ول جامبىل وبلىسىنىڭ شۋ اۋدانىنا قاراستى بەلباسار اۋىلىندا تۋىپ, بالا كەز, بالاڭ شاعىنان مەديتسينا سالاسىنىڭ مامانى بولۋدى ارماندادى. كەيىپكەرىمىز سول ارماننىڭ يىرىمىمەن 1990 جىلى مەكتەپ بىتىرگەننەن كەيىن س.ج. اسفەندياروۆ اتىنداعى قازاق ۇلتتىق مەديتسينا ۋنيۆەرسيتەتىنە وقۋعا تۇسەدى. سودان سول ءبىر كيەلى شاڭىراقتى 1996 جىلى ەمدەۋ ءىسى ماماندىعى بويىنشا ءبىتىرىپ شىعادى.
– قاراپايىم شارۋا وتباسىنان شىقساق تا, بالا كەزىمىزدەن مەديتسينا سالاسىنا بارۋعا ىنتالى بولدىق. قالاۋىمىز ورىندالىپ, ءبىز وقۋعا تۇسكەن جىلى وقۋ ورنىندا قازاق ءبولىمى اشىلدى. ەگەمەندىكتىڭ لەبىن سەزگەندەي بولدىق. قاراپ وتىرساق, سول تۇستا قازاق فاكۋلتەتىنىڭ العاشقى قارلىعاشتارى – ءبىز, ءبىزدىڭ قاتارلاستارىمىز ەكەن. 1994 جىلدان الماتى كلينيكالىق شۇعىل كومەك كورسەتۋ اۋرۋحاناسىنىڭ حيرۋرگيا بولىمشەسىندە ورتا بۋىن مامانى بولىپ جۇمىس ىستەدىم. سوندا جاي جۇرمەي دارىگەرلەردەن ءتالىم الىپ, شاما-شارقىمىزشا تاجىريبە جيناقتادىق. ەڭبەك جولىمىزدا ۇستازدىق ەتكەن اعا ارىپتەستەرگە العىس ايتامىز. اۋداندىق اۋرۋحانادا ءبولىم مەڭگەرۋشىسى بولعان الىبەك سادۋاقاسوۆ سىندى بىلىكتى مامانداردان ۇيرەنگەنىمىز كوپ. قازىر دە ۇيرەنۋدەن قول ۇزگەنىمىز جوق, – دەپ وتكەن شاقتى ەسكە الدى دارىگەر.
1996 جىلى وقۋىن تامامداعان سوڭ باعدات الاتاەۆ الماتى وبلىسى ىلە اۋداندىق ورتالىق اۋرۋحاناسىندا دارىگەر-حيرۋرگ بولىپ جۇمىسىن باستادى. بىلىكتى حيرۋرگتەردى تورۋىلداپ جۇرەتىن جاستاردى كىم جەك كورسىن؟ باعدات الاتاەۆتىڭ ءوزى دە ەڭبەك جولىن مەديتسينانىڭ كىشى قىزمەتىنەن باستاعانىن ۇلكەن ولجا دەپ ەسەپتەيدى. ول استاناعا 2004 جىلى قونىس اۋدارعاندا تسەلينوگراد ايماقتىق كلينيكالىق اۋرۋحاناسىنا جۇمىسقا قابىلدانعان. بۇل – قازىرگى وبلىستىق №2 اۋرۋحانا. مۇنداعى دارىگەرلەر قازىر دە وبلىس توڭىرەگىندەگى 7 اۋىلدىق ەلدى مەكەنگە كوپسالالى حيرۋرگيالىق كومەك كورسەتەدى. باعدات الاتاەۆ وسى اۋرۋحانادا بيىل ناۋرىزعا دەيىن تابان اۋدارماي ەڭبەك ەتتى. ونىڭ 9 جىلىندا حيرۋرگيا ءبولىمىنىڭ مەڭگەرۋشىسى بولدى. جۇمىس قاۋىرت. وبلىس توڭىرەگىندەگى ايماقتارعا شۇعىل شاقىرتۋ تۇسسە, دارىگەرلەر لەزدە جيىلىپ, ساناۆياتسيامەن حيرۋرگيالىق كومەك كورسەتۋگە شىعادى.
