بۇگىن ءورت سالدارىنان قازا تاپقان 14 ادامنىڭ وتباسىنا, سونداي-اق تراكتورشى س.ن.ارحيپوۆتىڭ وتباسىنا سەمەي قالاسى قاراعايلى شاعىن اۋدانىنداعى جاڭا پاتەرلەردىڭ كىلتى تابىستالدى. اباي وبلىسىنىڭ اكىمى قايتىس بولعان سايات نۇرجىگىتوۆ پەن امانگەلدى دۇيسەمباەۆتىڭ وتباسىنا 2 جانە 3 بولمەلى پاتەرلەردىڭ كىلتىن تاپسىردى.
«ورتتە زارداپ شەككەندەردىڭ وتباسىلارىن قولداۋ بويىنشا جۇرگىزىلىپ جاتقان جۇمىستار ءبىزدىڭ تۇراقتى باقىلاۋىمىزدا. بۇگىن ءبىز تاپسىراتىن جاڭا پاتەرلەر بارلىق قاجەتتى جيھازدارمەن جانە تۇرمىستىق تەحنيكامەن تولىق جابدىقتالعان. ءبىز قوسىمشا كومەك كورسەتۋدى جالعاستىرامىز», دەپ اتاپ ءوتتى اباي وبلىسىنىڭ اكىمى ن.ۇرانحاەۆ.
ايتا كەتەيىك, مەمەلەكەت باسشىنىڭ تاپسىرماسىمەن قازا تاپقانداردىڭ وتباسىنا «قازاقستان حالقىنا» قورىنان 7 ملن تەڭگەدەن, سونداي-اق كامەلەتكە تولماعان ءار بالاعا 2 ملن تەڭگەدەن تولەنەدى. سونىمەن قاتار 40-تان استام قازاقستاندىق جوو ورتتەن زارداپ شەككەن وتباسىلاردىڭ بالالارىنا گرانت ءبولىپ, جاتاقحانادان ورىن بەرۋگە دايىن. وعان قوسا اقىلى نەگىزدە وقيتىن ستۋدەنتتەر مەن ماگيسترانتتاردى گرانتقا اۋىستىرۋ كوزدەلگەن.
