ء«سوز باسىندا بىردەن اتاپ وتەيىن, مەنىڭشە, ۇلتتىق قۇرىلتاي بۇل – ارقانى كەڭگە سالىپ وتىراتىن جيىن ەمەس. ءسان-سالتاناتپەن وتكىزەتىن توي دا ەمەس. بابالارىمىز ماڭىزدى شەشىم قابىلدار كەزدە نەمەسە ەلگە قاتەر تونگەن سىن ساعاتتا قۇرىلتاي شاقىرعان.
بۇگىنگى قۇرىلتايدىڭ وتىرىسى ەلىمىزدەگى قايعىلى وقيعادان كەيىن ءوتىپ جاتىر. اباي وبلىسىندا الاپات ءورت شىعىپ, ازاماتتارىمىز قازا تاپتى. تاعى دا قايتالاپ ايتقىم كەلەدى: ءبىز مۇنداي وقيعادان ساباق الۋىمىز كەرەك, ناقتى شەشىمدەر قابىلداۋىمىز قاجەت», دەدى پرەزيدەنت.
مەملەكەت باسشىسىنىڭ ايتۋىنشا, ەل باسىنا تۇسكەن قيىندىقتار, ەڭ الدىمەن, حالىقتىڭ بەرەكە-بىرلىگىن سىنعا سالادى.
«وسىنداي كۇردەلى ساتتەر, ەڭ باستىسى – شىنايى جاناشىرلىق جانە تەرەڭ جاۋاپكەرشىلىك تانىتۋ قاجەت ەكەنىن ايقىن كورسەتەدى. مۇنى وزدەرىڭىز وتە جاقسى ءتۇسىنىپ وتىرسىزدار», دەدى مەملەكەت باسشىسى.