– شالعاي اۋىلدارعا كۇردەلى وپەراتسيالار كەزىندە باراتىنبىز. كۇندىز, ءتۇن دەگەن جوق, كەز كەلگەن ۋاقىتتا شاقىرادى. قازىر دە ۇيرەنەيىك, بىلەيىك دەگەن نيەتپەن رەسپۋبليكالىق دياگنوستيكالىق ورتالىعىنىڭ جۋىردا اشىلعان كوپسالالى حيرۋرگيا بولىمشەسىندە دارىگەر-حيرۋرگ بولىپ اۋىسىپ, سوندا ەڭبەك ەتەمىن. كەيدە, سالاعا كەلىپ جاتقان جاستارعا قاراپ, ءوزىمىزدىڭ بوزبالا كەزىمىز ەرىكسىز ەسكە تۇسەدى. بىراق «ۇستازدان شاكىرت وزار» دەگەن بار. ءوزىمىز دە ءبىراز شاكىرتكە بىلگەنىمىزدى ۇيرەتىپ, بەلىن بۋدىق. نەگىزى, ءوزىمنىڭ جۇمىسىمنان تىس ۋاقىتتا استانا مەديتسينالىق ۋنيۆەرسيتەتىندە جالپى حيرۋرگيا پانىنەن ساباق بەرەمىن. ءبىلىم سالاسىنا ارالاسقانىمىزعا دا 15 جىلعا جۋىقتاپتى. ءوزىمىز ساباق بەرگەن شاكىرتتەردىڭ بىرقاتارى قازىر جاقسى قىزمەتتە ءجۇر. مەنىڭشە, حيرۋرگ بولۋ ءۇشىن تالاپ پەن تالانت, ينتۋيتسيا كەرەك. وسى ءۇش كەرەگى تۇگەل ادامنان مىقتى دارىگەر شىعادى تۇبىندە. دارىگەر بولعان سوڭ ءومىرىڭنىڭ سوڭىنا دەيىن وقىپ, ىزدەنەسىڭ. كۇننەن-كۇنگە مەديتسيناعا جاڭا تەحنولوگيالار قوسىلىپ جاتادى. بىراق بۇل بۇرىنعى, ءداستۇرلى ادىستەردى قولدانباۋ كەرەك دەگەن ءسوز ەمەس. سەبەبى وپەراتسيا بارىسىندا ءتۇرلى كەلەڭسىز جاعدايلار بولمايتىنىنا ەشكىم كەپىلدىك بەرە المايدى. سوندا ءداستۇرلى ادىسكە كوشۋگە تۋرا كەلەتىن ساتتەر تۋى مۇمكىن. وكشەمىزدى باسىپ كەلە جاتقان ءىزباسار جاستارعا دا ايتارىم وسى, مەديتسينا سالاسىن تاڭداعان سوڭ ۇيرەنۋدەن قاشپاۋ كەرەك. تاجىريبە ەشقاشان ارتىق بولمايدى, – دەپ جاستارعا كەڭەسىن ايتتى ب.الاتاەۆ.
بىلىكتى دارىگەردىڭ ايتۋىنشا, وپەراتسيانىڭ جەڭىلى بولمايدى. سوندىقتان حيرۋرگتەر ءار وپەراتسياعا ويىن جيناقتاپ كىرىپ, بارىنشا سالقىنقاندىلىق تانىتادى. كۇماندانۋعا تاعى بولمايدى. بۇل دارىگەرلەردىڭ وزگە سالاداعى مامانداردان باستى ارتىقشىلىعى دەسەك تە بولاتىن شىعار.
