاتتاۋعا مۇمكىندىك بەرەدى. بيىكتىگى تەڭىز دەڭگەيىنەن 2551م بولاتىن شاعان تاۋ شىڭىنا كوتەرىلۋ – ءار قاتىسۋشىنىڭ قيىندىقتار مەن سىناقتاردى جەڭىپ, ءوزىنىڭ سپورتتىق جەتىستىكتەرىن كورسەتۋگە مۇمكىندىك بەرەتىن ەرەكشە تاجىريبە. ونى بىزگە «Visitzhetysu» تۋريستىك اقپاراتتىق ورتالىعىنىڭ باسشىسى جاندوس نۇريەۆ ايتىپ بەردى.
«بيىل تۋريستەر سانىن ارتتىرۋ ءۇشىن كوكسۋ, اقسۋ, سارقان, الاكول جانە ەسكەلدى اۋداندارىنىڭ تۋريستىك ورىندارىنا اقپاراتتىق تۋرلار وتكىزۋ, سونداي-اق, «التىنەمەل» جانە «جوڭعار الاتاۋ» مەملەكەتتىك ۇلتتىق تابيعي پاركى اۋماعىندا ءىس-شارالار وتكىزۋ, وبلىستىڭ تۋريزم سالاسىنىڭ وكىلدەرى ءۇشىن وقىتۋ كۋرستارىن, ماستەر-كلاسستار مەن سەمينارلاردى ۇيىمداستىرۋ جانە وتكىزۋ, ءىس-شارالىق ءتۋريزمدى دامىتۋ ماقساتىندا فەستيۆالدار وتكىزۋ جوسپارلانعان. ول قاتاردا «Shagan Fest», «Koksu Water Fest», «Winter Fest», «Zhetysu travel» تۋريستىك فورۋمى سىندى بىرقىدىرۋ ءىس-شارالار بار. قازىرگى تاڭدا وبلىسقا كەلۋشىلەر ءۇشىن قولايلى جاعداي جاساۋ ماقساتىندا تۋريستىك دەستيناتسيالاردى دامىتۋ جۇمىستارى قارقىندى جۇرگىزىلۋدە», دەيدى ج.نۇريەۆ.
ونىڭ ايتۋىنشا, ءتۋريزمدى ايتقاندا ۇمىت قالماي ايتىلۋعا ءتيىس تاعى ءبىر باسىم باعىت – جوڭعار الاتاۋى تاۋ جۇيەسىندە ءتۋريزمدى دامىتۋ. بۇل ماقساتتا قورا شاتقالىنداعى بۋرحان-بۇلاق سارقىراماسىنا دەيىن جول جوندەۋ جۇمىستارىن جۇرگىزۋ جوسپارلانۋدا. جوبالىق-سمەتالىق قۇجات ازىرلەۋگە جەرگىلىكتى بيۋدجەتتەن 94,8 ملن تەڭگە بولىنگەن. وسى ايدا جوبالاۋ ۇيىمى ايقىندالماق.
اتالعان فەستيۆال اياسىندا قاتىسۋشىلار كۇننىڭ اپتاپ ىستىعىنا قاراماستان, شاعان تاۋ شىڭىن باعىندىرۋعا ءتيىس. اڭىزعا باي تاۋدىڭ ۇشىر باسىندا قوس ارۋدىڭ بەينەسى كورىنەدى. ايتسە دە ونىڭ ءوز الەتى بار. جۇزدەگەن تۋريستەر بىرلەسە, الداعى قيىندىقتاردى ەڭسەرۋى شارت. ءىس-شارا بارىسىندا ۇيىمداستىرۋشىلار قاتىسۋشىلاردىڭ دەنساۋلىعىن قاداعالاپ, سۋمەن قامتاماسىز ەتىپ وتىردى.
«تاۋدىڭ ۇشار باسىنا شىعۋ وڭاي ەمەس ەكەن. بىراق تابيعات قانشا شارشاپ تۇرساڭ دا وزىنە قاراي تارتادى. وسىنداي كەرەمەت اسەر ءۇشىن ۇيىمداستىرۋشىلارعا العىس ايتامىن. مەن ءۇشىن ۇلكەن تاجىريبە بولدى ءارى قورقىنىشىمدى جەڭۋگە كۇش سىيلادى. جەتىسۋدىڭ جاقۇتتى جەرلەرى كوپ قوي, سونىڭ ءبىرىن باعىندىرعانىما قۋانىشتىمىن», دەيدى قاتىسۋشى ايگەرىم نۇرلانقىزى.
فەستيۆال سوڭىندا شىڭعا شىققان ءاربىر ادامعا ارنايى مەدال مەن ەستەلىك سىيلىقتار تابىستالدى. ءبارى بىرلەسە ەستەلىك سۋرەتكە ءتۇسىپ, الدا بولار ءىس-شارالارعا قاتىسۋعا بەيىل ەكەنىن جەتكىزدى. مۇنداي يگىلىكتى ىستەر ادامداردى سالاماتتى ءومىر سالتىنا تارتۋعا, تۋريستىك الەۋەتتى ارتتىرۋعا جانە وبلىسىمىزدىڭ ءتۋريزمىن دامىتۋعا كومەكتەسەدى.
