2023 جىلدىڭ 1 شىلدەسىنەن باستاپ 31 جەلتوقسانىنا دەيىن ءبىر قوراپ تەمەكىنىڭ ەڭ تومەنگى باعاسى 710 تەڭگە بولادى. 2024 جىلدىڭ 1 قاڭتارىنان باستاپ تاباك ونىمدەرىنىڭ قۇنى ەڭ كەمى 770 تەڭگە بولىپ بەكىتىلمەك. تەمەكى باعاسىنىڭ وسۋىنە مىنا فاكتورلار اسەر ەتكەن:
- 2023-2024 جىلدارى اكتسيز مولشەرلەمەسىنىڭ 14 پايىزعا ۇلعايۋى;
- يمپورتتالاتىن شيكىزات پەن ماتەريالدار قۇنىنىڭ ورتاشا 20 پايىزعا ءوسۋى;
- تەمەكى ونىمدەرىنىڭ شيكىزاتى مەن كومپونەنتتەرىنىڭ لوگيستيكاسىنداعى قيىندىقتار;
- 2022 جىلى ينفلياتسيانىڭ 20,3 پايىزعا كوتەرىلۋى.
بۇيرىقتىڭ تولىق ماتىنىمەن اشىق ۇكىمەت پورتالىندا تانىسۋعا بولادى. بۇيرىق ءماتىنى 19 مامىرعا دەيىن قوعام تالقىسىنا ۇسىنىلدى.
ەسكە سالايىق, بيىل 1 قاڭتاردان باستاپ ءبىر قوراپ تەمەكىنىڭ مينيمالدى باعاسى 650 تەڭگە بولعان ەدى.
سونىمەن قاتار, الكوگول ونىمدەرىنىڭ دە باعاسى وسەدى. قازىرگى باعالار 30 قىركۇيەككە دەيىن ساقتالادى. ۇكىمەت 1 قازاننان باستاپ باعانى ارتتىرۋدى كوزدەپ وتىر. مىسالى, اراق پەن الكوگولدى ىشىمدىكتەردىڭ ەڭ تومەنگى باعاسى ليترىنە 1980 تەڭگە بولسا, 1 قازاننان باستاپ ءليترى 2100 تەڭگەگە تەڭ بولادى. قازىر 2930 تەڭگە تۇراتىن كونياك پەن برەندي قازاننان باستاپ 3110 تەڭگەگە ساۋدالانادى. جوبا اۆتورلارىنىڭ ايتۋىنشا, بۇل باستاما ەلدە الكوگولدى سۋسىندارعا دەگەن سۇرانىستى ازايتۋعا ءتيىس. Abbeycare group مالىمەتىنە سۇيەنسەك, 2022 جىلدىڭ قورىتىندىسى بويىنشا قازاقستان اراقتى ەڭ كوپ ىشەتىن ەلدەر قاتارىنا ەنگەن. ولار ەلدەگى ەر ازاماتتاردىڭ 10 پايىزى, ال ايەلدەردىڭ 1,5 پايىزى الكوگولگە تاۋەلدى دەگەن پايىم جاساعان.
Energyprom ۇسىنعان دەرەككە زەر سالساق, سوڭعى ءبىر جىل ىشىندە تەمەكى ونىمدەرىنە دەگەن سۇرانىس 11 پايىزعا ارتىپتى. بيىل قاڭتار-ساۋىردە ەلدە 5,1 ملرد تەمەكى جانە سول سياقتى تاباك ونىمدەرى وندىرىلگەن. بۇل بىلتىرعى كورسەتكىشتەن 4,8 پايىزعا تومەن. ءبىرىنشى توقساننىڭ قورىتىندىسى بويىنشا, جەرگىلىكتى كومپانيالار تەمەكى پەن پاپيروسقا دەگەن سۇرانىستى 79,7 پايىزعا (بىلتىر 80,6 پايىزعا) قاناعاتتاندىرعان. يمپورت كولەمى 20,3 پايىزدى قۇراپتى.
سونداي-اق قازاقستان 19,3 پايىز رەسسۋرستى نەمەسە 882,9 ملن سيگارەت پەن تاباك ونىمدەرىن ەكسپورتقا شىعارعان. بۇل 2022 جىلعى كورسەتكىشتەن 36,9 پايىزعا كوپ. ىشكى نارىقتاعى ساتۋ قارقىنى 10,1 پايىزعا, 3,7 ملرد-قا دەيىن ازايىپتى.
2022 جىلى ءاربىر ءۇي ورتا ەسەپپەن تاباك ونىمدەرىنە 44,8 مىڭ تەڭگە جۇمساعان. وڭىرلىك بولىنىستە پاۆلودار وبلىسى ەڭ كوپ شىعىنعا ۇشىراعان. اتالعان ولكەدە ءار ءۇي 83,1 مىڭ تەڭگەنى تەمەكى ساتىپ الۋعا جۇمساعان, تيىسىنشە جىلدىق ءوسىم كورسەتكىشى – 13,3 پايىز. ودان كەيىنگى ورىندا – سولتۇستىك قازاقستان (77,2 مىڭ تەڭگە, +9,6 پايىز) جانە شىعىس قازاقستان وبلىستارى (71,9 مىڭ تەڭگە, +24,8 پايىز). تەمەكىگە اقشانى ەڭ از جۇمساعان ايماق – شىمكەنت ەكەن. وندا ءاربىر ءۇي جىلىنا 8,8 مىڭ تەڭگەگە تەمەكى ساتىپ العان, سايكەسىنشە 12 ايلىق ءوسىم 14,2 پايىزدى قۇراعان.
ماماندار بىلتىر الكوگولدى ونىمدەرگە دەگەن سۇرانىستىڭ دا از بولماعانىن ايتادى. جىل بويىنا 756,1 ملن ليتر سىرا, 43,3 ملن ليتر شاراپ جانە 140 ملن ليتر قۋاتتىلىعى جوعارى الكوگولدى ءونىم (اراق, كونياك, سپيرت) ساتىلعان. جالپى, وتكەن جىلى الكوگول ونىمدەرىنىڭ باعاسى 14,8 پايىزعا قىمباتتاپتى. ونىمدەر ىشىندە سۇرانىسقا ەڭ از يە بولعان ءتۇرى – سىرا. سوعان قاراماستان ىشىمدىكتىڭ بۇل ءتۇرى باسقالارمەن سالىستىرعاندا اسا قاتتى قىمباتتاعان (18,9 پايىزعا).
