ۇلت ۇياسى ۇلىتاۋدان باستالعان كوشەلى اڭگىمە قازاقتىڭ رۋحاني بايتاعى, ەلىمىزدەگى يسلام ءدىنىنىڭ دىڭگەگى ىسپەتتى, «ەكى دۇنيە ەسىگى» – قاسيەتتى تۇركىستانعا جالعاسۋى سودان بولار. ۇلتىمىزدى بىرلىككە باستايتىن بۇل القالى جيىنعا قاتىسۋشى زيالى قاۋىم كەلەسى جىلى مۇنايلى استانامىز اتىراۋدا باس قوسپاق.
قاسىم-جومارت توقاەۆ ديپلومات رەتىندە دۇنيەدەگى وقيعالارعا ءادىل دە شىنشىل باعاسىن بەردى. ء«بىز قازىر حالىقارالىق احۋالدىڭ بۇرىن-سوڭدى بولماعان دەڭگەيدە شيەلەنىسكەنىنە كۋا بولىپ وتىرمىز. كەيبىر ءىرى ەلدەر وزىنە قاجەتتى كۇن ءتارتىبىن باسقالارعا تاڭۋعا, ولاردى ءوز تالابىنا يكەمدەۋگە تىرىسۋدا. ءبىر-بىرىنە مۇلدەم قايشى كەلەتىن ءتۇرلى يدەيالار مەن ۇستانىمدار قاقتىعىسى بەلەڭ الدى», دەدى ق.توقاەۆ.
شىن مانىندە گەوساياسي جاعداي كۇننەن-كۇنگە كۇردەلەنىپ بارادى, سول ءۇشىن دە ەلدىڭ ىشىندە تىنىشتىق, ۇلتقا سۇتتەي ۇيىعان ىنتىماق, ال سىرتقى ساياساتتا «ۇر دا جىق» ەمەس, سابىرلى دا سالماقتى سارابدال ۇستانىم قاجەت. وسىعان وراي, پرەزيدەنت بۇگىنگى الماعايىپ زاماندا ەلىمىز بۇرىن-سوڭدى بولماعان دەڭگەيدە ءبىرتۇتاس بولۋى كەرەك ەكەنىن باسا ايتتى.
جاڭا قازاقستان وزىنەن ءوزى قۇرىلا سالماسى انىق. سوندىقتان دا مەملەكەت باسشىسىنىڭ زاماناۋي بىلىمگە, ۇرپاق تاربيەسىنە, سونىڭ ىشىندە جاستاردى ەڭبەككە باۋلۋعا شاقىرۋى وتە وزەكتى. الداعى ۋاقىتتا ناعىز ەڭبەك ادامىنىڭ يدەالى قوعامنىڭ باستى باعىت-باعدارى بولماق.
ال ساپالى ءبىلىم مەن تاعىلىم كىتاپتارمەن كەلەرى ءسوزسىز. وسى ورايدا قاسىم-جومارت كەمەل ۇلى ەڭ قاجەتتى دە قۇندى كىتاپتار جيناقتالعان پرەزيدەنت كىتاپحاناسىن ۇيىمداستىرۋ جونىندە ويىمەن ءبولىستى. جانە دە ونىڭ ەسىگى وقىرماندار ءۇشىن تاۋلىك بويى اشىق بولاتىنىن ەرەكشە اتادى. مەنىڭشە, بۇل – تاياۋدا ورىندالاتىن ۇلاعاتتى ءىس!
پرەزيدەنت جەر ماسەلەسىنە قاتىستى ارتىق-اۋىس اڭگىمەگە نۇكتە قويدى. مەملەكەت باسشىسى ەلىمىزدىڭ جەرى بابالارىمىزدان قالعان اسىل مۇرا رەتىندە تەك قازاق ەلىنە تيەسىلى ەكەنىن, سول سەبەپتى تۋعان جەردىڭ ءبىر پۇشپاعى دا ەشبىر شەتەلدىككە بەرىلمەيتىنىن, ونى شەتكە ساتۋعا تىيىم سالىنعانىن تاعى ءبىر نىقتاپ ايتتى.
سوندىقتان وسىنداي قاۋەسەت اڭگىمەنى دوعارىپ, جەرگە قامقورلىقپەن قاراپ, ونىڭ بەرەكەسىنە بولەنۋ – ساۋاپتى ءىس. بۇل رەتتە ات توبەلىندەي از اعاش-ورمان سەكىلدى بايلىعىمىزدى ايالاپ باعۋ – وزەكتى ماسەلە. ورمانى قالىڭ شەكارالاس مەكەندە كاتونقاراعاي ۇلتتىق پاركى ورنالاسقان ەل شىعىسىنداعى اۋدانداردى قايتا قالپىنا كەلتىرۋ دە پرەزيدەنتتىڭ حالىق پىكىرىنە قۇلاق اساتىن ساياساتكەر ەكەنىن تانىتىپ وتىر.
ايگۇل قۇسپان,
ءماجىلىس دەپۋتاتى