جالپى, بىلتىرعى ستاتيستيكا دەرەكتەرى بويىنشا جەتىسۋ وبلىسىندا تۋريستەردى قابىلداۋدىڭ 346 نىسانى جۇمىس ىستەدى. اقىلى تۋريستىك-ساۋىقتىرۋ قىزمەتتەرىنىڭ كولەمى دە ارتىپ, 5,2 ملرد تەڭگەگە جەتتى. وسى جىلى 3,2 ملرد تەڭگەگە 18 نىسان پايدالانۋعا بەرىلگەن.
وبلىستىڭ تۋريستىك الەۋەتىن ىلگەرىلەتۋ ماقساتىندا تۋريزم باسقارماسىنىڭ وكىلدەرى ناۋرىز ايىندا بەرلين (گفر) جانە دۋباي ء(باا) قالالارىنداعى ءىرى حالىقارالىق تۋريستىك كورمەلەرگە قاتىسقان. سونىمەن قاتار ءساۋىر ايىندا «قورعاس» شەكارا ماڭى ىنتىماقتاستىعى حالىقارالىق ورتالىعىنىڭ اشىلۋى شەڭبەرىندە باق وكىلدەرى مەن بلوگەرلەرگە ارنالعان اقپاراتتىق تۋر ۇيىمداستىرىلدى. بۇعان قوسا, «التىنەمەل» مەملەكەتتىك ۇلتتىق تابيعي پاركىنىڭ اۋماعىندا باق وكىلدەرىنە اقپاراتتىق تۋر وتكىزىلدى.
الاكول كولى جاعالاۋىندا ينفراقۇرىلىمدى دامىتۋ ماقساتىندا 2021-2022 جىلدارى مەملەكەتتىك بيۋدجەتتەن بىرقاتار جوبا جۇزەگە اسىرىلۋدا. ايتالىق, الاكول كولىنىڭ جاعالاۋىندا كارىز جۇيەسىنىڭ قۇرىلىسى, جاعالاۋدى بەكىتۋ جۇمىستارى, جولاۋشىلار تاسىمالىنداعى اۆتوجول جانە تەمىرجول باعىتىنداعى جوبالاردىڭ ىسكە اسۋى. ونىڭ ىشىندە, بۇگىندە «استانا – دوستىق» قاتىناسىمەن «تالگو» پويىزى جۇرگىزىلۋدە. اۋە تاسىمالىندا سۋبسيديالاناتىن اۋە رەيستەرى جۇزەگە اسۋدا. بۇل رەتتە «جەتىسۋ» اۋەكومپانياسىنىڭ قاتىسۋىمەن جازعى ماۋسىمدا رەيستەردى كۇنىنە 3 رەتكە دەيىن ارتتىرۋ مۇمكىندىگى بار ەكەنىن اتاپ وتكەن ءجون.
بالقاش كولى جاعالاۋىنىڭ تۋريستىك ينفراقۇرىلىمىن دامىتۋ ماقساتىندا «بالقاش «تۋريستىك-رەكرەاتسيالىق دەمالىس ايماعىنىڭ ينجەنەرلىك-كوممۋنيكاتسيالىق جەلىلەرىن سالۋ» جوباسى بويىنشا جوبالىق-سمەتالىق قۇجاتتاما ازىرلەندى. جالپى قۇنى 4,9 ملرد تەڭگە كولەمىندە جوبالانعان. قازىرگى كەزدە قارجىلاندىرۋ يندۋستريا جانە ينفراقۇرىلىمدىق دامۋ مينيسترلىگى ارقىلى قاراستىرىلۋدا. اۆتوموبيل جولدارىن رەكونسترۋكتسيالاۋ بويىنشا قۇرىلىس-مونتاجداۋ جۇمىستارى جۇرگىزىلۋدە.
بۇدان بولەك, كول جاعالاۋىندا جوبالاناتىن اۋماقتا نومىرلىك قورى 40 مىڭ توسەكتىك ورىن بولاتىن دەمالىس ورىندارىن سالۋ ارقىلى 30 ملرد تەڭگەگە ينۆەستيتسيالار تارتۋ كۇتىلۋدە. تۋريستىك يندۋستريانىڭ ەڭ قارقىندى دامىپ كەلە جاتقان جانە تانىمال سەكتورى ەكولوگيالىق تۋريزم ەكەنى بەلگىلى. ونىڭ دامۋى «التىنەمەل» جانە «جوڭعار الاتاۋى» مەملەكەتتىك ۇلتتىق پاركتەرىنىڭ الەۋەتىنە نەگىزدەلگەن.
بۇگىندە «التىنەمەل» ۇلتتىق پاركىنىڭ اۋماعىندا ەكولوگيالىق ءتۋريزمدى دامىتۋ جونىندەگى ينۆەستيتسيالىق جوبانى ىسكە اسىرۋ جۇرگىزىلۋدە. ينۆەستيتسيالاردىڭ جوسپارلانعان سوماسى 2 ملرد تەڭگە بولسا, «جوڭعار الاتاۋى» ۇلتتىق پاركىنىڭ اۋماعىندا جالپى قۇنى 1,6 ملرد تەڭگەگە 8 ينۆەستيتسيالىق جوبا ىسكە اسىرىلۋدا, ونىڭ 6-اۋى اياقتالدى, ءبىر جوبانى 2024 جىلى اياقتاۋ كوزدەلسە, تاعى ءبىر جوبانىڭ قۇرىلىسى باستاۋ ساتىسىندا.
جەتىسۋ وبلىسى
